Donuya na icavacava ni Noveba, 2016, dua na ka na bi ni uca ena noca kei Itali. E luvu kina eso na koro ena sauca ni tauni o Moncalieri. Eso na vanua e 1.6 na fiti na cere ni wai. Tukuni ena dua na niusiveva: “Suasua ga na ka kece.” Rauta ni le 1,500 na vakaitikotiko kina era tokitaki ira na vakailesilesi. E totolo tale ga nodra veivuke na dauveivueti e sega kina ni dua na vakacalaka. Ia e levu na vuvale e vakacacani na ka era taukena.

E totolo ga nodra veivuke na tacida ena vakacoko. Era vukei ira na dui vuvale me kau laivi na soso kei na benu e kumuni yani ena nodra vale, maroroi tale ga na iyaya ni vale kei na so na ka era taukena. Nira kau iyaya tiko yani ni vakacoko kei na kakana katakata e dua na timi ni vakacoko, ra donuya sara e dua gaunisala e sogo tu. Ia e vakadonui mera takoso nira kauta tiko eso na ka mera vukei kina eso na vuvale. O ira na bolecakacaka era vukei ira na tacida era vakaleqai, wili kina o ira na tiko veitikivi e duidui nodra vakabauta.

Kena ivakaraitaki, e luvu na rumu ni dua na tabavale taucoko. Nira pamutaka laivi na wai na dauveivukei, ra veivuke sara e levu na tacida vua e dua na tacida o Antonio kei nona vuvale me kau laivi na benu ena rumu qori. Oti era samaka tale ga na iyatuvale era tiko e kea. Era yatuni na tacida ra qai veivuketaka na sasamaki, ena loma ni vica ga na aua e lala sara ga na rumu qori. Era taleitaka kece na tiko ena iyatuvale qori nodra veivuke na tacida. E vakaitikotiko e kea o Viviana, e torovi wati Antonio qai vakavinavinaka ena luluvu: “Kerekere vakasavuya neimami vakavinavinaka kece vei ira na tacimu vakayalo. E sega ni vakatauvatani rawa na ka oni cakava!”

E vakacacani vakalevu ena waluvu e dua na koro. Era raica toka na vakaitikotiko e kea nodra veivuke na tacida vei ira na vakaleqai. Qori e uqeti ira sara ga, eso gona vei ira era veivuke vei ira na tacida, ra qai marautaka mera muria nona veidusimaki o koya e liutaka tiko na cakacaka.

Dua na turaga e vakacacani vakalevu nona vale, e lomoci tale ga ena soso nona qarati ni motoka. Dua na ka nona qoroi ratou na le walu na tacida nodratou sega ni cegu ni samaka nona qarati me va na aua. E vakaraitaka nona vakavinavinaka ni mokoti ratou, e biuta tale ga ena internet nona vakavinavinaka ena nodratou “veivuke levu.”

E kaya e dua na tacida: “Keimami vukea e vica vata era sega ni iVakadinadina i Jiova era tiko voleka, levu era sa yabaki 80 vakacaca. Eso era luluvu nira vakavinavinakataka na ka keimami cakava.” Dua vei ira qori e lotu Katolika, na levu ni nona vakavinavinaka e kaya me baleti ira na tacida: “Dua na ka totoka au raica se mani vakacava na duidui ni noda vakabauta vakalotu, eda saga ga meda veivukei.” Dua tale na turaga e kaya: “Au dau kilai kemuni tu ga ena nomuni dau gole e veivale ena veimataka ni Sigatabu, au sega ni kila ni oni dauveivuke tale ga va qo.”