Io. Keimami vakatokai me lotu vaKarisito ni:

•   Keimami saga me keimami muria voleka na ivakavuvuli kei na itovo i Jisu Karisito.—1 Pita 2:21.

•   Keimami vakabauta ni o Jisu e bibi ena noda vakabulai, ni “sega tale ni dua na yaca e ruku i lomalagi e soli vei keda meda vakabulai kina.”—Cakacaka 4:12.

•   O ira na mai iVakadinadina i Jiova era papitaiso ena yaca i Jisu.—Maciu 28:18, 19.

•   Keimami masu ena yaca i Jisu.—Joni 15:16.

•   Keimami vakabauta ni o Jisu e Ulu, se lesi o koya me lewa na tamata kece.—1 Korinica 11:3.

 Ia keimami duidui mai na lotu tale eso era vakatokai me lotu vaKarisito. Kena ivakaraitaki, keimami vakabauta na ka e tukuna na iVolatabu ni o Jisu e Luve ni Kalou, e sega ni tiki ni Letoluvakalou. (Marika 12:29) Keimami sega ni vakabauta ni bula tale tiko e dua na ka ena gauna e mate kina na tamata, e sega tale ga ni vakaivolatabu nona veivakararawataki tawamudu na Kalou ena bukawaqa mai eli. Keimami vakabauta tale ga ni sega ni dodonu mera vakaitutu o ira na veiliutaki ena ka vakalotu mera cecere kina vei ira na kena vo.—Dauvunau 9:5, 10; Maciu 23:8-10.