Sala Cava Era Vakavulici Kina na iVakadinadina i Jiova ena Cakacaka Vakaitalatala?

SARAVA/ROGOCA

Era dau vakavulici tiko ga na iVakadinadina i Jiova ena ivakarau ni bula vaKarisito, okati kina na cakacaka vakaitalatala. Qori na cakacaka e vakarota o Jisu vei ira nona imuri mera cakava, ya na veivakavulici kei na vunautaki ni itukutuku vinaka ni Matanitu ni Kalou. (Maciu 24:14; 28:19, 20) Era dau vakavulici ena soqoni e veimacawa, soqo ni veiwasewase kei na soqo ni tabacakacaka. O ira tale ga na lesi ena so na itavi ena ivavakoso se ena isoqosoqo, era dau vakavulici ena so tale na koronivuli vakalou.

Ena ulutaga qo

Cava eso na vuli e vakarautaki vei ira na iVakadinadina i Jiova?

Soqoni ni ivavakoso. E veimacawa e dau vakayacori e rua na soqoni ena nodra vanua ni sokalou e vakatokai na Vale ni Soqoni. Dua na soqoni ena caka ena lomanimacawa, dua tale ena muanimacawa. E dola raraba na soqoni vei ira na lewenivanua, qai sega ni gadrevi kina na soli.

Soqoni ena lomanimacawa. Era dau vulica kina na sala mera vakavinakataka nodra ivakarau ni wiliwili, iwalewale ni veivosaki, vosa e matanalevu, vunau kei na veivakavulici. E vakarautaki na veivakavulici qori ena ivunau, veivosakitaki eso na ulutaga, vakatasuasua kei na vidio. Qori e vukea mera maqosa ni wasea vei ira eso tale na itukutuku ena iVolatabu, kei na nodra vakavulici na tataleitaki ena iVolatabu. Koya e bibi sara, na nodra soqoni e vaqaqacotaka nodra vakabauta na Kalou, mera lomani koya kei ira era vakabauta vata.
Soqoni ena muanimacawa. E rua na wase ni soqoni. E dau tekivu ena dua na ivunau vakaivolatabu me baleti ira na tataleitaki. Na ikarua ni wase ni soqoni era dau vakaitavi kina na vakarorogo ni yavutaki ena Vale ni Vakatawa vulici. a E veivosakitaki qai vakamacalataki kina na ulutaga vakaivolatabu, kei na kena ivakavuvuli me vukei ira ena nodra cakacaka vakaitalatala kei na nodra bula e veisiga.

Soqo ni tabacakacaka kei na soqo ni veiwasewase. E veiyabaki e dau vakayacori e tolu na soqo lelevu, ra qai tiko kina e levu na ivavakoso. E yavutaki na soqo marautaki qori ena dua na usutu vakaivolatabu, e okati tale ga kina na ivunau veiuqeti, vakatasuasua, veitarotarogi kei na vidio. Na soqo qori kei na soqoni vakaivavakoso e vukei ira mera kila vinaka na iVolatabu, mera italatala vinaka tale ga ni itukutuku vinaka. E dola raraba tale ga na soqo vei ira na lewenivanua, qai sega ni gadrevi kina na soli.

Na nodra vuli vakalou na iVakadinadina i Jiova

Eso vei ira era dau sureti mera vuli ena so tale na vuli vakalou. Na koronivuli cava era vuli kina? Cava na kena inaki? E vakacava na kena balavu? O cei era rawa ni vuli kina?

Koronivuli ni Cakacaka Vakapainia

iNaki: Mera vakavulici kina na veiqaravi vakatabakidua era vakatokai na painia, b mera maqosa ena vunau kei na veivakavulici. E okati ena vuli na veivosakitaki ni so na ulutaga, vakatasuasua, vunau kei na cakacaka vakaiwasewase.
Kena balavu: Ono na siga.
iVakatagedegede: Era na sureti mera vuli o ira sa oti e dua na yabaki nodra painia. E rawa nira sureti tale ga o ira na painia dede era se sega ni tiko ena vuli ni oti e lima na yabaki.

Koronivuli ni iTalatala ni Matanitu

iNaki: Mera vakavulici kina o ira sa dede nodra veiqaravi vakatabakidua, me rawa nira maqosa ena iwalewale ni vunau kei na veivakavulici. Me vakarabailevutaka tale ga nodra kila na ulutaga vakaivolatabu. Ni oti na vuli, era na lesi eso mera veiqaravi ena vanua e vinakati vakalevu kina na veivuke.
Kena balavu: Rua na vula.
iVakatagedegede: E rawa nira vakalewe fomu kina na painia era yacova na kena ivakatagedegede, qai rawa nira veiqaravi ena vanua e vinakati vakalevu kina na veivuke.

Vuli ni Qase ni iVavakoso

iNaki: Me vukei ira na qase c mera qarava nodra itavi ena ivavakoso me vaka na veivakavulici, veivakatawani qai vakatitobutaka nodra lomana na Kalou kei ira era vakabauta vata.—1 Pita 5:2, 3.
Kena balavu: Lima na siga.
iVakatagedegede: Era sureti kina na qase ni ivavakoso vou, kei ira na qase ivavakoso matua era se bera ni tiko ena vuli ni oti e lima na yabaki.

Koronivuli ni iVakatawa ni Tabacakacaka kei na Watidra

iNaki: Mera vakavulici na ivakatawa dauveilakoyaki, era vakatokai na ivakatawa ni tabacakacaka d mera qarava vinaka nodra itavi. (1 Timoci 5:17) E vukei ira tale ga na qase ni ivavakoso kei na watidra me titobu nodra kila na iVolatabu.
Kena balavu: Dua na vula.
iVakatagedegede: Era na sureti mera vuli o ira na ivakatawa ni tabacakacaka vou kei na watidra, ni oti e dua na yabaki nodra veiqaravi ena nodra ilesilesi. Era na sureti tale mera vuli ni oti e veiyalima na yabaki.

Koronivuli ni Cakacaka Vakaitalatala

iNaki: Me vukei ira na qase kei ira na dauveiqaravi ni vavakoso e mera qarava vinaka nodra itavi ena ivavakoso ni laurai vata kei na ituvaki e yaco tiko, ivakarau sa takalevu tu kei na ka e gadrevi. (2 Timoci 3:1) E dau caka na vuli ni oti e vica na yabaki.
Kena balavu: E vakatau tu, eso na gauna e dua ga na siga.
iVakatagedegede: iVakatawa ni tabacakacaka, qase ni ivavakoso kei na dauveiqaravi ni vavakoso.

Koronivuli e Peceli

iNaki: Me vukei ira na lewenivuvale e Peceli f mera qarava vinaka nodra itavi, mera lomana tale ga na Kalou kei ira na tacidra.
Kena balavu: Lima veimama na siga.
iVakatagedegede: Era vuli kina o ira na lewenivuvale vou e Peceli. Era na sureti tale ga kina o ira sa dede e Peceli era se bera ni tiko ena vuli ni oti e lima na yabaki.

Koronivuli e Kiliati

iNaki: Me vukei ira na gonevuli mera vakamareqeta vakalevu na Vosa ni Kalou, ra qai muria na ka era vulica. (1 Cesalonaika 2:13) O ira na tagane kei na yalewa matua vakayalo qo era dau yaga vakalevu ena isoqosoqo i Jiova, kei na cakacaka ni vuli iVolatabu ena vuravura raraba. O ira na vuli oti mai kina era rawa ni lesi ina yalava se ina valenivolavola ni tabana ena nodra vanua, se vanua tani.
Kena balavu: Lima na vula.
iVakatagedegede: Na valenivolavola ni tabana ena sureti ira na veiqaravi vakatabakidua mera vakalewe fomu kina. E caka na vuli ena Watchtower Educational Center e Patterson, e Niu Yoka mai Merika.

Vuli ni Lewe ni Komiti ni Tabana kei na Watidra

iNaki: Me vakavulici ira na Komiti ni Tabana g mera raica na cakacaka e vakayacori ena valenivolavola ni tabana kei na nodra veika vakayalo na iVakadinadina i Jiova ena nodra vanua se na vanua e vakarurugi ena valenitabana.
Kena balavu: Rua na vula.
iVakatagedegede: Na iTikotiko Liu ni iVakadinadina i Jiova ena sureti ira na lewe ni Komiti ni Tabana kei na watidra mera tiko ena vuli ena Watchtower Educational Center e Patterson, e Niu Yoka mai Merika.

E yavutaki ena cava na nodra vuli?

Na nodra vakavulici na iVakadinadina i Jiova e yavutaki ga ena iVolatabu. Era vakabauta ni vakavuna na Kalou na volai ni iVolatabu, qai tiko kina na ivakasala vinaka duadua me dusimaki ira ena itovo vaKarisito.—2 Timoci 3:16, 17.

Vakacava e saumi na nodra vuli?

E sega. E vakailavotaki ena cau na nodra cakacaka na iVakadinadina i Jiova.—2 Korinica 9:7.

a Sa tiko ena jw.org na iVolatabu kei na ivukevuke vakaivolatabu, wili kina na vidio.

b Na painia, ya e dua na iVakadinadina i Jiova e papitaiso tagane se yalewa e ivakaraitaki vinaka, qai tu vakarau me vakayagataka na levu ni aua e lavaki e veivula ena vunautaki ni itukutuku vinaka vei ira eso tale.

c Era tagane lotu vaKarisito matua na qase ni ivavakoso, ra qai veivakavulici ena iVolatabu. Era vakatawani ira tale ga na tamata i Jiova ena nodra veivakayaloqaqataki kei na nodra veitokoni. Era sega ni saumi.

d Na ivakatawa ni tabacakacaka e veiqaravi vakatabakidua, qai dau sikova e veimacawa na ivavakoso ena tabacakacaka e lesi kina. E dau vakayaloqaqataki ira tale ga na mataveitacini ena ivunau vakaivolatabu qai tomani ira ena cakacaka vakaitalatala.

e Na dauveiqaravi ni vavakoso era qarava e levu na itavi mera vukei ira na mataveitacini. Nira cakava qori sa rawa ni levu na gauna me vakayagataka na ivakatawa ena veivakavulici kei na veivakatawani.

f E dau vakatokai na valenivolavola ni tabana ni iVakadinadina i Jiova, me Peceli. Era veiqaravi kina na veiqaravi vakatabakidua ena kena tokoni na nodra cakacaka na iVakadinadina i Jiova ena yalava e qarava na valenitabana.

g Na Komiti ni Tabana e lewena e tolu se sivia na tagane matua vakayalo.

E yaga vakacava vei ira na vuli vakalou?

“Au dau mamadua, e dredre kina meu tukuna vei ira eso tale na veika me baleta na iVolatabu. Ia na veivakavulici ni soqoni ena lomanimacawa, e vukei au meu nuidei qai vakavinakataka noqu iwalewale ni veivakavulici. E vakavinakataka tale ga noqu ivakarau ni vosa vei ira ena ivavakoso, kei na vanua ni noqu cakacaka.”—Natasha, Merika.
“Na Koronivuli ni iTalatala ni Matanitu e vukei au meu bucina na itovo me vaka na loloma, vosovoso kei na yalovinaka. Au vakila niu dua na lotu vaKarisito vinaka, e vinaka tale ga noqu veimaliwai kei ira eso tale. E vukei au tale ga ena sala meu vakekeli kina ena ulutaga vakaivolatabu, qai vakamacalataka na Vosa ni Kalou ena sala me tara na lomadra eso tale.”—Stephen, Nigeria.
“E vukei au na Vuli ni Qase ni iVavakoso meu bucina na yalomalumalumu. Na vunau e vakarautaki kina e uqeti au meu muria na ivakaraitaki i Jisu.”—Luca, Itali.
“Na Koronivuli ni Cakacaka Vakaitalatala e vakavulici au ena sala meu dau torovi rawarawa, veikauaitaki qai yalololoma vei ira eso tale. Au vulica tale ga ni ka au cakava vei ira eso tale e dodonu me yavutaki ena loloma, sega ni dua ga na itavi me caka.”—Samuel, Peritania.
“Na Koronivuli e Kiliati e vukei keirau me keirau ilovi keirau tale ena Vosa ni Kalou. (Jemesa 1:22-25) Keirau raica ni vinakati me keirau vakavinakataka na neirau itovo kei na neirau qaravi Jiova. Keirau vulica tale ga me keirau kua ni nanumi keirau ga, ia me keirau kauaitaki ira eso tale. Na ka kece keirau cakava se tukuna me yavutaki tale ga ena loloma.”—Elnathan kei Princess, Yatu Filipaini.