Sega, eda dui vakatulewataka yadua noda qarava na Kalou. (Roma 14:12) Era vakavulici luvedra na iVakadinadina i Jiova ena ivakavuvuli vakaivolatabu. Ia nira tubu cake tiko era na dui vakatulewataka mera iVakadinadina i Jiova se sega.—Roma 12:2; Kalatia 6:5.

 Me vakataki ira e levu na itubutubu, era vinakata na itubutubu iVakadinadina i Jiova na vanua vinaka duadua vei ira na luvedra. Era na vakavulici ira na ka ena yaga vei ira, oya na veika era rawa ni cakava, kei na ivakavuvuli ena vakavinakataka nodra itovo kei na ka era vakabauta. Era vakabauta na iVakadinadina i Jiova na iVolatabu ga e uqeta na bula vinaka duadua. Era saga gona mera vakavulici luvedra ena iVolatabu, mera tiko tale ga ena soqoni vaKarisito. (Vakarua 6:6, 7) Nira tubu cake tiko era na dui vakatulewataka ga mera muria na vakabauta era tuberi ira kina nodra itubutubu.

•  Era papitaisotaki ira na gone dramidrami?

•  Era na cati luvedra ke ra sega ni via papitaiso?

•  Cava era dau kauti luvedra kina ena cakacaka vakavunau?

•  Era vakaitavi ena olodei se so tale na soqo?

•  Cava nodra nanuma o ira na susugi ena lotu iVakadinadina i Jiova?

 Sega. E sega ni vakavuvulitaka na iVolatabu nodra papitaiso na gone dramidrami. Kena ivakaraitaki, ni bera nira papitaiso na lotu vaKarisito ena imatai ni senitiuri, era rogoca rawa na itukutuku, “ciqoma ena marau,” ra veivutuni tale ga. (Cakacaka 2:14, 22, 38, 41) Me papitaiso e dua, e vinakati me kila rawa toka na ka e vakavulica na iVolatabu, me vakabauta, vakatulewataka tale ga me muria na kena ivakavuvuli. Qori na ka era na sega ni rawa ni cakava na gone dramidrami.

 Nira tubu tiko na gone era na qai vakatulewataka mera papitaiso. Ia e vinakati mera vakasamataka vinaka na vakatulewa era na cakava.

 Sega. Era na rairai rarawataka na itubutubu ke ra sega ni duavata na luvedra ena nodra vakabauta. Ia era na lomani luvedra tiko ga, e sega ni yavu ni nodra veitawasei nodra sega ni duavata kei luvedra.

 E vica na vuna era na kauti luvedra kina ena cakacaka vakavunau. a

•   E vakaroti ira na itubutubu na iVolatabu mera vakavulici luvedra ena veika vakayalo, mera qarava tale ga na Kalou. (Efeso 6:4) Na sokalou e okati kina nona vakaraitaka e matanalevu e dua nona vakabauta. E bibi gona na cakacaka vakavunau ena nona vakavulici na gone ena veika vakayalo.—Roma 10:9, 10; Iperiu 13:15.

•   Na iVolatabu e uqeti ira sara ga na gone mera “vakacaucautaka na yaca ni Turaga.” (Same 148:12, 13, King James Version) E bibi duadua noda vakacaucautaka na Kalou, oya noda tukuna vei ira eso tale na veika e baleti koya. b

•   Ena yaga vei ira na gone nodra tokoni ira nodra itubutubu ena cakacaka vakavunau. Kena ivakaraitaki, era na vulica na sala mera veimaliwai kina kei ira eso tale. Era na bucina kina na itovo talei me vaka na yalololoma, vakarokoroko, veidokai, kei na veinanumi. Era na vulica tale ga mera kila vinaka na yavu ni nodra vakabauta na iVolatabu.

 Era sega ni vakaitavi na iVakadinadina i Jiova ena olodei vakalotu, se so tale na soqo e sega ni taleitaka na Kalou. c (2 Korinica 6:14-17; Efeso 5:10) Kena ivakaraitaki, era sega ni vakaitavi ena siganisucu se Kirisimasi ni sega ni yavutaki vakaivolatabu.

 Ia era dau taleitaka na veimaliwai vakavuvale kei na soli iloloma vei ira na luvedra. Era sega ni vakalaiva me lewa nodra soqo vata na ituvatuva ni gauna kei na soli ka. Era dau tuvanaka na gauna mera veimaliwai kina, se soli iloloma ena dua ga na gauna ena loma ni yabaki.