Na ka keimami vakabauta e yavutaki kece ena iVolatabu. E dau veisautaki gona eso na ka keimami vakabauta me salavata kei na veiveisau e caka me vakamatatataki kina neimami kilaka vakaivolatabu. a

 Qori e salavata kei na ivakavuvuli vakaivolatabu ena Vosa Vakaibalebale 4:​18: “Na nodra sala na yalododonu e vaka na rarama ni matanisiga e serau cake tiko na kena rarama me yacova na sigalevu.” Ni cadra na siga, sa qai dau laurai mai vakamalua na veika era tu wavoliti keda. Ni vakatakila tale ga na Kalou na ibalebale ni ka dina, e dau cakava vakalalai qai cakava ena kena gauna donu. (1 Pita 1:​10-​12) Me vaka e parofisaitaka na iVolatabu, sa vakatotolotaka o Jiova na kena kilai na ibalebale ni ka dina ena “gauna ni icavacava.”​—Taniela 12:4.

 Ni veisau na noda kilaka vakaivolatabu, e sega ni dodonu meda kurabui se lomaleqa. O ira mada ga na tamata ni Kalou ena gauna vakaivolatabu e cala nodra rai kei na ka era namaka, qai vinakati mera veisautaka nodra ivakarau ni rai.

•   Se vo e 40 na yabaki mai na gauna e lokuca o Jiova mera sereki kina na Isireli, sa bole tu o Mosese me lai sereki ira mai.​—Cakacaka 7:​23-​25, 30, 35.

•   Eratou sega ni taura rawa na yapositolo na parofisai me baleta na nona mate kei na nona vakaturi na Mesaia.​—Aisea 53:​8-​12; Maciu 16:21-​23.

•   Eso na lotu vaKarisito taumada a cala nodra rai me baleta na gauna ena yaco kina na “siga i Jiova.”​—2 Cesalonaika 2:​1, 2.

 A qai vakadodonutaka nodra rai na Kalou, eda nuitaka tale ga ni na cakava tiko ga qori vei keda na Kalou.​—Jemesa 1:5.