Keimami saga na iVakadinadina i Jiova me keimami muria voleka na ivakarau vaKarisito e vakavulica o Jisu, kei na kena ratou muria na yapositolo. Ena vakamacalataka na ulutaga qo na yavu ni neimami vakabauta.

1.   Kalou. Keimami sokaloutaki koya na Kalou dina, e Kalou Kaukaua Duadua, na Dauveibuli, na yacana o Jiova. (Same 83:18; Vakatakila 4:​11) O koya na Kalou i Eparama, Mosese, kei Jisu.​—Lako Yani 3:6; 32:11; Joni 20:17.

2.   iVolatabu. Keimami vakadinata ni vosa uqeti vakalou na iVolatabu, e nona itukutuku na Kalou vei keda na tamata. (Joni 17:17; 2 Timoci 3:​16) Keimami yavutaka na neimami vakabauta ena 66 kece na ivola e lewe ni “Veiyalayalati Makawa” kei na “Veiyalayalati Vou.” E vola kina o Parofesa Jason D. BeDuhn me baleti keimami na iVakadinadina i Jiova: “Era yavutaka na nodra vakabauta kei na nodra ivakavuvuli ena iVolatabu, ra qai sega ni lewa na ka e volai kina.” a

    Keimami yavutaka na neimami vakabauta ena iVolatabu taucoko, ia keimami vakabauta tale ga ni so na ka e volai ena iVolatabu era ivakatakilakila ga.​—Vakatakila 1:1.

3.   Jisu. Keimami muria na nona ivakavuvuli o Jisu Karisito kei na nona ivakaraitaki. Keimami rokovi koya ni noda iVakabula, e Luve ni Kalou tale ga. (Maciu 20:28; Cakacaka 5:​31) Qori na vuna keimami lotu vaKarisito kina. (Cakacaka 11:26) Ia keimami vulica ena iVolatabu ni sega ni Kalou Kaukaua Duadua o Jisu, e sega tale ga na yavu vakaivolatabu me tokona na ivakavuvuli ni Letoluvakalou.​—Joni 14:28.

4.   Na Matanitu ni Kalou. Qo e dua dina na matanitu e tiko mai lomalagi, ia e sega ni tiko e lomada. Na matanitu qori ena mai sosomitaki ira kece na matanitu vakatamata era veiliutaki tiko nikua, ena qai vakayacora na inaki ni Kalou e vuravura. (Taniela 2:​44; Maciu 6:​9, 10) Sa vakarau yavala na Matanitu ni Kalou, e vakadinadinataki qori ena parofisai vakaivolatabu nida sa bula tu qo ena “iotioti ni veisiga.”​—2 Timoci 3:​1-5; Maciu 24:​3-​14.

    Ena Tui ni Matanitu Vakalomalagi qori o Jisu. E tekivu nona veiliutaki ena 1914​—Vakatakila 11:15.

5.   Vakabulai. Ena vuku ni isoro ni veivoli i Jisu, eda sereki kina mai na ivalavala ca kei na mate. (Maciu 20:28; Cakacaka 4:​12) Me yaga vei keda na isoro qori, e dodonu meda vakabauti Jisu, meda veisautaka tale ga noda itovo da qai papitaiso. (Maciu 28:19, 20; Joni 3:​16; Cakacaka 3:​19, 20) Na dei ni nona vakabauta e dua ena laurai ena ka e cakava. (Jemesa 2:​24, 26) Ia eda na sega ni rawata na bula, ke sega na “loloma soli wale ni Kalou.”​—Kalatia 2:​16, 21.

6.   Lomalagi. O lomalagi e nona itikotiko na Kalou o Jiova, o Jisu Karisito, kei ira na agilosi yalodina. b (Same 103:19-​21; Cakacaka 7:​55) Era na vakaturi tale ga mera lai bula i lomalagi e dua na iwiliwili lailai era le 144,000. Cava era lai cakava? Era na veiliutaki kei Jisu ena Matanitu ni Kalou.​—Taniela 7:​27; 2 Timoci 2:​12; Vakatakila 5:​9, 10; 14:​1, 3.

7.   Vuravura. E bulia na vuravura na Kalou me noda itikotiko na kawatamata. (Same 104:5; 115:16; Dauvunau 1:4) Sa na oti vakadua na tauvimate ni sa vakalougatataki ira na tamata talairawarawa na Kalou, era na bula tawamudu tale ga e vuravura.​—Same 37:11, 34.

8.   Rarawa kei na veika ca. A tekivu na rarawa kei na ca ena nona talaidredre e dua na agilosi ni Kalou. (Joni 8:​44) E qai vakatokai na agilosi talaidredre qori me o “Setani” kei na “Tevoro.” A vakamuai rau o Atama kei Ivi me ratou talaidredre vata, ya na vuna eda sa mai vakila tu kina qo na nodrau kawa na kena revurevu. (Vakatekivu 3:​1-6; Roma 5:​12) Me saumi na vakalelewa i Setani, e vakatara na Kalou meda sotava na rarawa kei na ca, ia ena sega ni vakalaiva tiko qori me tawamudu.

9.   Mate. Ni mate na tamata, sega tale ni dua na ka e qai bula tiko vua. (Same 146:4; Dauvunau 9:​5, 10) Era sega ni vakararawataki tiko i eli.

    Ena vakabulai ira tale na mate na Kalou ena gauna ni veivakaturi. (Cakacaka 24:15) Ke ra sega ni via vulica na sala ni Kalou o ira na vakaturi qori, era na rusa vakadua. Sa sega ni qai caka tale na veivakaturi.​—Vakatakila 20:14, 15.

10.   Vuvale. Keimami muria na nona ituvatuva na Kalou me baleta na vakawati ni rau sa na lewe dua ga na tagane kei na yalewa. Na yavu vakaivolatabu duadua ga ni veisere na veibutakoci. (Maciu 19:​4-9) Keimami vakadinadinataka ni na yaga na vuku vakalou me marau kina na bula vakavuvale.​—Efeso 5:22–​6:1.

11.   Neimami sokalou. Keimami sega ni qarava na kauveilatai kei na matakau. (Vakarua 4:​15-​19; 1 Joni 5:​21) Qo eso na tiki bibi ni neimami sokalou:

    •   Masu vua na Kalou.​—Filipai 4:6.

    •   Wilika qai vulica na iVolatabu.​—Same 1:​1-3.

    •   Vakasamataka vakatitobu na ka keimami vulica ena iVolatabu.​—Same 77:12.

    •   Soqoni vata, keimami dau masu vata, vulica na iVolatabu, lagasere, vakamacalataka neimami vakabauta, keimami veivakayaloqaqataki, keimami vakayaloqaqataki ira tale ga eso tale.​—Kolosa 3:​16; Iperiu 10:23-​25.

    •   Vunautaka na “itukutuku vinaka ni Matanitu ni Kalou.”​—Maciu 24:14.

    •   Vukei ira na vakaleqai.​—Jemesa 2:​14-​17.

    •   Taravaki kei na vakavinakataki ni neimami Vale ni Soqoni kei na vale tale eso e tokona na veivakavulici ena iVolatabu e veiyasa i vuravura.​—Same 127:1.

    •   Veivuke ena vakacoko.​—Cakacaka 11:27-​30.

12.   Neimami isoqososo. Keimami tuvanaki vakaivavakoso, era qarava na ivavakoso kece qori na ilawalawa qase. Ia era sega ni vaqara itutu na qase ni ivavakoso, era sega tale ga ni saumi. (Maciu 10:8; 23:8) Keimami sega ni lavaka na ikatini, sega tale ga ni veisoliyaki na veleti ni soli ena neimami soqoni. (2 Korinica 9:7) E tokoni na neimami cakacaka ena cau. Era sega ni vinakata mera kilai o ira na cau.

     E dusimaka na isoqosoqo ni iVakadinadina i Jiova e vuravura taucoko na iLawalawa Dauvakatulewa. Qo e dua na ilawalawa lailai ratou lewena e vica na lotu vaKarisito matua. Ratou veiqaravi tiko ena neimami itikotiko liu e Merika.​—Maciu 24:45.

13.   Neimami duavata. E vakaduavatataki keimami na neimami vakabauta. (1 Korinica 1:​10) E duidui na vanua keimami cavutu mai kina, duidui na ivakatagedegede ni bula kei na rawaka vakailavo, ia keimami saga vagumatua me keimami kua ni veivakaduiduitaki. (Cakacaka 10:34, 35; Jemesa 2:4) Na duavata qori e vakavuna me keimami kua ni vakatulewa ena vukuna e dua tale. Keimami na dui vakatulewa sara ga ena ka me baleti keimami, ia ena yavutaki ena neimami lewaeloma e vakavulici ena iVolatabu.​—Roma 14:​1-4; Iperiu 5:​14.

14.   Neimami itovo. Keimani saga me keimami yavutaka ena loloma na ka kece keimami cakava. (Joni 13:34, 35) Keimami sega ni vakaitovotaka na itovo e cata na Kalou, dua oya na kena soli kei na tauri ni dra. (Cakacaka 15:28, 29; Kalatia 5:​19-​21) Keimami dau veiyaloni, keimami sega ni vakaitavi tale ga ena ivalu. (Maciu 5:9; Aisea 2:4) Se matanitu cava keimami lewena, keimami dokai ira na veiliutaki, talairawarawa tale ga ena lawa. Keimami na talairawarawa tiko ga ke sega ni veisaqasaqa kei na lawa ni Kalou na lawa ni matanitu.​—Maciu 22:21; Cakacaka 5:​29.

15.   Neimami veimaliwai. E vakarota o Jisu: “Mo lomana na kainomu me vaka nomu lomani iko.” E tukuna tale ga vei ira na lotu vaKarisito nira “sega ni vakavuravura.” (Maciu 22:39; Joni 17:16) Keimami saga gona me keimami “caka vinaka vei ira na tamata kece,” ia keimami sega ni veitovaki ena veika vakapolitiki, keimami sega tale ga ni cokovata kei na dua tale na lotu. (Kalatia 6:​10; 2 Korinica 6:​14) Ia keimami doka na nodra vakatulewa eso tale ena veika va qori.​—Roma 14:12.

 Ke oni via kila eso tale na ka keimami vakabauta na iVakadinadina i Jiova, oni rawa ni wilika ena neimami website, volavola se qiri ena neimami valenivolavola, se gole ena soqoni ena dua na neimami Vale ni Soqoni e voleka vei kemuni, se oni rawa sara ga ni taroga e dua na iVakadinadina i Jiova ena nomuni yasayasa.