E rawarawa qai rakorako na nodra vakamau na iVakadinadina i Jiova. Ena rogoci e dua na vunau vakaivolatabu, oti ena rawa ni caka e dua na kena soqo se kanavata. a A tiko tale ga o Jisu ena dua na soqo ni vakamau ena siti o Kena ni se qai tekivu na nona cakacaka vakaitalatala.—Joni 2:1-11.

•  Cava e dau caka ena vakamau?

•  E caka i vei nodra vakamau na iVakadinadina i Jiova?

•  O cei e rawa ni tiko kina?

•  Vakacava na isulusulu ena vakamau ni iVakadinadina i Jiova?

•  E caka na soli iloloma?

•  E caka kina na lave bilo ni vakanuinui vinaka (toasting)?

•  Ena viritaki na raisi se na tikitiki ni pepa?

•  E vakarautaki na kakana kei na gunu?

•  Vakacava na ivakatagi kei na danisi?

•  Era dau vakananuma na iVakadinadina i Jiova nodra siga ni vakamau?

 E tiki bibi ni vakamau na kena soli e dua na ivunau e 30 na miniti na kena balavu. Ena solia na ivunau qori e dua na italatala ni iVakadinadina i Jiova. Ena vakaraitaka na loloma qai veiuqeti nona ivunau me vakabibitaka kina na sala ena vukei rau kina na veiwatini na iVolatabu me dei, qai marautaki na nodrau vakawati.—Efeso 5:33.

 Levu na vanua e solia na matanitu na kaukaua vakalawa vei ira na italatala ni iVakadinadina i Jiova mera cakava na vakamau. Ni vakarau oti na ivunau rau na vosa bubului na vakamau, ena soli tale ga na mama. Sa na qai tukuna na italatala ni sa vakalawataki na nodrau vakawati.

 Eso na vanua e vinakati vakalawa me caka na vakamau ena valenivolavola ni matanitu. Oti sa na qai rawa ni caka na kena ivunau vakaivolatabu. Ke sega ni rau vosa bubului ena vakamau vakamatanitu, rau rawa ni cakava qori ni oti na ivunau vakaivolatabu. Ia ke rau sa vosa bubului oti ena vakamau vakamatanitu, rau rawa ni cakava tale qori ni oti na ivunau. Me kilai tale ga ena ka rau tukuna ni rau sa bubului oti. Ena tini na ivunau ena masu me kerei kina na Kalou me vakalougatataki rau na veiwatini vou.

 Levu na iVakadinadina i Jiova era vinakata me caka nodra vakamau ena Vale ni Soqoni ke rawa. b Ia ke rau vinakata na veiwatini me caka e dua na kena soqo se kanavata, ena lai caka ena dua tale na vanua.

 Ke caka na vakamau ena Vale ni Soqoni e rawa nira tiko kina na iVakadinadina i Jiova kei ira na sega ni iVakadinadina i Jiova. Oti ke caka na kena soqo ena vakatau sara ga vei rau na veiwatini o cei rau na sureta.

 E sega ni vakarautaki vakamatailalai na idusidusi me baleta na isulusulu ena vakamau e caka ena Vale ni Soqoni. Ia era na muria na iVakadinadina i Jiova na ivakasala vakaivolatabu, oya me rakorako na nodra isulusulu. Era na marautaka nira cakava tale ga qori eso tale. (1 Timoci 2:9) Ena muri tale ga na ivakavuvuli qori ke caka na soqo se kanavata ni vakamau.

 E uqeti keda na iVolatabu meda daulomasoli. (Same 37:21) Era marautaka na iVakadinadina i Jiova mera solia se ciqoma na iloloma ni vakamau. (Luke 6:38) Ia era sega ni dau kere iloloma, se mera kacivaka e matanalevu na yacadra na soli iloloma. (Maciu 6:3, 4; 2 Korinica 9:7; 1 Pita 3:8) Qori e sega ni vakaivolatabu, era na sega tale ga ni taleitaka na tiko ena vakamau.

 Sega. Era sega ni dau lave bilo ni vakanuinui vinaka na iVakadinadina i Jiova, baleta qori e yavutaki mai na ivakavuvuli lasu. c Ia era na tukuna ga vei rau na veiwatini vou nodra vakanuinui vinaka me rau marautaka nodrau bula vakawati.

 Sega. Eso na vanua era dau viritaka na raisi, tikitiki ni pepa, se so tale na ka vei rau na vakamau. Era vakabauta ni na kauta mai vei rau na kalougata, marau kei na bula balavu. Ia era sega ni cakava qori na iVakadinadina i Jiova ni sema tiko ina vakatevoro. E okati tale ga kina na vaqara kalougata ni sega ni salavata kei na ivakavuvuli vakaivolatabu.—Aisea 65:11.

 E sega ni dau caka na kana kei na gunu ena vakamau e Vale ni Soqoni. Eso na veiwatini era vinakata me caka qori ena vanua e caka kina nodrau soqo. (Dauvunau 9:7) Ke rau vinakata me vakayagataki na alakaolo rau na raica me vakarautaki vakarauta vei ira ga era yacova na yabaki ni bula e vakatarai vakalawa mera gunu—Luke 21:34; Roma 13:1, 13.

 E rawa ni rau digia na veiwatini na ivakatagi kei na danisi me caka ena nodrau soqo. (Dauvunau 3:4) Ena vakatau sara ga vei rau na ivakatagi rau digia, ia mera marautaka tale ga na sureti. Ena rogoci ena vakamau e Vale ni Soqoni na ivakatagi e yavutaki vakaivolatabu.

 E sega ni dua na ivakavuvuli vakaivolatabu e vakatabuya se vakadonuya na vakananumi ni vakamau. Ia rau na vakatulewataka ga na veiwatini iVakadinadina i Jiova me rau cakava qori se sega. Ke rau via vakananuma rau rawa ni cakava ga vakataki rau, se rau cakava kei ira nodrau itokani se vuvale.