Keimami yavutaka ena ivakavuvuli vakaivolatabu na neimami rai kei na ka me caka ena veibulu. Wili kina eso qo:

•   E sega ni cala na noda dau tagicaki ira na wekada lomani era sa takali. Ni mate na wekadratou lomani na tisaipeli, eratou tagi tale ga. (Joni 11:33-​35, 38; Cakacaka 8:2; 9:​39) Kena ibalebale eda sega ni raica na gauna ni veibulu me gauna ni marau. (Dauvunau 3:​1, 4; 7:​1-4) Ia eda raica qori me gauna ni lolosi.​—Roma 12:15.

•   Era sega ni kila e dua na ka na mate. Se mani vanua se matatamata cava era cavutu mai kina na iVakadinadina i Jiova, era na sega ga ni muria na ivakarau ni veibulu e vakabauti kina nira se bula tiko ga na mate, ra qai rawa ni cakava eso na ka vei ira na bula tiko. (Dauvunau 9:​5, 6, 10) E okati eke eso na ivakarau vakavanua me vaka na bikabika, me vakacerecerei kina o koya e mate, ivakananumi ni nona mate, cabo na ka vei ira na mate kere veivuke tale ga vei ira, vakatatabutaki na watidra kei na vakataraisulu. Eda na sega ni cakava na itovo va qori nida muria na ivakaro vakaivolatabu: “Ni tawasei kemuni, . . . ni kua ni tara tiko na ka e sega ni savasava.”​—2 Korinica 6:​17.

•   E tu nodra inuinui na mate. E kaya na iVolatabu ni na yaco na veivakaturi, kena ibalebale ni na yaco na gauna sa na oti vakadua na mate. (Cakacaka 24:15; Vakatakila 21:4) Qori ena vukei keda meda kua ni dau lolosi vakalevu, e yaga tale ga qori vei ira na lotu vaKarisito ena gauna e liu.​—1 Cesalonaika 4:​13.

•   E vakasalataki keda na iVolatabu meda dau yalomalumalumu. (Vosa Vakaibalebale 11:2) Eda vakavulici ni soqo ni veibulu e sega ni vanua me ‘dokadokataka kina e dua’ na iyau e tu vua kei na nona itutu vakavanua. (1 Joni 2:​16) Eda na sega ni tuvanaka e dua na veibulu levu me kena inaki na marau, me laurai kina na saulevu ni kisinimate, kei na daramaki ni sulu mera qoroi kina.

•   Meda kua ni suguraka noda vakabauta me baleta na veibulu vei ira tale na so. Na vuna? Nida muria na ivakavuvuli vakaivolatabu: “Eda na dui saumitaro vua na Kalou.” (Roma 14:12) Ia ke dua e taroga se cava na noda nanuma, meda vakamacalataka noda vakabauta ena “yalomalua kei na veidokai dina.”​—1 Pita 3:​15.

 Vanua e vakayacori kina: Ke ratou vinakata na vuvale me vakayacori na lotu ni veibulu, ena vakatau sara ga vei ratou na vanua me caka kina, me vaka ena Vale ni Soqoni, e vale, vale ni somate, se ena ibulubulu.

 Lotu ni veibulu: Cava soti ena vakamacalataki ena lotu ni veibulu? Ena vakamacalataka o koya e vunau na ka e kaya na iVolatabu me baleta na mate, kei na inuinui ni veivakaturi me vakacegui ratou na vuvale sa mai takali na wekadratou. (Joni 11:25; Roma 5:​12; 2 Pita 3:​13) Ena vakamacalataki tale ga kina na nona itovo vinaka o koya e mate, ena vakabibitaki kina na sala ena yaga kina vei keda na nona ivakaraitaki ni yalodina.—2 Samuela 1:​17-​27.

 Lagati na sere e yavutaki vakaivolatabu. (Kolosa 3:​16) Ena cava na lotu ni veibulu ena dua na masu me veivakacegui.​—Filipai 4:​6, 7.

 iLavo se soli: Ni caka e dua na itavi se soqo vakalotu, keimami na sega ni lavaka e dua na ilavo vei ira na lewe ni lotu. Okati kina na veibulu, sega ni dau caka tale ga na soli ena neimami gauna ni soqoni.​—Maciu 10:8.

 O cei mera lako yani: Era sureti tale ga na sega ni iVakadinadina mera mai rogoca na lotu ni veibuli ena Vale ni Soqoni ni iVakadinadina i Jiova. Me vaka ga na neimami veisureti ena soqoni, e dola raraba tale ga na veisureti ena vunau ni veibulu.

 Qori ena vakatau sara ga vei keimami yadua. Keimami na yavutaka neimami vakatulewa ena neimami lewaeloma e dusimaki vakaivolatabu. (1 Timoci 1:​19) Ia keimami na sega ni vakaitavi ena dua na soqo vakalotu keimami kila ni veisaqasaqa kei na iVolatabu.​—2 Korinica 6:​14-​17.