Keimami dokai ira na veimatanitu kei na nodra ivakatakilakila. Keimami kila ni so era na lagata na sere ni matanitu, se vakarokorokotaka na kuila.

 Ia keimami sega ni vakaitavi ena ka va qori ni keimami vakabauta ni veisaqasaqa kei na ivakavuvuli vakaivolatabu. Keimami marautaka nira doka eso tale na neimami vakabauta me vaka ga neimami dokai ira.

Ena ulutaga qo

•  Cava na kena ivakavuvuli vakaivolatabu?

•  Vakacava ke vakaroti ena lawa moni vakaitavi kina?

•  Vakacava e vakaraitaka qori ni oni veitovaki ena ka vakapolitiki se dua tale na ka?

 Qo e rua na ivakavuvuli vakaivolatabu keimami muria:

•   Me caka duadua ga vua na Kalou na sokalou. E kaya na iVolatabu: “E dodonu mo sokalou vei Jiova na nomu Kalou, me vakatabakidua vua na nomu veiqaravi tabu.” (Luke 4:8) Na sere ni matanitu e okati kina na nona tokona vakalevu e dua na nona matanitu. Qori na vuna keimami sega ni dau vakaitavi kina ena soqo e lagati kina na sere ni matanitu.

   Keimami kila tale ga na vakarokorokotaki ni kuila e okati me ivalavala ni sokalou, se qaravi matakau e vakatabuya na iVolatabu. (1 Korinica 10:14) Era kaya eso na daunitukutuku makawa, na kuila ni matanitu e ivakatakarakara ni lotu. E vola na daunitukutuku makawa o Carlton J. H. Hayes, a “na kuila e dua na tiki bibi ni vakabauta kei na sokalou.” E vola tale ga na dauvolaivola o Daniel P. Mannix me baleti ira na lotu vaKarisito taumada: “Era bese . . . ni vakacaboisoro na lotu vaKarisito me rokovi kina na empara [ni Roma], qo e via tautauvata nikua kei na nona sega ni via vakarokorokotaka na kuila e dua.” b

  Dina ni keimami sega ni vakarokorokotaka na kuila, ia keimami na sega ga ni vakacacana, vakama se keimami vakaraitaka e dua na sala me keimami beca kina.

•   Eda tautauvata kece na tamata ena mata ni Kalou. (Cakacaka 10:34, 35) E kaya na iVolatabu ni Kalou e “bulia na matatamata kece mai na dua ga na tamata.” (Cakacaka 17:26) Qori na vuna keimami vakabauta kina ni cala me vakalevulevui e dua na matatamata, se dua na matanitu mai vei ira eso tale. Keimami dokai ira na tamata kece, se mani vanua cava era cavutu mai kina.—1 Pita 2:17.

 Keimami sega ni dau saqata na matanitu. Keimami vakabauta ni “ituvatuva ni Kalou” nodra veiliutaki tiko na veimatanitu. (Roma 13:1-7) Keimami vakabauta tale ga ni dodonu meda talairawarawa vei ira na vakailesilesi vakamatanitu.—Luke 20:25.

 Vakacava ke vakaroti ena lawa mo vakaitavi ena dua na ka e sega ni vakadonuya na Kalou? Ena so na ituvaki, keimami na kerea ena mataveilewai me veisautaka na matanitu na lawa qori. c Ke sega ni vakadonui, keimami na vakaraitaka tiko ga ena veidokai ni keimami “talairawarawa ga vua na Kalou ni iliuliu, sega vua na tamata.”—Cakacaka 5:29.

 Sega, keimami sega ni veitovaki ena ka vakapolitiki, se dua tale na ka. Neimami sega ni lagata na sere ni matanitu se vakarokorokotaka na kuila, e sega ni kena ibalebale me keimami uqeta na vakaduiduile ena ka vakapolitiki. Ia keimami muria ga na ka e kaya na iVolatabu me baleta na soqo va qori.