Ke o sega ni taleitaka na vuli, e rawa ni tiko na vuna e va kina qori nomu rai. a De dua era dau yalodredre na qasenivuli, nodra veivakamuai na itokani, veitarogi e vakamosi ulu qai levu na cakacaka ni vuli me caka i vale. E kaya e dua na itabagone o Rachel b:

 “E vinaka cake meu gole ina dua tale na vanua mai na lako i koronivuli. Meu gade i baravi kei ira noqu i itokani, se veivuke na vakasaqa kei na sasamaki vei rau noqu itubutubu!”

 Ke tautauvata nomu rai kei Rachel, kena ibalebale nomu gauna ni vuli e vaka ga o vesu tu. Ia ena vinakati mo vosota tiko me yacova ni oti nomu vuli. Vakacava e tiko e dua na sala vinaka e rawa ni donu kina nomu rai me baleta nomu tiko e koronivuli?

 O bau kila? Ke donu nomu rai me baleta na vuli, o na lewa vinaka na kemu ituvaki qai kua ni raica na vuli me vakatovolei kina na nomu vosota. E yaga dina na vuli ni na vakavinakataka nomu taledi, qai vakarautaki iko ena gauna se bera mai.

 Mo bucina na rai donu me baleta na vuli, qo eso na ka mo vakasamataka:

 Nomu lai vuli. Na levu ga ni ka o vulica ena rawa ni vukei iko mo walia nomu leqa ena gauna o sa cakacaka kina, kei na so tale na ka. O na sega ni vakararavi vei ira eso tale. Mo taroga, ‘Keu sega ni taleitaka eso na ka e koronivuli, ena rawa ni yaga vakacava vei au na ka au sa vulica tiko?’

 iVakavuvuli vakaivolatabu: “Mo taura matua na vuku kei na raiyawa.”​—⁠Vosa Vakaibalebale 3:⁠21.

 Nomu itovo. Na veika o vulica e koronivuli, e rawa ni vukei iko mo vakayagataka vinaka nomu gauna, lewai iko vinaka qai gugumatua ena cakacaka. Qori na itovo ena vinakati ni o sa uabula. Mo taroga: ‘Sala cava e vukei au kina na ka au vulica e koronivuli meu lewai au vinaka, qai gugumatua ena cakacaka? Cava eso na ka au rawa ni vakavinakataka?’

 iVakavuvuli vakaivolatabu: “E yaga na cakacaka kaukaua kece.”​—⁠Vosa Vakaibalebale 14:⁠23.

 Nomu veimaliwai. Na nomu veimaliwai kei ira nomu itokani e koronivuli ena vukei iko mo dauveinanumi qai veidokai. E kaya e dua na cauravou o Joshua: “E bibi mo kila na sala mo veivosaki kina kei ira eso, baleta qori e vaka ga ni o vulica na lesoni me vaka na history kei na science. Na ivakarau qori ena yaga ena nomu bula taucoko.” Mo taroga, ‘Na lesoni cava e koronivuli e vukei au meu veimaliwai vinaka kei ira eso tale e duidui na nodra isususu se nodra vakabauta?’

 iVakavuvuli vakaivolatabu: “Saga moni veiyaloni kei na tamata kece.”​—⁠Iperiu 12:⁠14.

 Nomu veigauna se bera mai. Na vuli ena vukei iko mo kila na ka o vinaka kina, kei na ka mo cakava mo rawata nomu isausau. E kaya e dua na goneyalewa o Brooke: “Me vakataki au ga, o rawa ni vakavulici ena cakacaka baleta ni oti nomu vuli sa rawa ni o cakacaka sara.” Mo taroga: ‘Sala cava au na tokoni au ni oti noqu vuli? Au na vakadeitaka vakacava ni ka au vulica ena rawa ni dua kina noqu cakacaka?’

 iVakavuvuli vakaivolatabu: “Mo kila na vanua o lako tiko kina.”​—⁠Vosa Vakaibalebale 4:​26, Contemporary English Version.