Wilika na ka e yacovi Karina, qai vakasamataka ke yacovi iko. Na cava o na cakava ena ituvaki qo?

Karina: “Au a draiva tiko vakatotolo niu gole i koronivuli, e tarovi au e dua na ovisa qai solia vei au e dua na tikite. Au rarawa sara ga! Au tukuna vei Na qai tukuna vei au meu tukuna vei Ta, na ka au sega ni via cakava.”

Cava o na cakava?

1. A: Galu ga me kua ni kila o Ta.

2. B: Tukuna vei Ta na ka e yaco.

O na rawa ni temaki mo digia na kena imatai. De dua ena nanuma o Na ni o sa tukuna oti vei Ta. Ia e tiko na vuna vinaka mo vakaraitaka kina nomu cala, ke tarovi iko na ovisa se dua tale na ka.

1. 1. E dodonu mo cakava. E kaya na iVolatabu me baleti keda na lotu vaKarisito: “Keitou vinakata me keitou dina ena ka kece.”​—Iperiu 13:⁠18.

   “Au saga meu dau dina qai nuitaki, meu vakaraitaka totolo tale ga na cala au cakava.”​—Alexis.

2. 2. Ena rawarawa mo vosoti ni o vakaraitaka nomu cala. E kaya na iVolatabu: “O koya e ubia na nona cala ena sega ni rawaka, ia o koya e vakatusa qai biuta ena lomani.”​—Vosa Vakaibalebale 28:13.

   “Ena vinakati na yaloqaqa mo vakaraitaka nomu cala, o na nuitaki kina. Era na kila ni o dau dina. Ni o vakaraitaka nomu cala, o na vinaka kina.”​—Richard.

3. 3. Ni taleitaka na Kalou o Jiova. E kaya na iVolatabu: “Ni sevaka o Jiova na tamata lawakica, ia e veitokani voleka kei ira na yalododonu.”​—Vosa Vakaibalebale 3:​32.

   “Niu cala bibi, au liaca ni dodonu meu vakaraitaka. Ena vakalougatataki au ga o Jiova keu cakava na ka e vinakata.”​—Rachel.

E walia vakacava o Karina nona cala? A sega ni via vakaraitaka vei nona Ta na tikite e solia na ovisa. Ia e sega ni rawa ni vunitaka tiko ga. E kaya, “Ena yabaki e tarava ni dikeva o Ta na neitou inisua, e raica ni tiko kina e dua na tikite ni draiva e volai ena yacaqu. Au gunu wainibele kina, e rarawa mada ga o Na niu sega ni cakava na ka e kaya!”

Lesoni: E kaya o Karina: “Ni o vunitaka nomu cala o na rarawa kina. O na qai sauma vakamalua!”

Eda dau cala kece. (Roma 3:​23; 1 Joni 1:⁠8) Me vaka eda sa raica mai nida yalomalumalumu da qai yalomatua, eda na vakaraitaka vakadodonu noda cala.

Na ka mo cakava tarava, mo vuli kina. Ka ni rarawa ni levu na itabagone era sega ni cakava qori! De dua era vakataki Priscilla ni kaya: “Dau vakayalolailaitaki au na noqu cala. Au dau beci au, na noqu cala e vaka e dua na icolacola bibi au sega ni cola rawa. Au yalolailai sara ga.”

Vakacava, e dau va tale ga qori nomu rai ena so na gauna? Ke dina, nanuma qo: Ke o vakasamataka tiko ga nomu cala makawa, e vaka ga ni o draiva tiko o qai rai tiko i muri. Ena vakayalolailaitaki iko se vakamalumalumutaki iko ni o vakasamataka tiko ga nomu cala makawa.

Vakacava mo saga me donu nomu rai?

“Vakasamataka nomu cala makawa qai vuli kina. Ia kua ni vakasamataka vakasivia ni na vakayalolailaitaki iko.”​—Elliot.

“Au saga meu vuli ena noqu cala meu vinaka kina, meu kila tale ga na ka meu cakava niu sotava tale na ituvaki qori. E ka vakayalomatua qo.”​—Vera.