RA TAROGA NA ITABAGONE
Na Cava Meu Kila me Baleta na Vakauitukutuku?
:-) Ke yalomatuataki na vakauitukutuku ena talevoni, ena yaga dina ena veivosaki.
:-( Ke sega ni yalomatuataki, ena vakaleqa nomu veimaliwai kei na kemu irogorogo.
Ena vakamacalataki ena ulutaga qo na ka mo kila me
E vakamacalataki tale ga ena ulutaga qo:
O koya o vakauitukutuku kina
Era tukuna e levu na itabagone ni sala vinaka duadua ni veivosaki na vakauitukutuku. O na veivosaki kina kei na dua, se o ira kece e tiko vei iko na yacadra, vakavo ke rau sega ni vakadonuya na nomu itubutubu.
“E sega ni taleitaka o Ta me keirau vosa vakaveitacini vei ira na tagane. Ke keirau vosa vei ira, me keirau vakayagataka na talevoni e lomanivale, mera tiko tale ga kina eso.”—Lenora.
Ka mo kila: Ke o solia vakaveitalia na nomu naba, o na leqa kina.
“Ke o sega ni qarauna o cei soti e kila na nomu naba, o na rawa ni taura eso na itukutuku se itaba o sega ni taleitaka.”—Semi.
“Ke o dau vakauitukutuku wasoma vua e dua na tagane ke o yalewa, se vua e dua na yalewa ke o tagane, ena totolo wale ga nomu vinakati koya.”—Sitiveni.
E kaya na iVolatabu: “O koya sa yalomatua sa kunea na ca, ka sa vunitaki koya.” (Vosa Vakaibalebale 22:3) Ni o qaqarauni, o na sega ni rarawa kina.
iTalanoa dina: “Au veitokani kei na dua na cauravou, au dau vakauitukutuku vua, e dau vakauitukutuku tale ga mai vei au. Au vakasamataka ni keirau veitokani vinaka. Au nanuma ni sega ni dua na kena ca qori, ia e qai tukuna ni sa vinakati au tiko. Niu raica lesu, au liaca ni a sega ga ni dodonu meu vakailala vata kei koya, seu vakauitukutuku vua ena levu na gauna.”—Melinda.
Vakasamataka mada: Na cava o nanuma, ena vakaleqa na nodrau veimaliwai o Melinda kei na cauravou qori ni sa kila na lomana?
Vola tale na italanoa! Na cava e rawa ni cakava o Melinda me rau veitokani tiko ga kina kei na cauravou ya?
iTukutuku o vakauta
E rawarawa sara na vakauitukutuku da qai marautaka na wilika, ia eda guilecava ni rawa ni tauri cala na kena ibalebale.
Ka mo kila: E rawa ni tauri cala na itukutuku e vakau.
“Na vakauitukutuku e sega ni kilai kina na ivakarau ni yalo se rorogo ni domo, wili kina na ivakatakilakila se droini e vakaraitaka na kena ituvaki o koya e vakauta. E rawa ni vakavu veilecayaki.”—Virisila.
“Au kilai ira na goneyalewa e ca na kedra irogorogo ra qai wedewede nira vakauitukutuku vei ira na tagane.”—Laura.
E kaya na iVolatabu: “Na tamata vinaka era dau vakasama ra qai vosa.” (Vosa Vakaibalebale 15:28, Good News Translation) Na cava eda vulica eke? Mo wilika tale nomu itukutuku qai vakauta!
Gauna o vakauitukutuku kina
Ni o vakayagataka nomu vakasama, o na biuta eso na lawa ni nomu vakauitukutuku, era tukuna eso me itovo vinaka ni vakauitukutuku.
Ka mo kila: Ke o sega ni qarauna na ivakarau ni nomu vakauitukutuku, o na veibeci, o na sega ni taleitaki.
“E rawarawa mo guilecava na itovo vinaka ni vakauitukutuku. Niu veitalanoa tiko kei na dua seu kana, au vakauitukutuku tale tiko ga ena gauna qori.”—Alisi.
“E rerevaki ni o draiva o qai vakauitukutuku tiko. Ke gole tani na matamu me kua ni raica na gaunisala, o na rawa sara ga ni coqa.”—Anne.
E kaya na iVolatabu: “E vagauna na ka kece ga, . . . na gauna ni tiko lo kei na gauna ni vosa.” (Dauvunau 3:1, 7) E okati kina na vakauitukutuku me vaka ga na veivosaki!
iVakasala me baleta na vakauitukutuku
Koya o vakauitukutuku kina
;-) Talairawarawa ena ka rau tukuna na nomu itubutubu—Kolosa 3:20.
;-) Yalomatuataka o cei o solia kina nomu naba ni talevoni. Ni o tukuna ena yalovinaka ni o sega ni via solia na itukutuku me baleti iko, wili kina nomu naba ni talevoni, o sa bucina tiko na itovo ena yaga ni o sa tamatabula.
;-) Kua ni vakauta na itukutuku ni wede. Ke o wedevi koya, ena kauta ga mai na rarawa.
“Au saga me vinaka noqu veimaliwai kei rau na noqu itubutubu ena kena vakayagataki noqu talevoni, rau nuitaki au gona meu vakatulewa vakayalomatua ena naba au maroroya ena noqu talevoni.”—Virisila.
iTukutuku o vakauta
;-) Ni bera ni o tabaka nomu itukutuku, taroga mada, ‘E vinaka meu vakauitukutuku ena ituvaki qo?’ De vinaka mo qiri, se drau veivosaki.
;-) Kua ni vakauta na itukutuku o na sega ni cavuta e matanavotu. E kaya o Sera sa yabaki 23, “Ke o sega ni cavuta me rogo, e sega ni dodonu me vakau ena talevoni.”
“Ke dua e vakauta yani vei iko na iyaloyalo ca, tukuna vei rau na nomu itubutubu. Ni o cakava qori ena taqomaki iko, rau na nuitaki iko tale ga na nomu itubutubu.”—Sireli.
Ni o vakauitukutuku
;-) Vakasamataka rawa na gauna mo kua ni vakayagataka kina nomu talevoni. E kaya o Olivia, “Au sega ni kauta noqu talevoni ena gauna ni kana, vuli iVolatabu se vuli lesoni. Au dau bokoca ena gauna ni soqoni vaKarisito meu kua ni temaki meu raica.”
;-) Mo dauveinanumi. (Filipai 2:4) Kua ni vakauitukutuku ni drau veivosaki tiko kei na dua.
“Au biuta eso na lawa meu muria me vaka na vakauitukutuku niu tiko vata kei ira na noqu ilala, vakavo ke bibi. Au sega tale ga ni dau solia noqu naba vei ira au sega ni kilai ira vinaka.”—Jieni.
Rawa ni o Wilika Tale ga
KA ERA KAYA NOMU ICABA
Ka Era Kaya na iTabagone me Baleta na Mobail
Era kila e levu na itabagone ni tiko tale ga ena mobail e levu na sala ni veikilai. Na cava na kena vinaka kei na kena ca?
DROINI YAVALA
Qaqarauni ni o Vakailala ena Internet
Qaqarauni ni o veivosaki kei ira na nomu ilala ena internet.
RA TAROGA NA ITABAGONE
E ka ni Lasa na Wede?
Na cava mada na wede? Cava era wede kina eso? Na cava e rerevaki kina?
RA TAROGA NA ITABAGONE
Na Cava e Vauci ena Vakauitukutuku Vakasisila?
O dau vakasaurarataki mo vakauitukutuku vakasisila? E ca na vakauitukutuku vakasisila? Qo beka na wede e sega ni ca?
YADRA!
Veidokai ni o Vakauitukutuku
Vakacava e veibeci ke o wilika na itukutuku e vakau mai vei iko ni drau se veitalanoa tiko kei na dua? Se veibeci ke mo kua ni wilika na itukutuku qori, ia mo tomana tiko ga nomudrau veitalanoa?
