Ni o cega na iVolatabu, o na raica ni levu na vosa e tu kina. Qori me kua ni tarova na nomu wilika! Ia mo raica na iVolatabu me vaka e dua na teveli e bini tu kina na veimataqali kakana. O na sega ni rawa ni kania kece. Ia o na rawa ni digia na kakana ena rauti iko.

 Me rawa ni yaga nomu wili iVolatabu, ena vinakati me dei na nomu vakasama ena veika o wilika. Ena vukei iko kina na ulutaga qo.

Ena ulutaga qo

•  Cava mo vakasamataka kina na ka o wilika ena iVolatabu?

•  Ena yaga vakacava nomu wili iVolatabu?

•  Ka era kaya nomu icaba

 Na levu ga ni nomu sasaga mo wili iVolatabu, o na vakila na kena yaga. Vakasamataka mada na ivakatautauvata qo: Ena waicala na ti ke toni ga vakalekaleka ina wai katakata. Ia ena sosoko, ke toni vakadede.

 E va tale ga qori na wili iVolatabu. Mo kua ni wilika ga vakatotolo, mo vakayagataka na gauna mo vakasamataka kina na ka o wilika. Qori na ka e cakava o koya e vola na Same 119. E kaya me baleta na lawa ni Kalou: “Au vakasamataka vakabibi ena siga taucoko.”—Same 119:97.

 E sega ni kena ibalebale qori mo vakayagataka e dua na siga taucoko mo wilika qai vakasamataka na iVolatabu. Qo na ka me nanumi: E vakayagataka na gauna na daunisame me vakasamataka kina na Vosa ni Kalou. Qori e vukei koya me vakatulewa vinaka.—Same 119:98-100.

 “E tukuna vei au o Na, ‘Ena dua na macawa, e vitu na siga. O cakava kina e levu na ka me baleti iko. Vakacava mo solia eso nomu gauna vei Jiova? E dodonu ga mo cakava qori!’”—Melanie.

 Ni o vakasamataka vakabibi na vakavuvuli vakaivolatabu, o na rawa ni vakatulewa vinaka. Kena ivakaraitaki, ni o digia nomu itokani se ni o temaki mo cakava e dua na ka e cala.

•   Me dua na ituvatuva. E kaya e dua na goneyalewa o Julia, “Mo vakarautaka nomu ituvatuva ni wili iVolatabu. Mo sa kila rawa tu na wase mo wilika, na gauna o na wilika kina, kei na vanua o na wili iVolatabu kina.”

•   Kua na veivakasosani. E kaya e dua na marama o Gianna, “Mo qara e dua na vanua e vakanomodi. Rawa ni o vakaraitaka vei ratou e vale na nomu ituvatuva ni wili iVolatabu. Ratou na sega kina ni vakasosataki iko.”

   Ke o vakayagataka tiko e dua na iyaya vakalivaliva, porokaramutaka me kua ni veivakasosani. O rawa tale ga ni vakayagataka na iVolatabu tabaki. E laurai mada ga ena vakadidike, ni na matata sara na veika eda wilika nida vakayagataka na ivola tabaki. Ia ena rawa ni dredre me dei ena noda vakasama na veika eda wilika ke da vakayagataka na talevoni se tablet.

   “E dau tini koso ga noqu wiliwili niu vakayagataka na iyaya vakalivaliva. E rawa ni vakau mai eso na itukutuku, maca na kena batiri se leqa na internet. Ia au na sega ni leqataka qori niu vakayagataka na ivola tabaki. Ena vinakati ga me rarama vinaka na vanua au wiliwili kina.”—Elena.

•   Tekivu ena masu. Kerei Jiova me matata, mo nanuma qai yaga vei iko na wase ni iVolatabu o na wilika.—Jemesa 1:5.

   Me rawa ni salavata na ka o cakava kei na ka o masulaka, mo vakekeli vakatitobu ena wase ni iVolatabu o wilika. O na cakava vakacava qori? Ke o vakayagataka tiko na JW Library se o wili iVolatabu ena internet, o na rawa ni qara ena tikinivolatabu na ivakamacala se ulutaga ena vakamatatataka vei iko.

•   Taro mo taroga. Kena ivakaraitaki: ‘Na cava au vulica me baleti Jiova ena veika au wilika qo ena iVolatabu? Au vulica kina e dua na itovo i Jiova au na via vakatotomuria?’ (Efeso 5:1) ‘Na cava au vulica, au na vakatotomuria vakacava?’ (Same 119:105) ‘Au na vakayagataka vakacava na veika au wilika meu vukei ira kina eso tale?’—Roma 1:11.

   Mo taroga, ‘E veisemati vakacava na ka au wilika kei na usutu ni iVolatabu?’ E bibi dina na taro qori. Na vuna? Ni ka kece e volai ena iVolatabu—mai na Vakatekivu ina Vakatakila—e veisemati ena dua ga na usutu bibi: Na sala ena vakacerecerea kina o Jiova na yacana ni vakayagataka na nona Matanitu qai vakadinadinataka ni dodonu na nona veiliutaki, e uasivi tale ga.