Na itovo vinaka ena yaga ena vica na tikina qo:

1. Kemu irogorogo. Ena vakatau na kemu irogorogo ena nomu itovo. Ke o dau vakaitovo ena kila ni o matua o qai nuitaki, qori tale ga na ka ena caka vei iko! Ke o dau veibeci ena kilai ni o nanumi iko ga, o na calata kina eso na ka vinaka, ena sega ni dua na nomu cakacaka saumi. E kaya na iVolatabu, “o koya e yaloca e vakamaduataki koya ga.”​—Vosa Vakaibalebale 11:17; vmr.

2. Nomu itokani. E kaya na iVolatabu: “Moni sulumaka na loloma ni qo na ivau vinaka duadua ni duavata.” (Kolosa 3:​14) E dina qori nida vakaitokani. Eda na taleitaki nida vakaitovo da qai veikauaitaki. O cei ena via vakaitokani kei na dua e dau veibeci se itovo ca?

3. Nodra itovo vei iko. E kaya e dua na goneyalewa o Jennifer, “Ke o dau vakarokoroko, lakolako era na rokovi iko tale ga o ira na dau veibeci.” E macala gona, ke o dau veibeci, o na rawa ni beci tale ga. E kaya na iVolatabu: ‘Na ivakarau dou vakarautaka ena vakarautaki tale vei kemudou.’​—Maciu 7:⁠2.

Ka e macala: Eda dau veimaliwai ena veisiga. Ena vakatau gona na kemu irogorogo ena nomu itovo. Kena itukutukuni rawarawa ga, e bibi mo vakaitovo!

1. Dikeva nomu itovo. Mo taroga: ‘Au dau rokovi ira na qase vei au? Au dau cavuta na “kerekere,” “vinaka,” se “vosoti au”? Niu veivosaki tiko, e dau vakawelei au na vakauitukutuku ena talevoni? Au dau dokai rau na noqu itubutubu kei ratou na taciqu, seu vakawaleni ratou ni “keitou vuvale vata ga”?’

   E kaya na iVolatabu: “Ni dau liu ena nomuni veirokorokovi.”​—Roma 12:⁠10.

2. Biuta nomu isausau. Vola e tolu na ka mo cakava. Kena ivakaraitaki, e kaya o Alisi sa yabaki 15, ni bibi “meu dau vakarorogo vinaka meu kua ni vosa tu ga.” E kaya o Tevita sa yabaki 19, ena saga sara ga me kua ni dau vakauitukutuku ni ratou tiko vakavuvale, se tiko kei ira na nona itokani. E kaya ni “itovo veibeci, e vakaraitaka niu sega ni via vosa vei ira.” E kaya o Etuate sa yabaki 17, ni saga me kua ni dau vosa takoso ni vosa tiko e dua. O Jennifer, sa tukuni oti, e vakadeitaka me vakavinakataka nona itovo ni maliwai ira na itabaqase. E kaya, “Au dau vakabula ga vei ira, e totolo sara noqu lako vei ira na noqu icaba. Ia qo au saga meu kilai ira vinaka na itabaqase. Qori e vakavinakataka na noqu itovo!”

   E kaya na iVolatabu: ‘Kua ni kauaitaka ga na ka e baleti kemuni, ni kauaitaka tale ga na ka e baleti ira tale eso.”​—Filipai 2:4.

3. Dikeva na ka o sa rawata. Ena loma ni dua na vula, vakalewa nomu vosa se itovo mo vakavinakataka. Ni cava na vula, mo taroga: ‘Na ka vinaka cava au raica niu vakaitovo? Na cava tale meu vakavinakataka?’ Biuta eso tale nomu isausau.

   E kaya na iVolatabu: ‘Na ka oni vinakata mera cakava vei kemuni na tamata, moni cakava tale ga vei ira.’​—Luke 6:31.