Voleka ni vuvale kece e tiko na kena lawa me vaka na gauna mo yaco kina e vale, na gauna mo vakayagataka kina na iyaya vakalivaliva, kei na veika me baleta na itovo.

 Vakacava ke o beca e dua vei ira na lawa qori? O na sega ni veisautaka na ka sa yaco, ia e tiko na ka o rawa ni cakava me vinaka kina na ituvaki. O na raica qori ena ulutaga qo.

•  Ka mo kua ni cakava

•  Ka o rawa ni cakava

•  Ka era kaya nomu icaba

•   Ke rau sega ni kila nomu itubutubu ni o beca e dua na lawa, ena rawa sara ga ni o ubia na nomu cala.

•   Ke rau kila ni o beca e dua na lawa, ena rawarawa sara ga ni o soli ulubale se o beitaka e dua.

 Erau sega ni vakasama vinaka ruarua qori. Na vuna? E sega ni ivakaraitaki ni yalomatua ke o ubia nomu cala se o soli ulubale. O vakaraitaka tiko ga vei rau nomu itubutubu ni o se yalowai.

 “E sega ni iwali ni leqa na lasu. Toso na gauna rau na qai kila na ka dina nomu itubutubu, ena qai sasa sara na ka o vakila. Ke vinaka cake ga mo tukuna vei rau na ka dina ena imatai ni gauna.”—Diana.

•   Tukuna vakadodonu na ka o cakava. E kaya na iVolatabu: “O koya e ubia na nona cala ena sega ni rawaka.” (Vosa Vakaibalebale 28:13) Erau kila nomu itubutubu ni na sega ni donu tu ga na ka o cakava. Qo ga na ka mo vakasamataka, Vakacava o na tukuna na ka dina?

   “Erau na vosoti iko nomu itubutubu ke o tukuna na ka dina. Ni o daudina, erau na qai nuitaki iko ga vakalevu.”—Olivia.

•   Kere veivosoti. E kaya na iVolatabu: “Moni sulumaka . . . na yalomalumalumu.” (1 Pita 5:5) Ni o yalomalumalumu o na kaya “vosoti au,” o na sega tale ga ni soli ulubale.

   “O ira na dau soli ulubale, ni toso na gauna sa na sega ni dua tu na ka vei ira na cala era cakava. Era sa na sega mada ga ni kauaitaka na nodra cala.”—Heather.

•   Ciqoma na kemu itotogi. E kaya na iVolatabu: “Moni rogoca na ivakavuvuli.” (Vosa Vakaibalebale 8:33) Kua tale ni tukuna e levu na ka, ciqoma ga kemu itotogi mai vei rau na nomu itubutubu.

   “Ena qai kuria ga na leqa ke o vosakudrukudrutaka na kemu itotogi. Vaqara na sala mo rawa kina ni ciqoma na kemu itotogi qai kua ni kauaitaka vakasivia na vakatatabu e caka vei iko.”—Jason.

•   Saga mo nuitaki tale. E kaya na iVolatabu: “Moni biuta tani na tamata makawa me vaka na nomuni itovo makawa.” (Efeso 4:22) Saga mo cakava tale na ka vinaka, me rawa ni nuitaki iko kina na nomu itubutubu.

   “Rau na nuitaki iko tale na nomu itubutubu, ke o dau vakatulewa vakavuku, rau raica tale ga ni o sega ni vakaruataka na nomu cala.”—Karen.

 VAKATUTU: Saga sara vakaukaua me rau nuitaki iko tale na nomu itubutubu. Kena ivakaraitaki, ni o lako tale ena dua na gauna, qiritaka rawa mai vei rau ni o sa gole tiko yani i vale, ke o sega mada ga ni bera. Qori e vaka ga ni o tukuna tiko vei rau, ‘Au vinakata mo drau nuitaki au tale.’