E vakamacalataki ena iVolatabu na itinitini ca ni lokuyara. E kaya: “O koya e vakaraica tiko na cagi ena sega ni kaburaka na sorenikau, kei koya e raica tiko na o ena sega ni tatamusuki.”​—Dauvunau 11:4.

 Raica mada qo e vica na ka e rawa ni vakavuleqa kei na ka mo cakava mo kua kina ni dau lokuyara.

 Cola na itavi, e dau rawarawa meda vuturi ni levu na itavi. Qo e vica na vakasama vinaka.

•   Wasewasea vakalalai. E kaya e dua na goneyalewa o Melisa, “Keu kila mada ga niu sa bera, au saga meu tobotobo niu vakaotia mada e dua qai dua tale.”

•   Tekivu totolo. “Tekivu sara ena gauna ga e soli kina vei iko na itavi, o rawa ni vola ena vanua o dau vola kina na ka me caka, se vakavola eso na vakasama ni bera ni o guilecava.”​—Vera

•   Kere veivuke. De dua erau sotava tale ga na nomu itubutubu na leqa qo se o ira na nomu qasenivuli. Ena yaga na nodratou vakatutu. E rawa nira vukei iko mo tuvana na vakasama qai biuta na nomu ituvatuva.

 iVakasala “Me dua na ituvatuva. E vinakati mo tuvana qai muria, io e yaga dina, ni o vakaotia kina na ka e dodonu me vakaoti.”​—Abbey.

 Levu na gauna ena vakaocai iko na itavi o qarava. Na cava gona me caka mo taleitaka kina na itavi qori? Tovolea mada qo.

•   Nanuma na vuna mo vakatotolotaka kina. Kena ivakaraitaki, vakasamataka mada na nomu marau ni o sa vakaotia. E kaya o Amy, “Dua na ka noqu marau niu vakaotia rawa e dua na ka ena kena gauna, seu vakaotia totolo meu qai cegu.”

•   Vakasamataka na kena ca. Ni o vakaberabera, o na kuria ga nomu lomaocaoca, o na lai nanuma kina ni o sa sega ni rawata. E kaya na iVolatabu: “O na tamusuka ga na ka o tea.”​—Kalatia 6:​7, Good News Translation.

•   Nanuma ni sa voleka na tikinisiga. E kaya o Alisi, “E uqeti au meu raitayaloyalotaka ni sa na oti na cakacaka ni vo e dua se rua na siga ni bera na siga lokuci. Au na rawa ni raica tale ni vo e dua se rua na siga.”

 iVakasala “E vinakati ga mo vakasama. Mo nanuma ni o na cakava na ka e dodonu me caka, me kua ni dua na ka me tarova. Niu cakava qori, e caka rawa kina na ka e dodonu me caka.”​—Alexis.

 “E kequ ikacivi na dau lokuyara,” e kaya o Necani, “ia e sega ni dodonu me va qori! Era sega ni kila niu dau osooso!” Ke o dau vakataki Necani, tovolea mada na ivakasala qo.

•   Cakava rawa na itavi rawarawa. E kaya e dua na goneyalewa o Amber, “Au vakavulici ena dua na gauna ke rawa ni vakaoti e dua na itavi ena loma ni lima na miniti, e dodonu ga mo cakava. E wili kina na sasamaki, lili isulu, sava veleti, se qiri.”

•   Vakaliuca na ka e bibi. E kaya na iVolatabu: ‘Vakadeitaka na veika era bibi sara.’ (Filipai 1:10) O na muria vakacava qori e veisiga? E kaya o Anna, “Au dau vola na itavi kece me caka kei na gauna me oti kina. Ia e bibi sara meu vola na gauna meu cakava kina, kei na gauna meu vakaotia kina na itavi yadua.”

 Vakacava e yalana nomu galala? Vakasamataka mada qo! Ni dua na nomu ituvatuva o na lewa kina na nomu gauna, ena sega ni lewai iko. Qori ena vakalailaitaka nomu lomaocaoca. E kaya e dua na goneyalewa o Kelly, “Au vakacegu qai donu na noqu rai ni tiko na noqu ituvatuva.”

•   Kua ni dua na ka me vakalatilati. E kaya o Jennifer, “Au dau tukuna vei ratou kece na tiko e vale na gauna meu cakava kina noqu ka ni vuli. Ke ratou vinakata meu cakava e dua na ka, au kerea me ratou tukuna rawa vei au niu se bera ni tekivu. Au bokoca tale ga noqu talevoni kei na imeli.”

 iVakasala “Ena vakaoti na ka me caka ke o cakava sara ga. Mo kua ni vakasamataka tiko ga, ia mo cakava sara. Ni o cakava qori o na vakacegu ena vo ni siga.”​—Jordan.