“Ni vosa tiko o qasenivuli au dau raici ira noqu lewenikalasi era dabe tu ga, sega nodra ivola, ra qai rogo vakatagi tiko ena kena irogorogo. Era dau vaqaqa na vuna era sega ni rawata kina nodra veitarogi. Ia eso tale vakai au era vuli lesoni vakalevu era sega tiko ga ni rawata na maka vinaka ena veitarogi. Sega ni macala na vuna e va kina ya. Au sega ni marautaka meu vuli lesoni tu yacova na bogi levu, qai sega ni rawata noqu veitarogi.”—Yolanda.

 Vakacava o dau vakila tale ga qori? E veivakayalolailaitaki dina nida sega ni rawata na maka vinaka ena veitarogi.

 Eso na gonevuli era na rairai soro koso nira sega ni rawata na maka vinaka ena veitarogi. De dua eso tale era na biu vuli sara ga. O na rairai nanuma mo cakava ruarua qori, ia e tiko na sala mo walia kina na leqa qo. Dikeva mada qo e lima na sala mo rawata na maka vinaka.

•  Ka mo cakava

•  Ka era kaya nomu icaba

•   Tiko ena kalasi kece. O na rairai nanuma ni o sa kila tiko qori, ia o na sega ni rawata na maka vinaka ke o calata e levu na kalasi.

   “E noqu koronivuli, era dau vakalutu vuli o ira sara ga era sega ni kauaitaka nodra maka ni veitarogi. E ikuri ga ni leqa.”—Matthew.

   iVakavuvuli vakaivolatabu: “Na ka kece ena kaburaka e dua, ena tamusuka tale ga.”—Kalatia 6:7.

•   Vakarorogo vinaka ena gauna ni kalasi. E vinaka mo tiko sara ga ena kalasi, qai vakarorogo vinaka sara. Vola na ka o vulica. Saga mo kila vinaka tale ga na ka e tukuna tiko o qasenivuli. Ke vakatarai mo taro ena gauna ni kalasi, cakava sara.

   “Ni caka tiko na kalasi au na taroga e levu na taro, niu kila ena vakamacalataka vinaka o qasenivuli na ulutaga ya ke sega ni matata vua e dua na gonevuli.”—Olivia.

   iVakavuvuli vakaivolatabu: “Dau vakarorogo vinaka.”—Luke 8:18.

•   Kua ni lawaki. E veidabui na lawaki. E levu na sala o rawa ni lawaki kina e koronivuli. Dua ya, nomu kopitaka nona cakacaka e dua tale. O na sega kina ni vulica e dua na ka.

   “Ke o sega ni kila e dua na ka ena gauna ni veitarogi, kua ni kopitaka nona isaunitaro e dua tale na gonevuli. O na sega ni vulica e dua na ka ni o lawaki. Saga gona mo walia vakataki iko nomu leqa, kua ni vakanuinui vei ira eso tale.”—Jonathan.

   iVakavuvuli vakaivolatabu: “Cakava vinaka nomu cakacaka, o na qai marau kina vakalevu.”—Kalatia 6:4, Contemporary English Version.

•   Me bibi duadua nomu lesoni e caka e vale. Ke rawa, cakava rawa nomu lesoni e vale qai muri na ka ni veivakamarautaki. a O na marautaka vakalevu nomu gauna galala ke sa caka oti nomu lesoni e vale!

   “Bibi duadua vei au meu cakava noqu lesoni e vale, ni toso cake kina noqu maka ni veitarogi. Niu yaco i vale, au dau vinakata meu moce vakalailai se vakarogo sere. Au na saga ga meu cakava rawa noqu lesoni e vale, meu kua kina ni lomaleqa.”—Calvin.

   iVakavuvuli vakaivolatabu: “Vakadeitaka na veika era bibi sara.”—Filipai 1:10.

•   Kere veivuke. Kua ni madua ni kerea nodra veivuke eso tale. Kere ivakasala vei rau nomu itubutubu. Tarogi nomu qasenivuli tale ga na sala mo rawata kina na maka vinaka ena veitarogi. Eso na gauna rawa ni o kere veivuke vei ira na dauveivakavulici.

   “Gole vakadodonu vei qasenivuli qai kerei koya me vukei iko mo kila vinaka na lesoni, me rawa ni toso cake tale ga kina na nomu maka. Ena marautaka vakalevu o koya nomu sasaga, ena vukei iko tale ga.”—David.

   iVakavuvuli vakaivolatabu: “E vakavotukana na sasaga ni levu na daunivakasala.”—Vosa Vakaibalebale 15:22.