“Sa vakavucesa vei au na vuli!” Ke o dau va qori, ena rawa ni o biu vuli. Ena vukei iko na ulutaga qo mo kila kina eso na ka mo cakava.

•  Cava era sa bese kina na vuli eso?

•  Vakasamataka na ka e rawa ni yaco

•  Ka mo cakava

•  Ka era kaya nomu icaba

 Qo eso na ka era raica na kenadau ni vakavuna na biu vuli:

•   Dredre na ka ni vuli. ‘Sa qai ca na noqu maka ni veitarogi.’

•   Vakavucesa. ‘Au raica ni na sega ni yaga vei au na ka au vulica.’

•   Dredre ni bula vakailavo. ‘E dodonu meu vaqara cakacaka meu vukei ratou kina e vale.’

 E kaya na iVolatabu: “O koya e yalomatua e vakasamataka na nona ilakolako kece.” (Vosa Vakaibalebale 14:15) Cava eda vulica? Ke o nanuma mo sa kua ni vuli, mo vakasamataka na ka ena rawa ni yacovi iko ena veigauna se bera mai.

 Mo taroga:

•   ‘Ena lai tara vakacava na noqu vaqara cakacaka na noqu sa biu vuli?’

   “Vakasamataka ni dua na siga o na vaqara cakacaka mo qarava kina na nomu vuvale. Ena rawa vakacava ni na dua nomu cakacaka ke vinakata o boso me tiko nomu sitivikiti ni o sa vuli oti ena sekeneri?”—Julia.

•   ‘Keu sa biu vuli, vacava au na rawa ni walia eso tale na ituvaki dredre?’

   “Na vuli ena vakarautaki iko ena ka o na sotava ena nomu bula. Ke o sa walia rawa qo na dredre e koronivuli, o na kila na veimaliwai, o na vorata na veivakatovolei, ena dei tale ga na nomu cakacaka.”—Daniel.

•   ‘Keu sa biu vuli, vakacava au na rawata eso na kila vakacakacaka?’

   “O na rairai nanuma ni sega ni yaga na nomu ka ni vuli ena gauna qo. Ia vakasamataka mada ni o sa lai yabaki 23, o qai saga tiko mo vakayagataka vakavuku na nomu ilavo. O na kaya ga, ‘Ae! Vinaka mada ga niu dau vakarorogo vinaka ena gauna e vulici kina na fika.’”—Anna.

•   Mo qara veivuke. E kaya na iVolatabu: “E rawa na sasaga ni levu na daunivakasala.” (Vosa Vakaibalebale 11:14) Ke sa lutu tiko na kemu maka, kere ivakasala vei rau nomu itubutubu, nomu qasenivuli, e dua na daunivakasala, se dua tale na qase o dau nuitaka me vukei iko ena nomu ka ni vuli.

   “Vosa vua nomu qasenivuli ke dredre tiko vei iko nomu ka ni vuli. So na gauna eda nanuma ni bale vei qasenivuli na noda sega ni pasi, ia ena rawa sara ga ni vukei iko na nomu kere veivuke vua.”—Edward.

•   Me kua ni qiqo na nomu rai. E kaya na iVolatabu: “E vinaka na itinitini ni dua na ka, e ca na kena itekitekivu.” (Dauvunau 7:8) E tiko tale eso na ka o vulica e koronivuli me vaka na itovo, kei na so tale ena lai yaga vakalevu vei iko ena veigauna se bera mai.

   “Ni o sa qase, o na sega ni vola italanoa tiko se veitarogi, ia na nomu vulica mo vosota na ituvaki dredre e koronivuli ena vukei iko mo vosota tale ga na ituvaki dredre ena gauna o sa qase kina.”—Vera.

•   Vakasamataka eso tale na ka o rawa ni cakava. E kaya na iVolatabu: “O ira kece era vakusakusa era na dravudravua.” (Vosa Vakaibalebale 21:5) Mo kua ni vakatulewa vakariri mo nanuma ni sa vinaka ga mo biu vuli. E tiko tale ga eso na tabana ni vuli tara o rawa ni cakava.

   “O vulica e koronivuli na cakacaka vakaukaua, na sala mo walia kina na leqa, kei na nomu dau cakacaka vata kei ira eso tale. Na ka o vulica e koronivuli ena yaga vei iko ena dua na gauna balavu. E na yaga dina ke o vakaotia vinaka nomu vuli.”—Benjamin.

 Na kena itinitini ga qo: Ke o vakaotia vinaka nomu vuli, o na vulica e levu na ka ena lai yaga vei iko ena gauna o sa qase kina.