Ke rau vakadonuya nomu itubutubu mo vakayagataka na internet, qo e tolu na sala e rawa ni vukei iko.

Ena ulutaga qo

•  E kania vakacava noqu gauna?

•  E vakaleqa vakacava noqu moce?

•  E vakaleqa vakacava na ivakarau ni lomaqu?

•  Ka era kaya nomu icaba

 Na vakayagataki ni internet e vaka na vodo ose kila, ke o sega ni lewa vinaka ena rawa ni lewai iko.

 “Au dau vinakata meu vakayagataka e vica ga na miniti ena internet. Ia au kidacala ni sa oti tale e vica na aua! E rawarawa sara ga meda bobula ena internet, e vakalusi gauna tale ga.”—Joanna.

 O bau kila? O ira na kenadau era bulia na porokaramu ni internet meda bobula kina. Era kila na levu ni gauna eda vakayagataka ena dua na website, era na sauma tale ga na kabani e levu na ilavo me vakaraitaki kina na veika era vakarautaka.

 Mo taroga: ‘Au dau kidava niu vakalusi gauna tu ena internet? Au rawa ni vakayagataka na gauna qori ena so tale na ka e yaga?’

 Ka o rawa ni cakava. Mo lokuca na gauna mo vakayagataka ena internet, qai dei kina.

 “Au dau lokuca rawa tu na gauna ena noqu talevoni meu vakayagataka eso ga na app. E rawa kina niu veiraurautaka noqu vakayagataka na internet, e sega tale ga niu vakalusi gauna.”—Tina.

 iVakavuvuli vakaivolatabu: “Ni vakayagataka vakavinaka na nomuni gauna.”—Efeso 5:16.

 Levu na kenadau era kaya ni dodonu me walu na aua na nodra moce na itabagone. Ia e levu e lailai na nodra gauna ni moce. Na vuna? Nira vakayagataka tiko na internet ena gauna e dodonu mera moce kina.

 “Ni bera niu moce, au dau via raica eso na itaba e biu mai ena internet. Ia au kidacala ga ni sa oti tale e vica vata na aua. Qori e dua na ka au saga tiko meu veisautaka.”—Maria.

 O bau kila? Eda na nuiqawaqawa qai lomabibi ke lailai noda gauna ni moce. E kaya o Jean Twenge e dua na parofesa ni vakasama, na vuna era sega ni marau qai tauvimate kina e levu nira sega ni moce vinaka. E kaya tale ga ni rawa ni vakavuna “e levu na mate ni vakasama ni toso na gauna.” a

 Mo taroga: ‘E vakacava na dede ni noqu moce ena bogi?’ ‘Au vakayagataka tiko ga na internet ena gauna e dodonu meu moce kina?’

 Ka o rawa ni cakava. Kua ni biuta na talevoni se tablet ena vanua o moce kina. Ni vo e rua na aua mo moce, saga mo kua ni vakayagataka na internet. E vinaka mo kua ni vakayagataka na alamu ni talevoni se tablet me vakayadrati iko ena mataka lailai.

 “Eso na gauna au na yadra tu me bogilevu niu vakaraica tiko eso na ka ena noqu talevoni. Qori e dua na ka au saga tiko meu veisautaka. Au vinakata meu yalomatua qai nuitaki. Au na saga meu moce totolo me rawa niu qarava vinaka na noqu itavi ena siga e tarava.”—Jeremy.

 iVakavuvuli vakaivolatabu: ‘Mo vakadeitaka na veika era bibi sara.’—Filipai 1:10.

 E laurai ena dua na vakadidike nira vakatarogi eso na goneyalewa era vuli ena sekeneri, ra qai kaya nira “lomabibi vakalevu.” Na vuna? De dua na nodra dau vakayagataka na internet. E kaya o Dr. Leonard Sax, b “O na rawa ni lomabibi ke o vakayagataka vakalevu nomu gauna ena internet, qai vakatauvatani iko kei ira eso tale.”

 “Dau matau vei ira na itabagone mera vakatauvatani ira kei na so tale. Na internet sara ga e uqeti ira mera cakava qori. Rawa ni vica vata na aua nomu vakaraica tu na kedra itaba eso tale qai vakatauvatani iko kei ira. O lai nanuma kina ni sega ni marautaki na nomu bula.”—Phoebe.

 O bau kila? Na internet e rawa ni o veitaratara kina kei ira nomu itokani, ia ena vinaka cake sara mo sota qai veitalanoa kei ira. E kaya o Dr. Nicholas Kardaras, “Eda dau marau nida veitalanoa kei ira eso tale ena iyaya vakalivaliva, ia ena sega sara ni vaka na marau eda vakila nida sota qai veitalanoa. Qori sara ga na ka e vakamarautaki keda.” c

 Mo taroga: ‘Au dau galili niu raica na ka era cakava noqu itokani?’ ‘Au nanuma ni vakavucesa noqu bula niu raica ena internet nodra marau tu na noqu itokani?’ ‘Au dau yalolailai ni vica ga era taleitaka na itaba se vidio au biuta ena internet?’

 Ka o rawa ni cakava. Tovolea mo kua tu mada ni raica na internet ena vica na siga, dua na macawa, se dua sara na vula. Mo vakayagataka e levu na gauna mo sotavi ira na nomu itokani, qai veitalanoa se qiriti ira. O na mamarau qai sega ni lomabibi.

 “Niu vakayagataka na internet au dau lai kauaitaka vakasivia na veika era cakava eso tale. Ia niu bokoca laivi mai na noqu talevoni, au mamarau qai levu na gauna au cakava kina eso na ka e yaga.”—Briana.

 iVakavuvuli vakaivolatabu: “Me dikeva na tamata yadua na nona cakacaka, ena qai marau ga kina vakalevu, ena sega ni vakatauvatani koya kei na dua tale.”—Kalatia 6:4.