•  Cava mo vakayagataka vinaka kina nomu gauna?

•  Ka o rawa ni cakava

•  Ka era kaya nomu icaba

•   Na gauna e vaka na ilavo. Ke o vakasabusabutaka ena sega ni lesu tale mai ena gauna o vinakata kina. Ia ke o vakayagataka vinaka nomu gauna, o na rawa ni cakava eso tale na ka o dau taleitaka!

   iVakavuvuli vakaivolatabu: “Na tamata vucesa e garova e levu na ka, e sega na ka e rawata, ia o koya e gumatua ena vakamamautaki vakalevu.”​—Vosa Vakaibalebale 13:4.

   Bibi me nanumi: Ni o vakayagataka vinaka nomu gauna o na galala kina vakalevu ena lailai nomu osooso.

•   Ni o tuvanaka vinaka nomu gauna ena yaga vakalevu ni o sa uabula. Ena vukei iko mo dei ena dua na cakacaka mo kua ni vakasakei. Vakacava ke dua nomu bisinisi o na vakacakacakataka tiko ga e dua e dau bera tu yani?

   iVakavuvuli vakaivolatabu: “O koya e dina ena ka lailai ena dina tale ga ena ka levu.”​—Luke 16:10.

   Bibi me nanumi: Ena kilai vinaka nomu itovo ena nomu dau tuvanaka vinaka na gauna.

 Ia eda kila ni sega ni dau rawarawa me tuvanaki na gauna. Vakasamataka mada qo eso na ka e dau veivakaleqai kina.

 Dau veivakaleqai #1: iTokani

 “Nira sureti au noqu itokani meu gade kei ira ke sega mada ga na gauna au na saga ga meu tiko kina. Au dau vakasamataka meu qai mai cakava ga vakatotolo noqu cakacaka niu sa lesu mai. Ia e sega ni dua na ka e rawati kina, kena itinitini ga na leqa levu.”​—Cynthia.

 Dau veivakaleqai#2: Ka e veivakawelei

 “Na tivi e vaka na misini ni sasamaki e dau domica na benu. Ena cakava qori vei iko ena iyaloyalo kei na vakatasuasua e vakaraitaki kina, qai dredre ni o vorata.”​—Ivy.

 “Levu na gauna au dau vakalusia tu ena noqu tablet. Sa na qai cegu ga ni sa maca na bateri.”​—Marie.

 Dau veivakaleqai #3: Lokuyara

 “Au dau lokuyara ni cakava noqu lesoni, kei na veika tale eso meu cakava. Au na vakalusia noqu gauna ina ka e sega na betena me yacova na gauna meu vakaotia kina noqu lesoni. Qo e sega ni ivakaraitaki vinaka ni vakayagataki vinaka ni gauna.”​—Beth.

1.   Vola na ka e vinakati mo cakava. Kena ivakaraitaki, na cakacaka ni vale kei na nomu lesoni. Vola na levu ni gauna e vinakati me vakaoti kina na cakacaka yadua qori ena veimacawa.

    iVakavuvuli vakaivolatabu: “Moni vakadeitaka kina na veika era bibi sara.”—​Filipai 1:10.

2.   Vola na ka o via cakava ena nomu gauna galala. Okati kina na veika me vaka na internet, kei na sara tivi. Vola tale ga na levu ni aua o vakayagataki rau kina ena dua na macawa.

    iVakavuvuli vakaivolatabu: “Moni lewa vakayalomatua na nomuni ilakolako . . . , vakayagataka vinaka na nomuni gauna.”​—Kolosa 4:5.

3.   Lalawataka na ka. Railesuva na rua na ka o vola qori. Vakacava e levu na gauna o vakayagataka mo cakava kina na veika e bibi? E vinakati mo vakuai iko ena so na gauna e dau vakayagataki tu ga ena ka o taleitaka?

    Vakatutu: Me dua na lisi ni ka mo cakava ni oti ga e dua toqa sara.

    iVakavuvuli vakaivolatabu: “Na lalawa ni tamata gumatua ena tini vinaka ga.”​—Vosa Vakaibalebale 21:5.

4.   Muria sara. O na rairai vakasuka e dua na veisureti mo cakava kina na veika e bibi sara. Ia o na raica ni levu nomu gauna galala, o na marautaka tale ga vakalevu.

    iVakavuvuli vakaivolatabu: “Moni dau mamakutu, ni kua ni vucesa.”​—Roma 12:11, vmr.

5.   Vakaicovitaki iko, ia kua ga ni totolo sara. E kaya e dua na yalewa o Tara: “Eso na gauna au dau cakava e rua na ka e tiko ena lisi, oti au qai vakasamataka, ‘Au rawa ni sara tivi me 15 na miniti, oti au qai tomana tale na ka meu cakava ena lisi.’ Ia na 15 na miniti qori sa lai 30 na miniti, lai dua sara na aua, vakaoti gauna wale ga ena rua na aua na sara tivi!”

    Kena iwali? Mo raica na ka o cakava ena nomu gauna galala me icovi ni nomu vakaotia e dua na itavi, sega ni ka mo cakava ena dua na siga.

    iVakavuvuli vakaivolatabu: “E sega ni dua tale na ka e vinaka vua na tamata . . . me marautaka na nona cakacaka vakaukaua.”​—Dauvunau 2:​24.