•   O cei vei rau nomu itubutubu drau dau veiba vakalevu?

  •  Ta

  •  Na

•   E vakacava na levu ni gauna drau dau veiba kina?

  •  Vakavudua

  •  Eso na gauna

  •  Wasoma

•   E vakacava na kaukaua ni nomudrau veiba?

  •  E totolo ni wali qai veiyaloni tale.

  •  Ena wali ni oti e dua na veiba levu.

  •  Ke oti mada ga na veiba, ena sega ga ni wali.

 Ke o sega ni veimaliwai vinaka kei rau nomu itubutubu, o na rairai nanuma me rau na vakavinakataka na ituvaki qori. Me vaka eda na qai raica yani, e tiko eso na ka o rawa ni cakava mo drau kua kina ni veiba vakalevu, kei na sala malumu e rawa ni wali kina. Kena imatai . . .

•   iVakarau ni rai. Ni o tubu cake tiko, o sa na vakasamataka vakatitobu na ka ni vakatauvatani kei na gauna o se gone kina, o na dei tale ga ena ka o via cakava. De dua eso na ka qori e veisaqasaqa kei na ka rau vinakata na nomu itubutubu. Ia e kaya na iVolatabu: “Rokova na tamamu kei na tinamu.”​—Lako Yani 20:12.

   Kena dina: Na tamata yalomatua ena sega ni wini tu ga ena veiba, ia ena saga me doka tale ga nodra rai eso tale.

•   Lewai iko ga. Ni o sa matua, rairai rau na solia vei iko na nomu itubutubu e levu na galala. De dua ena sega ni levu sara mai na ka o vinakata, se o vinakata me soli vei iko na galala ena gauna vata ga ya. Qori e rawa ni vakavuna na veiba. Ia e kaya na iVolatabu: ‘Talairawarawa vei rau nomu itubutubu.’​—Efeso 6:1.

   Kena dina: Na levu ni galala rau na solia vei iko na nomu itubutubu, e vakatau sara ga ena nomu vakayagataka na galala sa soli oti vei iko.

•   Kauaitaka na ka o rawa ni cakava. Kua ni beitaki rau na nomu itubutubu ni rau vakavuna na veiba, vakasamataka ga na ka o rawa ni cakava mo dou veiyaloni kina. E kaya o Jeffrey e dua na cauravou: “E sega ni ka kece ga rau tukuna na nomu itubutubu e vakavu veiba, ia e vakatau tale ga ena sala o sauma kina. Ni o vosa vakamalua ena wali totolo na leqa.”

   E kaya na iVolatabu: “Saga moni veiyaloni kei ira na tamata kece.”​—Roma 12:18.

•   Vakarorogo. E kaya o Samantha e yabaki 17: “E dredre sara ga meu cakava qori. Ia au raica ke o vakarogoci rau na nomu itubutubu, rau na vakarogoci iko tale ga.”

   E kaya na iVolatabu: “Totolo ni vakarorogo na tamata yadua, me berabera ni vosa.”​—Jemesa 1:19.

•   Veitokonitaka na wali ni leqa. Saga mo walia na leqa kei rau nomu itubutubu. E kaya o Adam e dua na cauravou: “Ni yaco na veiba ena vinakata na itubutubu na ka vinaka duadua vei luvena. E va tale ga qori nona rai o gone me baleti koya. Kena ibalebale, ratou vinakata kece me wali na leqa.”

   E kaya na iVolatabu: “Guta mada ga na bula veiyaloni.”​—Roma 14:19.

•   Kauaitaki rau nomu itubutubu. E kaya o Sarah e dua na itabagone: “E vukei au vakalevu noqu vakasamataka na ituvaki dredre era sotava na itubutubu, e levu cake sara mai ena veika keimami sotava.” E kaya tale ga o Carla e dua na itabagone: “Au dau saga meu biuti au ena kedrau ituvaki na noqu itubutubu. Cava au na cakava vei luvequ keu sotava na ituvaki qo niu sa dua na itubutubu? Cava ena vinakata vakalevu o luvequ?”

   E kaya na iVolatabu: ‘Kua ni kauaitaka ga na ka e baleti kemuni, ni kauaitaka tale ga na ka e baleti ira tale eso.’​—Filipai 2:4.

•   Mo talairawarawa. Qori sara ga na ka e kaya na iVolatabu mo cakava. (Kolosa 3:20) Ni o muria ena rawarawa sara na wali ni leqa. E kaya o Karen e dua na itabagone: “Au na sega ni lomaleqa vakalevu keu muria na ka rau tukuna na noqu itubutubu. Dua na ka nodrau cakacaka vakaukaua me baleti au, qo gona e dua na sala au vakaraitaka kina noqu vakavinavinaka.” Na iwali vinaka duadua ni veiba na talairawarawa!

   E kaya na iVolatabu: “Ni sega na buka, e boko na yameyame.”​—Vosa Vakaibalebale 26:20.

 Vakatutu. Rawa ni o vakauta ena text se vola ena dua na ivola na ka o nanuma ke o sega ni rawa ni veivosaki kei rau nomu itubutubu. E kaya o Alyssa e dua na itabagone: “Au na cakava qori ke sega ni lomaqu meu veivosaki kei rau noqu itubutubu. Au na sega kina ni kaila tu i cake se tukuna e dua na ka au qai veivutunitaka e muri.”