E wili me veivakasagai na ivukivuki vakasevaki e uqeta na veiyacovi me vaka na veitarai se wede. Ia ena so na gauna e dredre mo kila na duidui ni veivakanini, wede, kei na veivakasagai.

 Vakacava, o kila tiko na kedratou duidui? Raica na  taro ni veivakasagai mo kila kina!

 Ka ni rarawa ni sega ni yala ga e koronivuli na veivakasagai. Ia ke o bucina rawa qo na yalodei kei na iwalewale mo vorata kina na veivakasagai, ena yaga qori ni o sa cakacaka. O na rawa tale ga ni tarova na dau veivakasagai me kua ni vakasaga eso tale!

 Ena rawa ni tarovi mo kua ni vakasagai ke o kila na kena ibalebale, kei na ka mo cakava! Raica mada qo e tolu na ituvaki kei na ka o rawa ni cakava ena ituvaki yadua.

 ITUVAKI:

E kaya o Tavaita sa yabaki 20, “Ena vanua au cakacaka kina, era dau kaya eso na tagane era qase sara vei au niu goneyalewa totoka, era diva mera gone tale ena 30 na yabaki. Dua vei ira e lako mai dakuqu qai vakaboica na uluqu!”

 E nanuma o Tavaita: ‘Keu vakawalena se vosota tiko ga, de dua ena sega ni tomana.’

 Na cava e cala kina qori: Era kaya na kenadau ke vakawaleni na veivakasagai, ena tomani tiko ga, ena rawa ni ca sara.

 Tovolea mada qo: Vosa ena yalovinaka, ia tukuna vakadodonu vei koya e veivakasagai ni o sega ni taleitaka na ka e tukuna kei na nona ivukivuki. E kaya o Tara sa yabaki 22, “Ke dua e tarai au vakaveitalia, au na vuki qai tukuna vua me kua tale ni tarai au. Qori ena kurabui kina.” Ke tomana tiko ga nona veivakasagai, dei tiko ga, kua ni soro. E veivakasalataki na iVolatabu meda dei tiko ga ena ivakatagedegede savasava: “Mo ni tudei sara ka mo ni lewenilotu Vakarisito matua ka lomadei.”​—Kolosa 4:12

 Vakacava ke vakarerei iko na dau veivakasagai me vakacacani iko? Kua ni bolei koya. Dro tani mai na ituvaki qori ena gauna totolo duadua qai kerea e dua na uabula nuitaki me vukei iko.

 ITUVAKI:

E kaya o Vini sa yabaki 18, “Niu se kalasi ono, rau dreti au e rua na goneyalewa ena pasese. Dua vei rau e dau veimoceri kei ira na yalewa qai vinakata me keirau lako vata. Au sega ni taleitaka, ia rau vakasagai au tiko ga e veisiga ena gauna e veisau kina na kalasi. Ena dua na gauna, erau biligi au e lalaga!”

 E nanuma o Vini: ‘Keu tukutuku vua e dua, ena nanumi niu malumalumu, era na sega ni via vakabauti au.’

 Na cava e cala kina na rai qori: Ke o sega ni tukutuku vua e dua, ena tomani tiko ga na ka e dau cakava o koya e veivakasagai, ena tini vakasaga eso tale.​—Dauvunau 8:11.

 Tovolea mada qo: Mo qara na veivuke. Erau na vukei iko na nomu itubutubu kei ira na nomu qasenivuli me tarovi kina nomu vakasagai. Vakacava ke ra sega ni raica vakabibi na ka o kudruvaka? Tovolea mada qo: Gauna kece o vakasagai kina, vola na kena itukutuku matailalai. Mo vola tale ga na tikinisiga, na gauna, na vanua o vakasagai kina, kei na ka kece e tukuna vei iko. Solia e dua na ilavelave vei rau na nomu itubutubu, se nomu qasenivuli. Levu era dau raica vakabibi na kudru e volai, sega soti na kena e tukuni.

 TUVAKI:

E kaya o Tuliana sa yabaki 18, “Au rerevaka e dua na gonetagane e lewe ni timi ni rakavi. Rauta ni 2 na mita na kena balavu, e 135 na kilokaramu na kena bi! E vakasamataka tiko me keirau veiyacovi.’ Ena dua taucoko na yabaki, voleka ni veisiga e dau vakasagai au. Dua na siga e toso voleka mai vei au ni keirau tiko taurua ga e valenivuli. Au lade, au cici i tuba.”

 E nanuma o Tuliana: ‘E dau va ga qori o ira na tagane.’

 Na cava e cala kina na rai qori: Ena sega ni via veisautaka na nona ivakarau o koya e dau veivakasagai ke da nanuma kece ni sa donu tiko.

 Tovolea mada qo: Kua sara ni dredrevaka se matadredredre vei koya e vakasagai iko. Mo vakaraitaka ena nomu ivukivuki kei na irairai ni matamu ni o sega ni taleitaka na ka e cakava.

 ITALANOA DINA 1:

E kaya o Tabitha, “Au dau via yalovinaka vei ira na tamata kece. Nira vakasagai au na tagane, au na tukuna vei ira me kua, ia au sega ni dei, au dau matadredredre niu vosa vei ira. Era nanuma niu wede tiko..”

•   Ke o iko o Tabitha, na cava o na cakava ni o vakasagai? Na vuna?

•   Na cava e nanuma kina o koya e dau veivakasagai ni o wedevi koya tiko?

 ITALANOA DINA 2:

E kaya o Sabina, “E tekivu ga vakalalai ena nodra veiwali ca eso na cauravou ena neitou lesoni ni vakaukauayago. Ena vica na macawa au vakawalena na ka era tukuna, ia ni toso na gauna sa qai ca tiko ga. Era mai dabe e yasaqu ra qai mokoti au. Au biligi ira, ia era cakava tiko ga. Oti e solia vei au e dua na cauravou e dua na tikinipepa e volai kina na itukutuku vakasisila. Au solia sara vei noqu qasenivuli. E mani vakatalai na cauravou qori mai koronivuli. Au qai kila ni a dodonu meu lako vei qasenivuli ni se qai tekivu ga!”

•   Cava o nanuma ni sega ni via lako totolo kina vei qasenivuli o Sabina? O nanuma ni vinaka nona vakatulewa? Na vuna?

 ITALANOA DINA 3:

E kaya o Suzanne, “E torovi ganequ o Greg e dua na cauravou e valenivakacegu. E volekati Greg yani qai kaya, ‘Reguci au.’ E vakasega o Greg, ia e tu ga vakadua na cauravou ya. Sa qai biligi koya ga o Greg.”

•   O nanuma ni vakasagai o Greg? Na vuna?

•   Cava o nanuma kina nira sega ni dau tukutuku eso na cauravou ni vakasagai ira e dua tale na cauravou?

•   O duavata kei na ka e cakava o Greg? Na cava o na cakava?