E kaya na iVolatabu ni o “Jiova ena sega ni bureitaka e dua na ka vinaka vei ira na lako tiko ena yalodina.” (Same 84:11) Na cava na ibalebale ni noda “lako tiko ena yalodina?” Kena ibalebale, me laurai sara ga ena ka o cakava ni o dina ena nomu yalayala vei Jiova. (Dauvunau 5:4, 5) O na yalodina tiko ga vakacava ni oti nomu papitaiso?

Ena ulutaga qo

•  Vosota tiko ga na veika dredre

•  Vorata tiko ga na veitemaki

•  Gugumatua tiko ga

 Tikinivolatabu: “Eda na vakararawataki mada vakalevu, eda na qai curu ina Matanitu ni Kalou.”—Cakacaka 14:22.

 Kena ibalebale: Era na sotava na lotu vaKarisito kece na veika dredre, me vaka na veivakacacani se veitusaqati. Na leqa tale ga vakailavo kei na tauvimate e rawa ni tarai keda kece na kawatamata.

 Ka mo namaka: Eso na gauna ena veisau na kemu ituvaki, de dua o na sega ni taleitaka. E kaya na iVolatabu ke da mani lotu vaKarisito se sega, eda na sotava ga na veika dredre.—Dauvunau 9:11.

 Ka o rawa ni cakava: Mo vakarautaki iko rawa tu ena veika dredre o rawa ni sotava. Mo okata na veika dredre o sotava me gauna vinaka mo vaqaqacotaka kina nomu vakabauta, qai nuitaki Jiova vakalevu. (Jemesa 1:2, 3) Toso na gauna, o na duavata kei na ka e kaya na yapositolo o Paula: “Au rawata na ka kece ena vuku i koya e vakaukauataki au.”—Filipai 4:13.

 Vakatutu: Vulica na italanoa kei Josefa. Rawa ni wilika qori ena Vakatekivu wase 37 kei na wase 39 ina 41. Oti mo taroga: E vosota vakacava na ituvaki dredre e sotava? E vukei koya vakacava o Jiova?

 Via kila eso tale na ka

•   Wilika:

   “How Can I Deal With Tragedy?”

   “Au Dau Soro Rawarawa?”

   “Ka me Caka ni Veisau na iTuvaki”

•   Download:

   “Ni Tauvimate Nomu iTubutubu”

 Tikinivolatabu: “E vakatovolei e dua ni bacani koya qai siwati koya na nona gagadre ca.”—Jemesa 1:14.

 Kena ibalebale: Eso na gauna, ke da sega ni lewai keda vinaka eda rawa ni temaki ena noda gagadre ca, lai vakavuna meda caka ca.

 Ka mo namaka: Oti nomu papitaiso ena vinakati tiko ga mo vorata na ‘gagadre ni yagomu.’ (2 Pita 2:18) Ena rawa mada ga ni o temaki mo veiyacovi ni bera ni o vakamau.

 Ka o rawa ni cakava: Vakatulewa rawa ni bera ni o temaki, mo kua kina ni vakalaiva na gagadre ni yagomu mo lai valavala ca kina. Nanuma na ka e kaya o Jisu: “E sega ni dua e rawa ni qarava e rua na turaga.” (Maciu 6:24) O rawa ni digia o cei me nomu turaga. Mo digitaki Jiova gona. Se mani vakacava na kaukaua ni veitemaki ni gagadre ni yagomu, kua vakadua ni vakalaiva me lewa na ka o cakava.—Kalatia 5:16.

 Vakatutu: Saga mo kila na ka o rawa ni cakava, kei na ka o sega ni rawa ni cakava. Digia na itokani era na uqeta na nomu itovo vinaka. Kua ni vakailala ca, se tiko ena dua na vanua se ituvaki ena vakadredretaka nomu cakava na ka e dodonu.—Same 26:4, 5.

 Via kila eso tale na ka

•   Wilika:

   “Au na Vorata Vakacava na Veitemaki?”

   “Au na Tinia Vakacava na Vakanananu ni Veiyacovi?”

   “Kua ni Datuvu ke o Vakasaurarataki”

   “O Vakatotomuria Tiko na Rai i Jiova?”

 Tikinivolatabu: “Gumatua tiko ga va qori . . . me yacova sara na icavacava, moni kua kina ni vucesa.”—Iperiu 6:11, 12.

 Kena ibalebale: O koya e vakawelewele qai vucesa, ena sega ni qarava vinaka na nona cakacaka.

 Ka mo namaka: Oti nomu papitaiso de dua o dau gugumatua qai taleitaka nomu veiqaravi, o lomani Jiova tale ga vakalevu. Ia toso na gauna vaka sa dredre mo muria na ka kece e vinakata o Jiova. Qori ena rawa ni vakayalolailaitaki iko, ena vakavuna tale ga mo sega ni gugumatua.—Kalatia 5:7.

 Ka o rawa cakava: Ke o vakila ni o sa sega ni dau gugumatua, mo cakava tiko ga na ka e dodonu. (1 Korinica 9:27) Gauna vata qori mo toro voleka tiko ga vua na Tamada vakalomalagi ena nomu saga mo kilai koya vinaka, mo masu tale ga vakawasoma. Mo veitokani tale ga kei ira na lomani Jiova.

 Vakatutu: Kua ni guilecava ni lomani iko vakalevu o Jiova, e tu vakarau tale ga me vukei iko. Kua ni nanuma ni na sega ni vakadonui iko o Jiova ke o sega ni gugumatua ena so na gauna. E kaya na iVolatabu: “E solia na kaukaua vei koya e oca kei na igu levu vei ira na malumalumu.” (Aisea 40:29) Toso na gauna ena vakalougatataka nomu sasaga mo rawa ni gugumatua tale.

 Via kila eso tale na ka

•   Wilika:

   “Ra Gone—Ni Sasagataka Tiko ga na Nomuni Bula”

   “Au na Marautaka Vakacava na Noqu Sokalou?”

•   Sarava:

   Ka Era Kaya Nomu iCaba—Na Bula Vinaka Duadua

 Bibi me nanumi: O na vakamarautaki Jiova ke o yalodina tiko ga! (Vosa Vakaibalebale 27:11) Ena marautaka ni o digia mo to vua, ena vakaukauataki iko tale ga mo vorata na veitemaki i Setani.