Io, sa tukuna tu na iVolatabu ni na qai torosobu ga nodra itovo, kei na ka era vakasamataka e levu ena gauna qo. Era na sega ni taleitaka na itovo vinaka, era na sega tale ga ni veiyaloni. a (2 Timoci 3:1-5) Ia e kaya tale ga na iVolatabu, eso era na sega ni vakatotomuria nodra itovo ca e levu. Era na vorata na veivakamuai cala ena veivuke ni Kalou. Era vulica tale ga me salavata kei na loma ni Kalou na ka era vakasamataka, kei na ka era cakava.—Aisea 2:2, 3.

Ena ulutaga qo

•  Cava e kaya na iVolatabu me baleta nodra itovo e levu nikua?

•  Ena tarai ira vakacava eso tale na nodra nanumi ira ga e levu?

•  Cava sa qai torosobu ga kina na nodra itovo e levu?

•  Cava meda cakava ni ca nodra itovo eso tale?

•  Vakacava ena ca tu ga na nodra itovo?

•  Vakacava ena ca na nodra itovo e levu lai vakavuna na tikoyavavala?

 E vakamacalataka na iVolatabu ni na ca na nodra itovo, kei na nodra ivakarau e levu. E vu kece qori ena nodra nanumi ira ga. Era na “sega ni lewa vinaka na yalodra,” era na “dau lomani ira ga,” era na “lomana ga na marau era sega ni lomana na Kalou.”—2 Timoci 3:2-4.

 Io, e levu nikua era nanumi ira ga, ra cakava ga na ka e yaga vei ira, na ka era marautaka, kei na ka era nanuma ni na vakainaki kina nodra bula, kei na so tale na ka. Qori e vakavuna mera “sega ni vinakata na ka e dodonu,” ra qai cata na itovo vinaka. Era ‘sega tale ga ni dau vakavinavinaka.’ Ya na nodra sega ni vakavinavinakataka na ka era taukena, se na ka e caka vei ira.—2 Timoci 3:2, 3.

 Na yalo ni nanumi koya ga e uqeta eso tale na itovo ca e parofisaitaka na iVolatabu ni na yaco nikua:

•   Kocokoco. Levu “era na lomana na ilavo.” Era nanuma ni na vinaka nodra bula ke levu nodra ilavo, kei na iyau.—2 Timoci 3:2.

•   Dokadoka. Levu era na “dau tukutukuni ira, era na qaciqacia,” ra qai “dokadoka.” (2 Timoci 3:2, 4) Era na tukutukuni ira ena ka era cakava, nodra itovo, se nodra iyau.

•   Dau vakaucaca. Levu nikua era “dau veibeci,” qai “dau vakauvosa.” (2 Timoci 3:2, 3) Qori e rawa ni vakaibalebaletaki ira na vosa vakacacataki ira eso tale, se ra tukuna na veika lasu me baleti ira se na Kalou.

•   Yalokaukaua. E levu era na “sega ni yalodina, era na sega ni via okati ena dua na veiyalayalati, dau veiliumuritaki,” ra qai “domoqa.” (2 Timoci 3:2-4) Era na yalodredre, era na sega ni via walia na leqa, se mera cakava na ka era yalataka.

•   iTovo kaukaua. Levu nikua “era na voravora,” era dau cudru katakata, ra lai cakava kina eso na ka vakadomobula.—2 Timoci 3:3.

•   iValavala tawadodonu. E tukuna o Jisu ni na “tubu na ivalavala tawadodonu” ena noda gauna. (Maciu 24:12) E kaya tale ga ni na levu na “tikoyavavala.”—Luke 21:9.

•   Sega na veilomani ena vuvale. O ira na “talaidredre vei ira nodra itubutubu” ra qai ‘sega ni veilomani [vakavuvale],’ era na sega ni kauaitaki ira na wekadra. Era cakava tale ga na itovo torosobu, kei na itovo kaukaua ena nodra vuvale.—2 Timoci 3:2, 3.

•   Veivakaisini nodra lotu. Levu e “vakarairai ga na nodra qarava na Kalou.” (2 Timoci 3:5) Era sega ni via muria na ka e vinakata na Kalou, era cakava ga na ka era via rogoca vei ira na iliuliu ni lotu.—2 Timoci 4:3, 4.

 Na nodra nanumi ira ga e levu, e lai vakavuna mera lomabibi kina eso tale ra qai nuiqawaqawa. (Dauvunau 7:7) Kena ivakaraitaki, o ira na lomana na ilavo era rawa ni lawakitaki ira eso tale. Levu era sega ni dauloloma era rawa ni vakalolomataki ira na wekadra, vakavuna mera lomabibi kina, ra qai via vakamatei ira. E dau dredre vei ira na vakalolomataki mera guilecava na ka ca e caka vei ira.

 E kaya na iVolatabu na vuna sa qai torosobu kina nodra itovo e levu:

•   Lailai nodra lomana na Kalou, kei na wekadra. (Maciu 24:12) E levu gona era nanumi ira ga.

•   E vagalalataki mai lomalagi o Setani na Tevoro, qai biu sobu mai vuravura. (Vakatakila 12:9, 12) Tekivu mai na gauna qori, sa rawai ira tiko e levu mera nanumi ira ga.—1 Joni 5:19.

 E kaya na Vosa ni Kalou: “Lako tani mai vei ira e va qo na nodra ivakarau.” (2 Timoci 3:5, Easy-to-Read Version) E sega ni kena ibalebale qori meda yawaki keda mai vei ira. Ia meda kua ga ni veitokani kei ira era nanumi ira ga, ra qai sega ni vakabauta na Kalou.—Jemesa 4:4.

 Sega. E kaya na iVolatabu eso “era rarawataka, era vutugutaka na ka vakasevaki kece e vakayacori tiko.” (Isikeli 9:4) Era na sega ni nanumi ira ga, ra qai vakalaiva na ivakatagedegede ni Kalou me dusimaki ira. Ena kilai ena nodra ivosavosa, kei na nodra itovo nira duidui mai vei ira eso tale. (Malakai 3:16, 18) Kena ivakaraitaki, era na saga mera dau veiyaloni kei ira kece na tamata, era na sega tale ga ni vakaitavi ena ivalu kei na itovo kaukaua.—Maika 4:3.

 Sega. Ena sega ni yaco tu ga na duiyaloyalo, kei na itovo kaukaua. Ia na Kalou ena vakarau vakarusai ira na sega ni muria tiko nona ivakatagedegede. (Same 37:38) Ena vakarautaka na “vuravura vou,” se o ira na ilawalawa tamata vou era yalomalumalumu mera marautaka na vakacegu me tawamudu . (2 Pita 3:13; Same 37:11, 29) Na inuinui qori e sega ni tadra wale ga. Nikua, na iVolatabu sa vukei ira e levu mera veisautaka nodra ivakarau ni bula me salavata kei na ivakatagedegede ni Kalou.—Efeso 4:23, 24.