O Rawa ni Bula Tawamudu?

SARAVA/ROGOCA

Kena isau vakaivolatabu

E yalataka na iVolatabu: “O koya e cakava na loma ni Kalou ena bula tawamudu.” (1 Joni 2:17, Holy Bible—Easy-to-Read Version) Na cava e vinakata na Kalou mo cakava?

Vulica na ka me baleta na Kalou, kei na Luvena o Jisu. E kaya o Jisu ena nona masu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.” (Joni 17:3) Na cava e okati ena noda ‘vulici rau tiko ga’ na Kalou kei Jisu? Eda na kilai rau nida vulica na iVolatabu da qai cakava na ka eda vulica. a E vakavotui ena iVolatabu na nona nanuma na Dauveibuli na Kalou o Jiova, o koya e solia na bula. (Cakacaka 17:24, 25) E vakamacalataka tale ga na Luvena o Jisu ni dau vakavulica na “vosa ni bula tawamudu.”—Joni 6:67-69.
Vakabauta na isoro ni veivoli Jisu. E lako mai vuravura o Jisu “me veiqaravi, me solia tale ga na nona bula me kedra ivoli e le levu.” (Maciu 20:28) Na isoro ni veivoli i Jisu e vakarautaka gona vei keda na bula tawamudu ena Parataisi e vuravura. b (Same 37:29) E kaya o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) Meda nanuma ni so tale na ka e okati ena noda vakabauti Jisu. E dodonu meda ‘vakaraitaka nida vakabauti koya,’ oya meda muria nona ivakavuvuli kei na inaki i Tamana.—Maciu 7:21; Jemesa 2:17.
Qaqaco na veitokani kei na Kalou. E vinakata na Kalou meda toro voleka vua, meda nona itokani tale ga. (Jemesa 2:23; 4:8) E tawamudu nona bula na Kalou. Ena sega vakadua ni mate, e vinakata talega mera bula tawamudu nona itokani. E kaya kina na Kalou ena nona Vosa vei ira era vakasaqarai koya: “Mo marautaka mada ga na bula me tawamudu.”—Same 22:26.

Rai Cala me Baleta na Bula Tawamudu

Rai cala: Rawati na bula tawamudu ena sasaga ni tamata.

Ka dina: E yalataki ena so na veiqaravi vakavuniwai ni rawa ni vakabalavutaki na bula ni tamata, ia ena sega ni rawati kina na bula tawamudu. Na Kalou ga ena solia vei keda na bula tawamudu, ni o koya ga “na ivurevure ni bula.” (Same 36:9) E yalataka ni na “tiloma vakadua o koya na mate,” ra qai rawata na bula tawamudu o ira na tamata yalodina kece.—Aisea 25:8; 1 Joni 2:25.

Rai cala: Era na bula tawamudu ga eso na matatamata.

Ka dina: E sega ni dau veivakaduiduitaki na Kalou. Ia “e vakadonui ira era dokai koya ra qai cakava na ka e vinakata mai na veivanua kece.” (Cakacaka 10:34, 35) Era na bula tawamudu o ira era talairawarawa vua na Kalou era duikaikai qai duidui nodra itovo.

Rai cala: E vakavucesa na bula tawamudu.

Ka dina: Na Kalou e yalataka na bula tawamudu ni lomani keda e vinakata tale ga meda marau. (Jemesa 1:17; 1 Joni 4:8) Na sala duadua ga e kila nida rawa ni marau kina oya noda cakava na cakacaka e yaga. (Dauvunau 3:12) E yalataka ni o ira na bula tawamudu e vuravura ena vakainaki qai veivakacegui na cakacaka era cakava, ena yaga vei ira kei ira na wekadra lomani.—Aisea 65:22, 23.

Kena ikuri era na vulica tiko ga na veika vovou me baleta na Dauveibuli kei na nona ibulibuli. E biuta vei keda na gagadre ni bula tawamudu meda kilai koya tale ga. Era “sega ni katuma rawa na tamata na ka e cakava na Kalou dina mai na itekitekivu me yacova na kena itinitini.” (Dauvunau 3:10, 11) O ira gona era bula tawamudu era na vulica ra qai cakava tiko ga na cakacaka e veivakurabuitaki.

a Era veisureti na iVakadinadina i Jiova ena kena vulici wale na iVolatabu. Me ikuri ni vakamacala sarava na vidio Na Cava e Dau Caka ena Vuli iVolatabu?

b Raica na ulutaga “Veivakabulai Vakacava o Jisu?”