Cava na iBalebale ni Vakabulai?
Kena isau vakaivolatabu
Ena so na gauna era dau vakayagataka na dauvola iVolatabu na vosa “vakabula” kei na “vakabulai,” me vakaibalebaletaka nona vakabulai e dua mai na leqa se veivakarusai. (Lako Yani 14:13, 14; Cakacaka 27:20) Ena levu na gauna e vakaibalebaletaka na veivakabulai mai na ivalavala ca. (Maciu 1:21) Na ivalavala ca e vakavuna na mate o ira gona na vakabulai mai na ivalavala ca era nuitaka tu na bula tawamudu.—Joni 3:16, 17. a
Ena rawati vakacava na veivakabulai?
Me rawa ni o vakabulai ena vinakati mo vakabauti Jisu ena nomu talairawarawa ina nona ivakaro.—Cakacaka 4:10, 12; Roma 10:9, 10; Iperiu 5:9.
E kaya na iVolatabu ni dodonu mo cakacakataka nomu vakabauta se talairawarawa kina me rawa ni o vakadinata ni sega ni mate nomu vakabauta. (Jemesa 2:24, 26) Ia e sega ni kena ibalebale qori ni o sa rawa ni vakabulai. Qo na “iloloma ni Kalou” e yavutaki ena nona “loloma soli wale” se “caka vinaka.”—Efeso 2:8, 9; King James Version.
Vakacava era na sega ni vakabulai eso?
Io. Me vaka ga nona vakabulai e dua e luvu, e rawa ni lutu se lade tale i wai. Ena sega ni vakabulai e dua mai na ivalavala ca ke sega ni cakacakataka nona vakabauta. E veiuqeti gona na iVolatabu vei ira na lotu vaKarisito era vakabulai, mera “vala vakaukaua” mera “taqomaka na vakabauta.” (Juta 3) E vakaroti ira tale ga: “Ni sasagataka tiko ga na nomuni bula ena rere kei na sautaninini.”—Filipai 2:12.
O Cei na iVakabula—Kalou se o Jisu?
E kaya na iVolatabu ni Kalou duadua ga e vu ni veivakabulai, e dau cavuti kina vakawasoma me “iVakabula.” (1 Samuela 10:19; Aisea 43:11; Taito 2:10; Juta 25) Na Kalou e vakayagataki ira eso mera sereki ira na Isireli qai vakatokai ira na iVolatabu mera “ivakabula.” (Niemaia 9:27; Dauveilewai 3:9, 15; 2 Tui 13:5) b E veivakabulai tale ga na Kalou mai na ivalavala ca ena nona vakarautaka na isoro ni veivoli i Jisu Karisito. E vakatokai Jisu kina na iVolatabu me “iVakabula.”—Cakacaka 5:31; Taito 1:4. c
Eda na vakabulai kece?
Sega, eso era na sega ni vakabulai. (2 Cesalonaika 1:9) Ni sa tarogi o Jisu: “Era na le lailai ga na vakabulai?” E sauma: “Ni saga ena nomuni igu kece moni curu ina katuba qiqo, baleta au kaya vei kemuni, e levu era na via curu kina ia era na sega ni rawata.”—Luke 13:23, 24.
Rai cala me baleta na veivakabulai raraba
Rai cala: E kaya na 1 Korinica 15:22 ni veivakabulai raraba oya na nodra “bula . . . na tamata kece ena vuku i Karisito.”
Ka dina: Na ikotokoto ena tikina qori e vakamacalataka na veivakaturi. (1 Korinica 15:12, 13, 20, 21, 35) Na matavosa “bula . . . na tamata kece ena vuku i Karisito,” e kena ibalebale nira na vakalougatataki ena vuku i Jisu Karisito o ira na vakaturi.—Joni 11:25.
Rai cala: E kaya na Taito 2:11 ni Kalou ena “vakabulai keda na tamata kece.”—International Standard Version.
Ka dina: Na vosa vaKirisi “kece” e kena ibalebale tale ga ena tikina qo “veimataqali.” d Na ibalebale dina ni Taito 2:11 oya ni solia na galala ni veivakabulai na Kalou vei ira na tamata kece wili kina o ira mai na “veimatanitu kece, veiyavusa, veimatatamata, kei na duivosavosa.”—Vakatakila 7:9, 10.
Rai cala: E kaya na 2 Pita 3:9 ni “sega ni vinakata” na Kalou “me rusa e dua.”
Ka dina: E vinakata na Kalou mera bula na tamata e sega ga ni vakasaurarataka e dua me ciqoma na isolisoli ni veivakabulai. E okati ena nona “siga ni lewa” na nodra “vakarusai kina o ira na sega ni doka na Kalou.”—2 Pita 3:7.
a E vakaibalebaletaka na iVolatabu nona “vakabulai” e dua, ia ena qai vakabulai mai na ivalavala ca kei na mate ena gauna se bera mai.—Efeso 2:5; Roma 13:11.
b Eso na ivakadewa ni tikinivolatabu qori era vakayagataka na vosa “jabeni,” “dauveivakabulai,” “qaqa,” “iliuliu,” se “dua ga na tamata” era sega ga ni vakayagataka na “ivakabula.” Ia na vosa taumada vakaIperiu ena iVolatabu e vakayagataka na vosa qori me dusi ira na veivakabulai e vakaibalebaletaki tale ga vua na Kalou o Jiova na iVakabula.—Same 7:10
c Na yaca Jisu e yavutaki mai na vosa vakaIperiu Yehoh·shuʹaʽ, kena ibalebale “Jiova na iVakabula.”
d Raica na ivolavosa Vine’s Complete Expository Dictionary of Old and New Testament Words. E laurai tale ga na vosa vaKirisi qori ena Maciu 5:11, e volai kina na ka e kaya o Jisu, nira na tukuna na tamata na “veimataqali” ka ca kece vei ira nona imuri.—International Standard Version.
Rawa ni o Wilika Tale ga
SAUMI NA TARO VAKAIVOLATABU
E Rawa Vakacava ni “Kedra iVoli e le Levu” na iSoro i Jisu?
E veisereki vakacava mai na ivalavala ca na ivoli?
SAUMI NA TARO VAKAIVOLATABU
E iVakavuvuli Vakaivolatabu, ‘Ke Dua e Vakabulai, ena Bula tu Ga’?
Na vosa vakatautauvata i Jisu e sauma sara ga na taro qori.
SAUMI NA TARO VAKAIVOLATABU
E Yavu ga ni Noda Vakabulai Noda Vakabauti Jisu?
E kaya na iVolatabu eso era vakabauti Jisu, ia era na sega ni vakabulai. E rawa vakacava qori?
ESSENTIAL BIBLE TEACHINGS
Na Cava a Mate Kina o Jisu?
E raica vakabibi na iVolatabu na mate i Jisu. Vakacava, e tiko na inaki ni nona mate?
VAKAMACALATAKI NA TIKINIVOLATABU
iVakamacala ni Roma 10:13—“Masuta na Yaca ni Turaga”
E vinakata na Kalou mera bula na tamata kece mera rawata tale ga na bula tawamudu se mani vanua cava era cavutu mai kina, duikaikai se nodra itutu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.