E vakatakilakilataka na iVolatabu na sala eda na kilai ira kina era vakavuvulitaka na ka dina. E kaya: “Dou na kilai ira ena vuadra. E vakaevei, e dau beti na vaini mai na wavakavotona, se lolo mai na soni?” (Maciu 7:16) Me vaka ga nomu rawa ni vakaduiduitaka na vaini mai na wavakavotona, e rawa tale ga ni o vakaduiduitaka na dina mai na lasu, se so na kena ivakatakilakila qo.

1.   Na lotu dina e vakavulica na ka dina ena Vosa ni Kalou ena iVolatabu. E sega ni yavutaki ena vuku vakatamata. (Joni 4:24; 17:17) E okati kina na ka dina vakalotu me baleta na bula, kei na inuinui ni bula tawamudu ena vuravura parataisi. (Same 37:29; Aisea 35:5, 6; Isikeli 18:4) E tukuna tale ga vakadodonu nodra lasu na vo ni lotu.—Maciu 15:9; 23:27, 28.

2.   Na lotu dina e vukea e levu mera kila na Kalou, okati kina nodra kila na yacana, o Jiova. (Same 83:18; Aisea 42:8; Joni 17:3, 6) E sega ni vakavuvulitaka ni dredre me kilai na Kalou, se sega ni dauveikauaitaki. Ia e vakavuvulitaka ga ni vinakata na Kalou meda veiwekani kei koya.—Jemesa 4:8.

3.   Na lotu dina e vakaraitaka ni Kalou e lesi Jisu Karisito me veivakabulai. (Cakacaka 4:10, 12) Era muria na ivakaro i Jisu, ra vakatotomuria tale ga nona ivakaraitaki.—Joni 13:15; 15:14.

4.   Na lotu dina e vakabibitaka ni Matanitu ni Kalou e inuinui duadua ga ni kawatamata. Era tukuna tale ga vei ira eso tale na veika me baleta na Matanitu ni Kalou.—Maciu 10:7; 24:14.

5.   Na lotu dina e uqeta na veilomani dina. (Joni 13:35) E vakavulica meda doka na matatamata kece, qai ciqomi ira na duikaikai, itovo, duidui vosa, se duidui nodra isususu. (Cakacaka 10:34, 35) Na loloma e uqeti ira mera kua ni vakaitavi tale ga ena ivalu.—Maika 4:3; 1 Joni 3:11, 12.

6.   Na lotu dina e sega ni saumi nodra italatala. Era sega tale ga ni tukuna na icavuti mera vakacerecerei kina na italatala ni lotu.—Maciu 23:8-12; 1 Pita 5:2, 3.

7.   Na lotu dina e sega ni veitovaki ena veika vakapolitiki. (Joni 17:16; 18:36) Ia era muria qai talairawarawa ina matanitu me salavata kei na ivakaro ena iVolatabu: “Ni solia vei Sisa na ka e nei Sisa [dusia tiko na lewa], vua na Kalou na ka e nona na Kalou.”—Marika 12:17; Roma 13:1, 2.

8.   Na lotu dina e sega ni dodonu me ka vagauna, ia me tiki sara ga ni noda bula. O ira na lewena era bulataka sara ga na ivakavuvuli vakaivolatabu ena nodra bula kece. (Efeso 5:3-5; 1 Joni 3:18) Era sega ni dau yalodua, ia era marau nira sokaloutaka tiko “na Kalou mamarau.”—1 Timoci 1:11.

9.   Era le lailai ga na lotu dina. (Maciu 7:13, 14) Era na beci, vakalialiai qai vakararawataki nira cakava na inaki ni Kalou.—Maciu 5:10-12.

Sega ni vakatau ena ivakarau ni lomamu nomu digia na lotu dina

 E rerevaki ke da digia na lotu ena ka ga eda vakila. E parofisaitaka tu na iVolatabu na gauna era na digia ga kina na tamata nodra qasenivuli me vakavulici ira ena ka e via rogoca na daligadra.” (2 Timoci 4:3) Ia ke sega mada ga ni kilai levu na lotu dina, e uqeti keda ga na iVolatabu meda muria “na lotu e savasava qai sega ni dukadukali ena mata ni noda Kalou na Tamada.—Jemesa 1:27; Joni 15:18, 19.