E sega ni dodonu meda cakava qori. Qo na ivakamacala ni New Catholic Encyclopedia ena lawa e solia na Kalou vei ira na Isireli, e kaya: “E vakamatatataka na iVolatabu ni sega dau caka na qaravi matakau ena sokalou dina.” Dikeva mada e vica na tikinivolatabu qo:

•   “Mo kua ni cakava e dua na nomu ivakatakarakara ceuti se na ivakatakarakara ni dua na ka e tu ena lomalagi e cake se na vuravura e ra, se na wai e ruku i vuravura. Mo kua ni cuva vei ira se bacani mo qaravi ira, ni o yau o Jiova na nomu Kalou, na Kalou e vinakata me qaravi duadua ga.” (Lako Yani 20:​4, 5) E sega ni marautaka na Kalou meda sokalou ina matakau, ivakatakarakara, tamata se so tale na ka, e vinakata ga meda ‘qaravi koya duadua ga.’

•   “Au sega ni vakadonuya me caka ina matakau na sokalou e dodonu me caka vei au.” (Aisea 42:8, Easy-to-Read Version) E cata na Kalou me sokaloutaki ni vakayagataki na matakau. Nira bulia na Isireli na ivakatakarakara ni luvenibulumakau mera sokaloutaki koya kina, e kaya na Kalou nira “sa cakava e dua na ivalavala ca bibi.”​—⁠Lako Yani 32:​7-9, Easy-to-Read Version.

•   “Meda kua ni nanuma ni Kalou e vaka na koula se siliva se vatu, se ka e bulia na tamata ena nona maqosa kei na nona vakasama ga.” (Cakacaka 17:29) E vakayagataki vakalevu ena lotu butobuto na matakau e “bulia na tamata ena nona maqosa kei na nona vakasama ga.” Ia o ira na Lotu vaKarisito e dodonu mera ‘lako ena vakabauta, sega ni ka e raici ena mata.’​—⁠2 Korinica 5:7.

•   “Ni qarauna na qaravi matakau.” (1 Joni 5:​21) E matata mai na ivakaro e soli vei ira na Isireli kei ira na lotu vaKarisito ni sega ni vakadonuya na Kalou me sokaloutaki na ivakatakarakara se tamata.