Na ivalavala ca e sega ni vosoti, oya na ivalavala ca bibi kei na ivakarau ni yalo e vakayacori kina. Qori e vakavuna me sega ni veivosoti na Kalou. E rawa vakacava ni sega ni vosoti nona ivalavala ca e dua?

 Na Kalou ena vosoti ira era veivutunitaka nodra cala, muria nona ivakatagedegede, qai cakacakataka nodra vakabauti Jisu Karisito. (Cakacaka 3:​19, 20) Ia e rawa ni vakatulewataka e dua me cakava tiko ga na ka ca, e sega ni via veisautaka nona rai se ivalavala. O koya va qori e tukuna na iVolatabu ni “ca na lomana,” e “vakaukauataki na lomana ena kaukaua ni ivalavala ca e veibacani.” (Iperiu 3:​12, 13) Na ivakarau ni lomana e dua e via saqata tiko ga na Kalou e vakatauvatani ina qele e sega ni rawa ni tuli kina e dua na ka ni sa kama ena lovo. (Aisea 45:9) E sega ni dua na yavu me vosoti kina o koya qori ni vakayacora na ivalavala ca e sega ni vosoti rawa.​—Iperiu 10:26, 27.

 Era vakayacora eso na iliuliu ni lotu vakaJiu ena gauna i Jisu na ivalavala ca e sega ni vosoti. Era kila ni cakamana o Jisu ena kaukaua ni yalo tabu ni Kalou, ia era kaya ena veibeci ni solia vei Jisu na kaukaua o Setani na Tevoro.​—Marika 3:​22, 28-​30.

iVakaraitaki ni ivalavala ca e rawa ni vosoti

•  Vosavakacacataka na Kalou ena vuku ni lecaika. E dau vosabeca e liu na Kalou na yapositolo o Paula, ia e kaya: “Au lomani baleta niu a lecaika, au vakayacora na ka kece qori niu a se sega ni vakabauta.”​—1​Timoci 1:​13.

•  Veibutakoci. E tukuni ena iVolatabu eso era dau veibutakoci tu ena dua na gauna, era veisautaka nodra ivalavala qai vosoti ira na Kalou.​—1​Korinica 6:​9-​11.

“Au sa vakayacora e dua na ivalavala ca e sega ni vosoti?”

 Ke o cata mai vu ni lomamu nomu ivakarau ca ena gauna sa oti qai via veisau dina, o sega ni vakayacora na ivalavala ca e sega ni vosoti. Ke o sega ni lomaqa mo cakava tiko ga na ka e cata na Kalou, ena vosoti iko o koya ke o sikalutu mada ga vakavica ena dua tiko ga na cala.​—Aisea 1:18.

 Eso era nanuma nira vakayacora na ivalavala ca e sega ni vosoti ni ora tu ga na lomadra ena ka era cakava. Ia e kaya na iVolatabu ni dau veivakaisini na lomada. (Jeremaia 17:9) E sega ni solia vei keda na Kalou na dodonu meda vakalewa e dua, se meda vakalewai keda mada ga. (Roma 14:​4, 12) Ke beitaki keda na lomada, e se rawa ga ni vosoti keda na Kalou.​—1​Joni 3:​19, 20.

Vakacava o Jutasa Isikarioti, a vakayacora na ivalavala ca e sega ni vosoti?

 Io. Nona kocokoco e vakavuna me butakoca na ilavo e cautaki ena dua na cakacaka tabu. E sega ni kauaitaki ira dina na dravudravua, e vinakata ga me kumuni e levu tale na ilavo me rawa ni butakoca. (Joni 12:​4-8) Ni sa vakadeitaka e lomana o Jutasa me cakava na ka ca, e liumuritaki Jisu sara ena 30 na tikinisiliva. E kila o Jisu ni na sega vakadua ni veivutunitaka o Jutasa na ka e cakava, qai vakatokai ni “dodonu me rusa.” (Joni 17:12) Kena ibalebale na ivotavota i Jutasa ena gauna e mate kina na rusa tawamudu, ena sega ni vakaturi.​—Marika 14:21.

 A sega ni vakaraitaka o Jutasa ni veivutunitaka dina nona cala. A sega ni vakatusa vua na Kalou nona cala, e vakatusa ga vei ira na iliuliu ni lotu a tokoni ira ena nodra bukivere.​—Maciu 27:​3-5; 2​Korinica 7:​10.