E laurai vakarua ena iVolatabu na matavosa “Jerusalemi Vou.” Qo na koro ivakatakarakara e vakaibalebaletaki vei ira na ilawalawa era imuri i Jisu, ra qai veiliutaki vata ena Matanitu ni Kalou mai lomalagi. (Vakatakila 3:​12; 21:2) E vakatoka tale ga na iVolatabu na ilawalawa qo me yalewavou i Karisito.

1.   E tiko mai lomalagi. Na gauna kece e cavuti ena iVolatabu na Jerusalemi Vou, ena tukuni kina ni lako sobu mai lomalagi ra qai yadrava tu na agilosi na matamata ni koro. (Vakatakila 3:​12; 21:​2, 10, 12) Na vakaitamera tale ga ni koro e vakadinadinataki ni sega ni rawa ni tiko e vuravura. Na kena raba e “12,000 na sitadia,” se “falogi.” a (Vakatakila 21:16; King James Version) Na tutuna e rauta ni 560 na kilomita (se 350 na maile) na kena cere.

2.   E dusia na ilawalawa era imuri i Jisu era kilai mera yalewavou i Karisito. E vakatokai o Jerusalemi Vou me “yalewavou, na wati ni Lami.” (Vakatakila 21:​9, 10) Na ivakatakarakara qori e dusi koya tiko na Lami o Jisu Karisito. (Joni 1:​29; Vakatakila 5:​12) Na yalewavou i Karisito oya na “wati ni Lami,” e vakaibalebaletaki ira na lotu vakarisito era na duavata kei Jisu mai lomalagi. E vakatauvatana na iVolatabu nodrau veiwekani o Jisu kei ira na lotu vakarisito qori me vaka na veiwatini. (2 Korinica 11:2; Efeso 5:​23-​25) Na yavu tale ga ni vatu kei Jerusalemi Vou e ceuti kina “na yacadratou na 12 na yapositolo ni Lami.” (Vakatakila 21:14) Na ivakamacala qori e kilai kina se tukuni cei tiko o Jerusalemi Vou, qo o ira na lotu vakarisito era kacivi mera lai bula mai lomalagi era “tara cake ena nodra yavu na yapositolo kei na parofita.”​—Efeso 2:​20.

3.   E tiko ena dua na matanitu. Na koroturaga kei Isireli o Jerusalemi makawa, na vanua a veiliutaki kina o Tui Tevita na luve i Solomoni, kei ira nona kawa ena “idabedabe vakaturaga i Jiova.” (1 Veigauna 29:23) E vakatokai o Jerusalemi me “koro tabu,” e vakaibalebaletaka na Matanitu ni Kalou ena yatukawa i Tevita. (Niemaia 11:1) E vakatokai tale ga me “koro tabu” o Jerusalemi Vou,” ra qai lewena na tomani Jisu i lomalagi mera lai ‘veiliutaki mai vakatui e vuravura.’​—Vakatakila 5:​9, 10; 21:2.

4.   Ena vakalougatataki kina o vuravura. E vakamacalataki ni o Jerusalemi Vou e “lako sobu mai vua na Kalou mai lomalagi.” Eda raica kina ni vakayagataki koya na Kalou me baleta eso na ka me vakayacori ena taudaku kei lomalagi. (Vakatakila 21:2) E veisemati gona na Jerusalemi Vou kei na Matanitu ni Kalou, ni vakayagataka sara ga o koya me vakayacora kina nona inaki “e vuravura me vaka e caka tiko mai lomalagi.” (Maciu 6:​10) E okati ena inaki ni Kalou me baleti keda e vuravura na veivakalougatataki qo:

   •   Sereki mai na ivalavala ca. E drodro mai Jerusalemi Vou na “uciwai ni wai ni bula” qai solia na wai ina “kau ni bula” mera “vakabulai kina na veimatanitu.” (Vakatakila 22:​1, 2) Na veivakabulai vakayago, vakayalo tale ga qo ena sereki keda mai na ivalavala ca, meda qai bula uasivi me vaka ga na inaki taumada ni Kalou.​—Roma 8:​21.

   •   Ena vinaka noda veimaliwai kei na Kalou. Eda yawaka na Kalou nida kawa ivalavala ca. (Aisea 59:2) Nida sa sereki mai na ivalavala ca ena qai vakayacori taucoko kina na parofisai qo: “E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou ena tiko vata kei ira.”​—Vakatakila 21:3.

   •   Ena oti na rarawa kei na mate. Na Kalou ena vakayagataka nona Matanitu me “qusia tani  .  na wainimata kece mai na matadra, sa na sega tale na mate, na lolosi, na tagiyaso, kei na mosi.”​—Vakatakila 21:4.