Cava e Vakaibalebaletaka Nona Lako Mai na Karisito?
Kena isau vakaivolatabu
E levu na tikinivolatabu e vakamacalataka nona lako mai na Karisito, qori na gauna ena mai lewai ira kina na tamata e vuravura ena gauna se bera mai. a Kena ivakaraitaki, e kaya na Maciu 25:31-33:
“Ni lako mai na Luve ni tamata [Jisu Karisito] ena nona lagilagi kei ira kece na agilosi, ena qai dabe ena nona idabedabe vakaturaga lagilagi. Era na qai soqoni e matana na veimatanitu kece, ena qai tawasei ira na lewenivanua me vaka ga na nona dau tawasei ira na sipi mai na me na ivakatawa. Ena qai biuti ira na sipi ena ligana imatau kei na me ena ligana imawi.”
Na gauna ni veilewai ena yaco ena “veivakararawataki levu” e se sega ni bau yaco ena ivolatukutuku ni bula ni kawatamata. Ena cava na veivakararawataki levu ena ivalu na Amaketoni. (Maciu 24:21; Vakatakila 16:16) Na me ena vosa vakatautauvata i Jisu e vakatakarakarataki ira na kena meca, era na “lewai mera rusa tawamudu.” (2 Cesalonaika 1:9; Vakatakila 19:11, 15) Ia era na “bula tawamudu” na nona imuri yalodina se o ira era vaka na sipi.—Maciu 25:46.
Gauna cava ena lako mai kina na Karisito?
E kaya o Jisu: “E sega ni dua e kila na siga ya kei na kena aua.” (Maciu 24:36, 42; 25:13) Ia e vakamacalataka na “ivakatakilakila,” eso na ka e laurai ni na yaco tiko me kilai kina ni sa voleka ni lako mai.—Maciu 24:3, 7-14; Luke 21:10, 11.
Ena lako mai o Karisito ena yago vakayago se vakayalo?
A vakaturi o Jisu ena yago vakayalo, kena ibalebale ena lako mai ena yago vakayalo sega ni yago vakayago. (1 Korinica 15:45; 1 Pita 3:18) Sa rauta me kaya o Jisu vei ratou nona yapositolo ni bera nona mate: “Sega ni dede sa na sega ni raici au tale o vuravura.”—Joni 14:19.
Rai cala me baleta nona lako mai na Karisito
Rai cala: E kaya na iVolatabu nira na raica na tamata nona “lako mai ena o.” Kena ibalebale, ena laurai nona lako mai o Jisu.—Maciu 24:30.
Ka dina: Ni cavuti ena iVolatabu na o, e dau dusia e dua na ka e sega ni laurai. (Vunau ni Soro 16:2; Tiko Voli Mai na Lekutu 11:25; Vakarua 33:26) Kena ivakaraitaki, a kaya na Kalou vei Mosese: “Au na lako yani vei iko ena o loaloa.” (Lako Yani 19:9) A sega ni raica dina na Kalou o Mosese. E va tale ga qori na nona ‘lako mai ena o’ na Karisito. Ena kilai ni sa lako mai, ena sega ga ni laurai.
Rai cala: E tukuni ena Vakatakila 1:7 nira “na raici koya na mata kece.” Kena ibalebale era na raica dina na tamata nona lako mai na Karisito.
Ka dina: Na vosa vaKirisi ena iVolatabu ni “mata” kei na “raica,” e vakaibalebaletaki ena so na gauna ina ka e siqemi se kilai, e sega ni raici dina. b (Maciu 13:15; Luke 19:42; Roma 15:21; Efeso 1:18) Ni vakamacalataki Jisu na iVolatabu ni sa vakaturi oti, e kaya: “O koya . . . e tiko ena rarama e sega ni torovi rawa, e sega ni dua na tamata e . . . rawa ni raici koya.” (1 Timoci 6:16) Ni tukuni gona “era na raici koya na mata kece,” kena ibalebale nira na kila na tamata ni o Jisu ena vakatauca na lewa ni Kalou.—Maciu 24:30.
Rai cala: Na vosa e cavuti ena 2 Joni 7 e vakaraitaka ni o Jisu ena lako mai ena yago vakayago.
Ka dina: E kaya na tikinivolatabu qori: “Sa levu na dauveivakacalai e vuravura, o ira na sega ni vakabauta ni a mai tamata o Jisu Karisito.”
Eso era bula ena nona gauna na yapositolo o Joni, era sega ni vakabauta ni bula e vuravura o Jisu ena yago vakatamata. O ira qori era vakatokai na Gnostics. E volai na 2 Joni 7 me vakadinadinataka ni lasu na ka era kaya.
Rawa ni o Wilika Tale ga
SAUMI NA TARO VAKAIVOLATABU
Na iValu Vakacava na Amaketoni?
E laurai ga vakadua ena iVolatabu na vosa Amaketoni, ia na kena itukutuku e vakamacalataki ena iVolatabu taucoko.
SAUMI NA TARO VAKAIVOLATABU
Na Cava na Veivakararawataki Levu?
Na parofisai me baleta na icavacava, e dusia ni na duatani sara na leqa ena tarai vuravura ena gauna qo. Cava gona meda namaka?
IVAKAVUVULI YAGA VAKAIVOLATABU
Tekivu Veiliutaki na Matanitu ni Kalou ena 1914
Ena sivia na 2,600 na yabaki sa oti, e vakavuna na Kalou me raica e dua na tui kaukaua e dua na tadra vakaparofisai sa vakayacori tiko nikua.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.