Na Cava e Kaya na iVolatabu me Baleta na Manumanu na Dinosaur?
Kena isau vakaivolatabu
E sega ni bau cavuti ena iVolatabu na dinosaur. E kaya ga na iVolatabu ni “bulia na ka kece” na Kalou, kena ibalebale e rawa ni wili ena veika e buli na dinosaur. a (Vakatakila 4:11) E sega ni vakamacalataki ira na dinosaur na iVolatabu, ia e vakamacalataki ira vakaiwasewase eso na manumanu e rawa ni wili kina na dinosaur:
“Manumanu vakaitamera ni wasawasa,” se “manumanu rerevaki.”—Vakatekivu 1:21; New American Bible.
“Manumanu kece ni vanua era dau qasi.”—Vakatekivu 1:25.
“Na veimataqali manumanu kila e vuravura.”—Vakatekivu 1:25.
E vu mai na bula vakaidewadewa na dinosaur?
Na bula ni dinosaur e sega ni dewa mai na dua tale na manumanu. E laurai ena ivolatukutuku ni veika bula nira basika vakasauri. E lakovata qori kei na ka e kaya na iVolatabu ni bulia na manumanu kece na Kalou. Kena ivakaraitaki, e tukuni ena Same 146:6 ni Kalou e “Dauveibuli ni lomalagi kei vuravura, na wasawasa, kei na ka kece e tu kina.”
Gauna cava era bula kina na dinosaur?
E kaya na iVolatabu ni buli na manumanu ni wasawasa kei na manumanu ni vanua ena ikalima kei na ikaono ni siga, se donuya na itabagauna ni bulibuli. b (Vakatekivu 1:20-25, 31) Ni laurai na ka e kaya na iVolatabu, e vakabauti nira basika qai bula toka na dinosaur ena loma ni dua na gauna balavu.
E wili me dinosaur na Piemoci kei na Livaiacani?
Sega. E sega ni vakadeitaki se rau manumanu dina vakacava na Piemoci kei na Livaiacani e cavuti ena ivola i Jope. Ia e sa kilai raraba tu na Piemoci me hipo, kei na Livaiacani me korokotaile. Qori e lakovata kei na ivakamacala ni iVolatabu me baleti rau na manumanu e rua. (Jope 40:15-23; 41:1, 14-17, 31) Se mani cava e tukuni, na “Piemoci” kei na “Livaiacani” e sega ni wili me dinosaur. A kaya na Kalou vei Jope me dikeva vinaka na rua na manumanu qori. Gauna e bula kina e vuravura o Jope, sa ra kawaboko makawa na dinosaur.—Jope 40:16; 41:8.
Cava e yacovi ira na dinosaur?
E sega ni tukuna e dua na ka na iVolatabu me baleta nodra kawaboko na dinosaur. Ia e kaya ni buli na ka kece ‘ena lewa ni Kalou,’ kena ibalebale a tiko na inaki ni nona bulia na dinosaur na Kalou. (Vakatakila 4:11) Ni vakayacori oti na inaki qori, a vakatara na Kalou me kawaboko na dinosaur.
a E vakadinadinataki ena ivolatukutuku ni veika bula e vuravura nira bula dina na dinosaur. E laurai ena vakadidike e vakayacori ni a levu ena dua na gauna na dinosaur, e duidui na kedra ibulibuli, eso era ka lelevu, eso e ka lalai.
b Ena iVolatabu, na vosa “siga” e rawa ni dusia na itabagauna e vica vata na udolu na yabaki na kena dede.—Vakatekivu 1:31; 2:1-4; Iperiu 4:4, 11.
Rawa ni o Wilika Tale ga
SAUMI NA TARO VAKAIVOLATABU
E Duavata na ka Vakasaenisi kei na iVolatabu?
E cala na ka vakasaenisi ena iVolatabu?
IVAKAVUVULI YAGA VAKAIVOLATABU
E Buli na Lomalagi kei na Vuravura?
Levu era taura cala na itukutuku ni iVolatabu me baleta na bulibuli se ra nanuma ni itukuni ga. E rawa ni vakabauti na ka e tukuni ena iVolatabu?
ESSENTIAL BIBLE TEACHINGS
Na Cava e Bulia Kina na Kalou na Vuravura?
E roboti vuravura na veika totoka. Donu vinaka na kena yawa mai na matanisiga, e veiraurau vinaka tale ga na kena sowiri, kei na kena vakalakala. Na cava e rui vinakata kina na Kalou me bulia na vuravura?
YADRA!
Ka Dina me Baleta na Bulibuli
E tokona beka na itukutuku ni bulibuli ena iVolatabu na veika vakasaenisi?
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.