Na Masu ni Turaga e vukei keda ena sala meda masu kina, kei na ka meda masulaka. E cavuta na masu qori o Jisu ni ratou kerea nona tisaipeli: “Turaga, vakavulici keitou mada ena ivakarau ni masu.” (Luke 11:1) Ia e sega ni vakadonuya ga na Kalou na Masu ni Turaga. a E vakaraitaka ga o Jisu e dua na ivakarau ni masu e vakadonuya na Kalou.

Ena ulutaga qo

•  Cava e tukuni ena Masu ni Turaga?

•  Cava na kena ibalebale?

•  Vakacava qori ga na sala eda rawa ni masu kina?

•  E dodonu meda masu vakacava?

•  Eso tale na masu e cavuti ena iVolatabu

 Ena so na vakadewa ni iVolatabu e duidui na vosa e cavuti ena Maciu 6:9-13. Qo e rua na kena ivakaraitaki.

 iVakadewa ni Vuravura Vou: “Tamai keimami mai lomalagi, me vakarokorokotaki na yacamuni. Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi. Ni solia vei keimami nikua na kakana e rauti keimami, ni vosota na neimami cala, ni keimami sa vosoti ira era cala vei keimami. Ni kua ni vakatara me keimami rawai ena veitemaki, ia moni vakabulai keimami mai vua na vunica.”

 King James Version: “Tama i keimami mai lomalagi, me vakarokorokotaki na yacamuni. Me yaco na nomuni lewa. Me caka na lomamuni e vuravura me vaka sa caka mai lomalagi. Solia mai vei keimami e na siga oqo na kakana e yaga vei keimami. Ia kakua ni cudruvi keimami e na vuku ni neimami valavala ca, me vaka keimami sa sega ni cudruvi ira era sai valavala ca vei keimami. Ia kakua ni kauti keimami kina vere, ka mo ni vakabulai keimami mai na ca.” b

 Na veika e cavuta o Jisu ena Masu ni Turaga e tautauvata kei na so tale na tikinivolatabu. Dodonu gona meda raica na tikina qori me rawa nida kila vinaka na ibalebale ni Masu ni Turaga.

“Tamai keimami mai lomalagi”

 E veiganiti me vakatokai na Kalou me “Tamai keimami,” ni buli keda qai solia vei keda na bula.—Aisea 64:8.

“Me vakarokorokotaki na yacamuni”

 E dodonu meda vakarokorokotaka qai doka na yaca ni Kalou o Jiova. Eda cakava qori nida tukuna vei ira eso tale na nona itovo, kei na nona inaki.—Same 83:18; Aisea 6:3.

“Me yaco mai na nomuni Matanitu”

 Na Matanitu ni Kalou e matanitu vakalomalagi, qai kena Tui o Jisu. E vakavulici keda o Jisu meda masulaka na matanitu qori me liutaka na vuravura taucoko.—Taniela 2:44; Vakatakila 11:15.

“Me caka na lomamuni e vuravura me vaka e caka tiko mai lomalagi”

 E sega na mate se na veika ca e lomalagi. E nona inaki gona ni Kalou meda bula tawamudu e vuravura, qai vakila na vakacegu kei na sautu.—Same 37:11, 29.

“Ni solia vei keimami nikua na kakana e rauti keimami”

 E dua na kakana yaga na madrai ena gauna i Jisu. Meda nuidei gona ni na solia vei keda na Dauveibuli na kakana, kei na ka meda bula kina.—Cakacaka 17:24, 25.

“Ni vosota na neimami cala, ni keimami sa vosoti ira era cala vei keimami”

 Na tikina wavolita ni vosa “cala,” e vakaibalebaletaka na valavala ca. (Luke 11:4) Eda valavala ca kece, qai vinakati meda vosoti. Ia me rawa ni vosoti keda na Kalou, e dodonu meda tu vakarau ni vosota nodra caka cala vei keda eso tale.—Maciu 6:14, 15.

“Ni kua ni vakatara me keimami rawai ena veitemaki, ia moni vakabulai keimami mai vua na vunica”

 Na Kalou o Jiova e sega vakadua ni vakatovolei keda meda caka ca. (Jemesa 1:13) Ia e vakatovolei keda ga “na vunica” o Setani na Tevoro, e kilai tale ga me “Dauveitemaki.” (1 Joni 5:19; Maciu 4:1-4) Meda kerei Jiova gona me kua ni vakatara meda temaki meda talaidredre vua.

 E vakavulica o Jisu na Masu ni Turaga meda muria, e sega ni dodonu me cavuqaqataki ga. Ni bera ni vakavulica na Masu ni Turaga o Jisu, e kaya: “Ni o masu, kua ni cavuta tiko ga e dua na qaqanimasu.” (Maciu 6:7) Ena dua tale na gauna, e duidui na vosa e vakayagataka o Jisu ni vakavulica na ivakarau ni masu.—Luke 11:2-4.

 Na sala vinaka duadua meda masu kina, ya me vu sara ga mai lomada na vosa eda vakayagataka.—Same 62:8.

 Na Masu ni Turaga e vakavulici keda ena sala meda masu kina me rogoca na Kalou na noda masu. Dikeva na sala e duavata kina na ivakarau ni masu qori kei so tale na tikinivolatabu.

•   Masu ga vua na Kalou

   Tikinivolatabu: “Na ka kece me vakaraitaki vua na Kalou ena masu kei na kerekere salavata kei na vakavinavinaka.”—Filipai 4:6.

   Kena ibalebale: E dodonu meda masu ga vua na Kalou sega vei Jisu, Meri se ira na sanito. Ni tekivuna o Jisu na Masu ni Turaga ena “Tamai keimami,” e dusia ni dodonu meda masu duadua ga vei Jiova.

•   Masulaka na ka e salavata kei na loma ni Kalou

   Tikinivolatabu: “Se cava ga eda kerea me salavata kei na lomana, ena rogoci keda o koya.”—1 Joni 5:14.

   Kena ibalebale: Eda rawa ni masulaka na ka kece e salavata kei na loma ni Kalou. Nona okata o Jisu ena Masu ni Turaga na matavosa “me caka na lomamuni,” eda vulica kina ni bibi duadua na vakayacori ni loma ni Kalou. Nida vulica na iVolatabu eda na kila kina na inaki ni Kalou me baleti keda, kei na vuravura.

•   Masulaka na veika me baleti keda

   Tikinivolatabu: “Biuta vei Jiova na nomu icolacola bibi, ena tokoni iko o koya.”—Same 55:22.

   Kena ibalebale: E kauaitaka na Kalou na veika eda dau leqataka. Me vaka ga e cavuta o Jisu ena Masu ni Turaga, eda rawa tale ga ni masulaka na veika meda bula kina e veisiga, na vakatulewa bibi meda cakava, na ituvaki dredre kei na vosota ni noda ivalavala ca. c