Se sega ni dua vei keda e raica na Kalou. (Lako Yani 33:20; Joni 1:18; 1 Joni 4:2) E kaya na iVolatabu ni “yalo na Kalou,” eda sega ni raica rawa.—Joni 4:24; 1 Timoci 1:17.

 Era raica rawa na Kalou na agilosi nira kabula vakayalo. (Maciu 18:10) Eso tale ga era na raica na Kalou nira vakaturi ena yago vakayalo mera lai bula i lomalagi.—Filipai 3:20, 21; 1 Joni 3:2.

 E dau tukuni ena iVolatabu na rai vakayalo me dusia na veivakararamataki. (Aisea 6:10; Jeremaia 5:21; Joni 9:39-41) Eda rawa gona ni raica na Kalou ena gauna qo ena matada vakayalo nida vakabauti koya, da qai muria nona itovo. (Efeso 1:18) E vakamacalataka na iVolatabu na ka meda cakava meda vaqaqacotaka kina noda vakabauta.

•   Vulica na itovo ni Kalou me vaka nona loloma, lomasavu, vuku kei na kaukaua ena ka e bulia. (Roma 1:20) Ni raica na turaga yalodina o Jope na ka e bulia na Kalou, e vaka sara ga ni tu e matana na Kalou.—Jope 42:5.

•   Vulica na iVolatabu mo kila na Kalou. E vakadeitaka vei keda na iVolatabu, “Ke o qarai koya [Kalou] o na kunei koya.”—1 Veigauna 28:9; Same 119:2; Joni 17:3.

•   Kila na Kalou ena bula i Jisu. Ni muria vinaka o Jisu na itovo i Tamana, na Kalou o Jiova, sa rauta me tukuna: “O koya sa raici au sa raici Tamaqu tale ga.”—Joni 14:9.

•   Nomu ivakarau ni bula me vakamarautaka na Kalou, o na vakadinadinataka nona veitokoni. E kaya o Jisu: “Era marau o ira e savasava na lomadra, nira na raica na Kalou.” Me vaka sa tukuni oti, era na vakaturi i lomalagi eso nira vakamarautaka na Kalou ra qai ‘raici’ koya.—Maciu 5:8; Same 11:7.

 Ena tikinivolatabu e rairai tukuni kina nira raica na Kalou eso, e dusia ni matataka na Kalou na agilosi se rairai ena raivotu.

 Agilosi. Ena gauna makawa, na Kalou e dau talai ira na agilosi mera matataki koya ra qai vosa ena yacana. (Same 103:20) Kena ivakaraitaki, dua na gauna a vosa na Kalou vei Mosese ena vunikau kama, e kaya na iVolatabu ni “vunia na matana o Mosese, ni rere me raica na Kalou dina.” (Lako Yani 3:4, 6) A sega ni raica dina na Kalou o Mosese, baleta ni tukuni ena tikina yavolita ni raica na “agilosi i Jiova.”—Lako Yani 3:2.

 Ni tukuni tale ga ena iVolatabu ni ‘vosa vei Mosese na Kalou e matana se ni rau veiraimata,’ e kena ibalebale ni rau veivosaki. (Lako Yani 4:10, 11; 33:11) E sega ni raica o Mosese na mata ni Kalou, baleta na itukutuku e tukuni vua era ‘vakadewa mai na agilosi.’ (Kalatia 3:19; Cakacaka 7:53) E dei tu ga nona vakabauta na Kalou ni tukuna na iVolatabu, e vaka ga e “raici koya tiko e tawarairai.”—Iperiu 11:27.

 E vosa tale ga na Kalou vei Eparama ni talai ira na agilosi me vaka ga nona vosa vei Mosese. Na imatai ni gauna o wilika kina na iVolatabu o na rairai nanuma ni raica dina na Kalou o Eparama. (Vakatekivu 18:1, 33) E vakaraitaka na tikina yavolita ni “tolu na turaga” ratou lako vua e talai ratou mai na Kalou. E mani vosa vei ratou me vaka ga e vosa vei Jiova.—Vakatekivu 18:2, 3, 22, 32; 19:1.

 Raivotu. E dau rairai na Kalou ena raivotu se tadra. Kena ivakaraitaki, ni tukuni ena iVolatabu ni “raica na Kalou ni Isireli” o Mosese kei ira na Isireli, kena ibalebale nira “raica na Kalou dina ena raivotu.” (Lako Yani 24:9-11) Ena so na gauna e cavuti ena iVolatabu nira “raici Jiova” na parofita. (Aisea 6:1; Taniela 7:9; Emosi 9:1) E tukuni ena veitikinivolatabu qori ni ratou raivotutaka na Kalou, ratou sega ni raici koya dina.—Aisea 1:1; Taniela 7:2; Emosi 1:1.