Na Cava na Kena iBalebale Mo ‘Rokovi Tamamu kei Tinamu’?

SARAVA/ROGOCA

Kena isau vakaivolatabu

E cavuti vakalevu ena iVolatabu na ivakaro mo “rokova na tamamu kei na tinamu.” (Lako Yani 20:12; Vakarua 5:16; Maciu 15:4; Efeso 6:2, 3) E va na ka e okati ena ivakaro qori.

Vakavinavinaka. Vakavinavinakataka na veika rau cakava ena vukumu na nomu itubutubu, qori e vakaraitaka ni o rokovi rau. O rawa ni vakaraitaka nomu vakavinavinaka ena nomu vakamareqeta nodrau ivakasala. (Vosa Vakaibalebale 7:1, 2; 23:26) E kaya na iVolatabu nira “isakisaki” na itubutubu, kena ibalebale e dodonu mo sakitaki rau na tamamu kei na tinamu.—Vosa Vakaibalebale 17:6.
Talairawarawa. E soli vakalou na lewa e tu vei rau na nomu itubutubu. Ke o nanuma tiko qori ena gauna o se gone kina, o na rokovi rau na tamamu kei na tinamu. Oni vakasalataki na gone ena Kolosa 3:20: “Ni talairawarawa vei ira na nomuni itubutubu ena ka kece, ni marautaka qori na Turaga.” O Jisu mada ga e dau talairawarawa vei rau na nona itubutubu ni se gone.—Luke 2:51.
Veidokai. (Vunau ni Soro 19:3; Iperiu 12:9) E dodonu me veidokai na ka o tukuna, kei na ivakarau ni nomu vosa. Eso na ka era cakava na itubutubu ena rairai vakadredretaka nodra dokai. Ia e se bibi tiko ga mera rokovi ira nodra itubutubu na gone, mera kua ni dau veibeci ena nodra vosa kei na itovo. (Vosa Vakaibalebale 30:17) E kaya na iVolatabu ni dua na cala bibi na nodra vosavakacacataki na tama kei na tina.—Maciu 15:4.
Veivuke. Erau na rairai vinakata na veivuke na nomu itubutubu ni rau sa qase. O rokovi rau na nomu itubutubu ni o vukei rau ena ka rau vinakata. (1 Timoci 5:4, 8) Kena ivakaraitaki, a tataunaki tinana o Jisu vua e dua ena gauna sa voleka kina ni mate.—Joni 19:25-27.

Rai cala me baleta nodra rokovi na itubutubu

Rai cala: O rokovi rau na nomu itubutubu ni o solia vei rau na galala me rau vakatulewa ena nomu vakawati.

Ka dina: E kaya na iVolatabu ni sa na sega ni vakaliuci ira nona itokani se wekana o koya e vakawati. E kaya na Vakatekivu 2:24: “Ena biuti tamana . . . kei tinana o tagane, ena kabiti watina.” (Maciu 19:4, 5) E rawa ni rau kere ivakasala na veiwatini vei rau na nodrau itubutubu se vugodrau. (Vosa Vakaibalebale 23:22) Ia erau na sega ni solia na galala vei ira na wekadrau mera vakatulewa ena nodrau vakawati.—Maciu 19:6.

Rai cala: Dodonu me rau lewa na ka kece na itubutubu.

Ka dina: E solia vei rau na itubutubu na Kalou na galala me rau lewa nodrau vuvale. Ia e vakaiyalayala na lewa e soli vua na tamata, o koya e lewa na ka kece na Kalou. Kena ivakaraitaki, eratou kaya na tisaipeli i Jisu ni ratou vakaroti me ratou talaidredre vua na Kalou: “E dodonu me keitou talairawarawa ga vua na Kalou ni iliuliu, sega vua na tamata.” (Cakacaka 5:27-29) Era na talairawarawa tale ga na gone vei ira na itubutubu “me vaka na loma ni Kalou,” se na ka kece e sega ni veisaqasaqa kei na lawa ni Kalou.—Efeso 6:1.

Rai cala: O rokovi rau na tamamu kei na tinamu ni o muria nodrau vakabauta vakalotu.

Ka dina: E veiuqeti na iVolatabu meda vakatovolea na veika eda vulica, meda raica ke dina na ka eda vakavulici kina se sega. (Cakacaka 17:11; 1 Joni 4:1) Qori e rawa ni vakavuna noda sega ni muria nodra vakabauta vakalotu na noda itubutubu. Era cavuti ena iVolatabu eso na tamata yalodina ni Kalou era sega ni muria na lotu ni nodra itubutubu, kena ivakaraitaki o Eparama, Ruci, kei na yapositolo o Paula.—Josua 24:2, 14, 15; Ruci 1:15, 16; Kalatia 1:14-16, 22-24.

Rai cala: Ke o rokovi rau nomu itubutubu, o na vakaitavi ena solevu era vakalomavinakataki kina na wekamu era sa mate.

Ka dina: E kaya na iVolatabu: “E dodonu mo sokalou vei Jiova na nomu Kalou, me vakatabakidua vua na nomu veiqaravi tabu.” (Luke 4:8) Na Kalou e sega ni taleitaki koya e vakalomavinakataki ira na wekana era sa mate. E kaya tale ga na iVolatabu ni “o ira na mate era sega sara ga ni kila e dua na ka.” Io, era sega ni kila na ka e caka mera vakalomavinakataki kina, era sega ni rawa ni vukei ira na se bula tiko se vakaleqai ira.—Dauvunau 9:5, 10; Aisea 8:19.