Vakacava e Yaga na iVakasala Vakaivolatabu Niu Via Vakamatei au Ga?
Kena isau vakaivolatabu
Io! Na iVolatabu e vakavuna “na Kalou e dau vakacegui ira na yalolailai.” (2 Korinica 7:6) E sega ni ivola ni vuniwai, ia e dusimaki ira e levu mera kua ni vakamatei ira ga. E rawa ni yaga tale ga vei iko na kena ivakasala.
Na ivakasala yaga cava e tiko ena iVolatabu?
● Talaucaka na lomamu.
Ka e kaya na iVolatabu: “Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.
Kena ibalebale: Eda vinakata nodra veitokoni eso tale ke da lomabibitaka voli e dua na ka.
Ke o kubuta lo tiko nomu leqa, ena rawa ni vakavuna e levu tale na leqa. Ia ena rawa ni vakalailaina na leqa ke o talaucaka na lomamu, ena vukei iko tale ga me dau donu nomu rai.
Tovolea mada qo: Veitalanoa kei na dua, nomu itokani nuitaki se lewe ni vuvale. a Vola na ka e tu e lomamu.
● Kere ivakasala.
Ka e kaya na iVolatabu: “E sega ni yaga na vuniwai vei ira na bula vinaka, e yaga ga vei ira na tauvimate.”—Maciu 9:12.
Kena ibalebale: Meda qara na veivuke vakavuniwai e vinakati ena gauna eda tauvimate kina.
Noda via vakamatei keda e ivakatakilakila ni tauvimate ni vakasama se lomabibi. Me vaka ga nida tauvimate, e sega ni dodonu meda madua. Eda rawa ni vukei ena ituvaki va qori.
Tovolea mada qo: Kere ivakasala vei ira na vuniwai ena kena gauna totolo duadua.
● Nanuma tiko ni kauaitaki iko na Kalou.
Ka e kaya na iVolatabu: “Vakacava e sega ni volitaki e lima na siparo ena rua na ilavo lailai? Ia na Kalou e sega ni guilecava e dua vei ratou. . . . Dou kua gona ni rere ni dou uasivi ira na siparo.”—Luke 12:6, 7.
Kena ibalebale: O talei vua na Kalou.
De dua o na galili, ia na Kalou e raica vinaka tu na veika o sotava tiko. E kauaitaki iko, ke o sega mada ga ni taleitaka na bula. E kaya na Same 51:17: “Na uto e kavoro qai bibivoro, kemuni na Kalou, oni na sega ni cata.” E lomani iko na Kalou, qai vinakata mo bula.
Tovolea mada qo: Vakadinadinataka ena iVolatabu ni lomani iko na Kalou. Kena ivakaraitaki, o na raica ena wase 24 ni ivola ni vuli iVolatabu Toro Voleka Vua na Kalou.
● Masu vua na Kalou.
Ka e kaya na iVolatabu: “Moni biuta vua [na Kalou] na nomuni lomaocaoca kece, ni kauaitaki kemuni o koya.”—1 Pita 5:7.
Kena ibalebale: E sureti keda na Kalou meda talaucaka, qai tukuna vua na ka dina me baleta na ka eda lomabibitaka tiko.
Ena rawa ni solia vei iko na Kalou na lomavakacegu kei na kaukaua mo vosota na ituvaki qori. (Filipai 4:6, 7, 13) Ena rawa ni vukei keda o koya nida kaci yani nida vinakata dina nona veivuke.—Same 55:22.
Tovolea mada qo: Masu vua na Kalou. Vakayagataka na yacana o Jiova, qai tukuna vua na ka o vakila tiko. (Same 83:18) Kerei koya me vukei iko mo kua ni soro.
● Vakasamataka vakatitobu na inuinui e vakarautaka tu na iVolatabu me baleta na veigauna se bera mai.
Ka e kaya na iVolatabu: “Na inuinui qo e ikelekele ni noda bula, e dei qai kaukaua, e tuberi keda tale ga meda lakosivita na ilati.”—Iperiu 6:19.
Kena ibalebale: Ena rawa ni veiveisau na ivakarau ni lomada me vaka na waqa soko tu ena gauna ni draki ca, ia e vakarautaka na iVolatabu na inuinui ena rawa ni vukei keda meda dei.
Na inuinui qori e sega ni ka ni tatadra wale ga, ia e yavutaki ena vosa ni yalayala ni Kalou me vakaotia vakadua na mosi.—Vakatakila 21:4.
Tovolea mada qo: Vulica eso tale na inuinui ena iVolatabu ni o wilika na lesoni 5 ni brochure iTukutuku Vinaka Mai Vua na Kalou!
● Cakava e dua na ka o taleitaka.
Ka e kaya na iVolatabu: “Na yalomarau e wai vinaka.”—Vosa Vakaibalebale 17:22.
Kena ibalebale: Nida cakava na ka e vakamarautaki keda, qori ena vukea na ivakarau ni noda vakasama kei na lomada.
Tovolea mada qo: Cakava e dua na ka o taleitaka vakalevu. Kena ivakaraitaki, vakarogoca na sere e veiuqeti, wilika e dua na ka e veivakayaloqaqataki, se vakaitavi ena dua na ka ni veivakamarautaki. O na marau tale ga vakalevu ke o vukei ira eso tale, ena ka lalai mada ga o cakava.—Cakacaka 20:35.
● Qarauna nomu bula.
Ka e kaya na iVolatabu: “Ni yaga . . . na vakaukaua yago.”—1 Timoci 4:8.
Kena ibalebale: E yaga na vakaukaua yago, moce vinaka, kei na kana kakana bulabula.
Tovolea mada qo: Mo taubale, kaya me 15 mada ga na miniti.
● Nanuma tiko ni dau veiveisau na ivakarau ni lomada kei na so tale na ka ena noda bula.
Ka e kaya na iVolatabu: “Oni sega mada ga ni kila se na vakaevei na nomuni bula nimataka.”—Jemesa 4:14.
Kena ibalebale: E vakaiyalayala ga na leqa e dau vakavuna noda lomabibi.
Se mani vakacava sara tu mada na ca ni ituvaki nikua, ena rawa ni veisau qori nimataka. Qara na sala mo walia kina. (2 Korinica 4:8) Toso na gauna ena rawa ni veisau na kemu ituvaki. Ia ni o vakamatei iko, o na sega ni veisautaka rawa qori.
Tovolea mada qo: Wilika na kedra italanoa eso ena iVolatabu era yalolailai ena dua na gauna era via vakamatei ira, raica tale ga na veiveisau era cakava, era sega mada ni namaka. Dikeva mada qo e vica na kena ivakaraitaki.
Cava e kaya na iVolatabu me baleti ira na via mate?
Io. E volatukutukutaki kina nodra kaya eso, “Au via mate.” E sega ni cudruvi ira na Kalou, ia e tu vakarau me vukei ira. Ena rawa ni cakava tale ga qori vei iko.
Ilaija
● Kena itukutuku E dua na parofita doudou, ia eso na gauna e dau yalolailai. E kaya na Jemesa 5:17, “E tamata ga vakataki keda o Ilaija.”
● Na cava e via mate kina? Dua na gauna, a galili o Ilaija, rere qai nanuma ni tawayaga nona bula. E mani kerea: “Kemuni Jiova, moni kauta tani na noqu bula.”—1 Tui 19:4.
● Cava e vukei koya? E talaucaka na lomana vua na Kalou. E qai vakayaloqaqataki koya vakacava na Kalou? E kauaitaki koya qai vakaraitaka vua nona kaukaua. E vakadeitaka vei Ilaija ni tiko na kena yaga, e vakarautaka tale ga e dua na dauveiqaravi yaga qai dau veikauaitaki.
▸ Wilika na kena italanoa o Ilaija: 1 Tui 19:2-18.
Jope
● Kena itukutuku E turaga vutuniyau qai yalodina vua na Kalou.
● Na cava e via mate kina? E veisau vakasauri nona bula me lai ca sara. E kau tani vua na ka kece e taukena. Era mate kece na luvena ena dua na leqa tubukoso qai tauvi koya e dua na mate rerevaki. Oti e beitaki vakailasu ni vakavuna ga nona leqa. E kaya o Jope : “Au sa cata noqu bula, au sega ni via bula tiko.”—Jope 7:16.
● Cava e vukei koya? E masu vua na Kalou qai talaucaka na lomana vei ira na nona itokani. (Jope 10:1-3) E vakayaloqaqataki koya e dua na nona itokani dauveinanumi o Ilaiu, qai vukei koya me donu nona rai. Kena ikuri, e marau ni muria na veivuke kei na ivakasala ni Kalou.
▸ Wilika na kena italanoa o Jope: Jope 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mosese
● Kena itukutuku E nodra iliuliu na Isireli makawa, e parofita yalodina tale ga.
● Cava e via mate kina? E levu na itavi e qarava, e vakalewai qai dau oca. E tagi vua na Kalou: “Yalovinaka ni vakamatei au ga.”—Tiko Voli Mai na Lekutu 11:11, 15.
● Cava e vukei koya? E talaucaka na lomana vua na Kalou. E vukei koya na Kalou qai vakamamadataka nona icolacola.
▸ Wilika na kena italanoa o Mosese: Tiko Voli Mai na Lekutu 11:4-6, 10-17.
a Ke o vakasamataka vakalevu mo vakamatei iko qai sega ni dua e vukei iko, rawa ni o qirita na tabana ni veivuke se emergency number.
Rawa ni o Wilika Tale ga
RA TAROGA NA ITABAGONE
Vakacava Keu Via Vakamatei Au?
Qo e va na sala e rawa ni vukei iko mo kua ni vakasamataka mo sa tinia na nomu bula.
NA VALE NI VAKATAWA
E Rawa ni Marautaki na Bula?
Sa bau sotava oti e dua na ituvaki leqataki, e lomatarotarotaki kina ke vakainaki na bula?
ESSENTIAL BIBLE TEACHINGS
Na cava e Vakatara Tiko Kina na Kalou na Rarawa?
Levu era vakataroga na cava sa rui levu kina na veicati kei na rarawa. E tiko ena iVolatabu na kena isau veivakacegui.
VAKAMACALATAKI NA TIKINIVOLATABU
iVakamacala ni Filipai 4:6, 7—“Moni Kua ni Lomaocaocataka e Dua na Ka”
Na ivakarau ni masu cava ena vukei keda meda kua ni lomaleqa qai vakila na vakacegu?
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.