Raica mada eso na vakatutu qo, e yavutaki ena ivakasala yaga ena iVolatabu:

1.   Qarauna nomu itovo. Dau kauaitaki ira na nomu itokani vakacakacaka, dokai ira tale ga. Ia qarauna na mataqali veikauaitaki e rawa ni nanumi cala kina ni o na vakaio ke vinakata e dua mo drau veiyacovi.​—Maciu 10:16; Kolosa 4:6.

2.   Me rakorako nomu isulusulu. Na isulu veivagarogaroi e rawa ni vakavurea na rai cala. E veiuqeti na iVolatabu ena isulusulu “e rakorako, me laurai kina na yalomatua.”​—1 Timoci 2:9.

3.   Digia vinaka na nomu itokani. Ke o veimaliwai kei ira era dau wede se ra dau veitemaki ena veiyacovi, e rawa ni vakayacori tale ga vei iko na ivalavala qori.​—Vosa Vakaibalebale 13:20.

4.   Cata na vosa vakasisila. Tatau vinaka ga o biubiu sara ke o raica ni sa caka “na veivosaki e vakasisila, se na veiwali ca.”​—Efeso 5:4.

5.   Yadrava na ituvaki o rawa ni temaki kina. Kena ivakaraitaki, qaqarauni ke o sureti mo tiko tale e vanua ni cakacaka ke sa gauna ni suka, qai sega ni dua na vuna vinaka mo tiko tale kina.​—Vosa Vakaibalebale 22:3.

6.   Yalodei qai vosa vakadodonu. Ke vakayacori vei iko na veivakasagai tawakilikili, vakaraitaka vakadodonu vei koya e veivakasagai ni o sega ni taleitaka na nona ivalavala. (1 Korinica 14:9) Kena ivakaraitaki, o rawa ni kaya: “Au sega ni taleitaka ni o dau drigiti au. Kua tale ni cakava ya.” O rawa ni volavola vei koya e dau veivakasagai tawakilikili, vakamacalataka na ka e yaco, na nomu rai, kei na ka o sa vakatulewataka. Vakamatatataka ni o yavutaka nomu vakatulewa ena ivakarau ni bula savasava o muria kei na nomu vakabauta vakalotu.​—1 Cesalonaika 4:​3-5.

7.   Kere veivuke. Ke sega ni oti na veivakasagai, talaucaka na nomu leqa vua e dua na nomu itokani nuitaki, lewe ni vuvale, itokani vakacakacaka se dua e kenadau ena nodra vukei o ira era vakasagai. (Vosa Vakaibalebale 27:9) Era raica e levu era sotava na ituvaki qori ni veivuke sara vakalevu na masu. Ke o sega mada ga ni dau masu, e se rawa ga ni vukei iko o Jiova “na Kalou e dau vakacegui keda ena ka kece.”​—2 Korinica 1:3.

 E veivakaleqai tiko vakalevu ena vanua ni cakacaka na veivakasagai tawakilikili, ia e tu ena iVolatabu na ivakasala yaga.