“E sega ni dua na veivakatovolei e yacovi kemuni me duatani mai na kena era dau sotava na kena vo. Ia e dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.”—1 Korinica 10:13, Vakadewa ni Vuravura Vou.

 “Sa sega na vere tani sa yaco vei kemudou, o koya ga sa vorata rawa na tamata. Ia sa yalodina na Kalou o koya ena sega ni laivi kemudou mo dou dauveretaki vakalevu cake, me vaka ga na nomudou kaukauwa, ka na cakava talega kei na vere na sala mo dou dro kina, mo dou vosota rawa.”—1 Korinica 10:13, New King James Version.

 Na tikinivolatabu qori e vakamacalataka na itovo talei ni Kalou, na nona yalodina. E rawa nira nuitaka na dausokalou yalodina na nona veivuke nira sotava na veitemaki se ituvaki dredre.

 “E sega ni dua na veivakatovolei e yacovi kemuni me duatani mai na kena era dau sotava na kena vo.” E rawa nira temaki na dauveiqaravi ni Kalou mera cakava na ka e vakacudrui koya. Ena rairai dredre toka, ia e levu era sa sotava qori. a Mera nuidei gona ni rawa tale ga nira vosota na ituvaki va qori.

 “E dau dina na Kalou.” Na Kalou o Jiova b e nuitaki qai dei. E dina ena nona yalayala ni na sega ni biuti ira na lomani koya, ra yalodina qai talairawarawa vua. (Vakarua 7:9; Same 9:10; 37:28) E rawa gona nira nuidei o ira na sokaloutaki koya ni na vakayacora tale ga na rua na vosa ni yalayala veiuqeti qo.

 “Na sega ni vakalaiva moni sotava na ka ni veivakatovolei oni na sega ni taqea rawa.” Nona yalodina na Kalou e sega ni vakalaiva kina meda sotava na ituvaki ena dredre meda vosota. E kila vinaka na ka eda rawa ni cakava, kei na ka eda sega ni rawa ni cakava.—Same 94:14.

 “Ni oni vakatovolei, ena vakarautaka tale ga na sala moni vosota rawa kina.” Na Kalou e rawa ni tarova na veivakatovolei, se vukei ira nona dauveiqaravi mera vosota na ituvaki qori. Kena ivakaraitaki, e rawa ni vukei ira ni vakarautaka nona yalo tabu, veivakacegui ena iVolatabu se na nodra veivuke o ira era vakabauta vata.—Joni 14:26; 2 Korinica 1:3, 4; Kolosa 4:11.

 Na tikinivolatabu qori e tiko ena nona ivola na yapositolo o Paula vei ira na lotu vaKarisito e Korinica. E vola vei ira na nodra ivakaraitaki na Isireli me rawa nira vuli kina. (1 Korinica 10:11) E vola eso na ka ni veivakatovolei kei na veitemaki era sotava na Isireli, wili kina na qaravi matakau kei na veiyacovi tawadodonu. (1 Korinica 10:6-10) Eso era rawai ena veitemaki qori. Sa qai vakayagataka o Paula na nodra ivakaraitaki mera vuli kina na lotu vaKarisito e Korinica, ya mera kua ni nuitaki ira vakasivia se mera nanuma nira sega ni rawa ni temaki. (1 Korinica 10:12) Ia e vakadeitaka vei ira na ka e tukuna ena 1 Korinica 10:13, ni o ira na dausokalou yalodina e rawa nira vosota na ituvaki cava ga.

 Sarava na ivakamacala lekaleka ni ivola na 1 Korinica.