“Sa rauti iko vinaka na noqu loloma soli wale, ni na qai taucoko na noqu kaukaua ena nomu malumalumu.”—2 Korinica 12:9, Vakadewa ni Vuravura Vou.

 “Sa rauti iko na noqu loloma, ni sa vakalevui na noqu kaukaua, ni sa malumalumu e dua.”—2 Korinica 12:9, New International Version.

 E yalataka na Kalou me solia vua na yapositolo o Paula na kaukaua me rawa ni vosota na ituvaki dredre, qai cakava na ka e sega ni rawata.

 “Sa rauti iko vinaka na noqu loloma soli wale.” Na vosa e cavuta qori na Kalou vei Paula e rawa ni vakaibalebaletaka tale ga, “ena rauti iko wale ga na noqu loloma.” Kena ibalebale, na loloma soli wale ni Kalou e rawa ni vukei koya me vosota na veika dredre. Ena sala cava? Na vosa e vakadewataki me “loloma soli wale,” se “loloma,” e kena ibalebale e dua na iloloma e solia wale na Kalou. Na ka e vola o Paula e vakaraitaka ni yaga vakalevu vua na nona loloma soli wale na Kalou. Dina ni dauveitusaqati e liu, ia na Kalou e solia vua na kaukaua me veisautaka nona itovo qai vukei ira eso tale mera lotu vaKarisito. (1 Korinica 15:9, 10; 1 Timoci 1:12-14) Qori e vukei koya me nuitaka dei na veivuke ni Kalou, qai vosota na leqa se ituvaki dredre e sotava.

 “Ni na qai taucoko na noqu kaukaua ena nomu malumalumu.” E kaya na Turaga o Jiova a vei Paula ni na laurai na nona kaukaua vei ira na tamata ivalavala ca. (2 Korinica 4:7; 12:8) Nira kila na lotu vaKarisito ni vakaiyalayala na ka era rawata ra qai qara na veivuke i Jiova, era sa vakalaiva tiko na kaukaua ni Kalou me vukei ira tiko ga. (Efeso 3:16; Filipai 4:13) E laurai na kaukaua ni Kalou ena noda malumalumu.

 E vola o Paula na ivola uqeti vakalou qo vei ira na lotu vaKarisito e Korinica rauta na 55 G.V. E vakamacalataka ena itinitini ni nona ivola ni tiko vua na dodonu me dua na yapositolo. Na vuna? Baleta eso era kaya nira qasenivuli era dau vakalewai koya, de dua era vakalewa na kena irairai se ivakarau ni nona vosa.—2 Korinica 10:7-10; 11:5, 6, 13; 12:11.

 E sabaya qori o Paula ni vakamacalataka ni sega ni rawata ena nona kaukaua ga na ka e rawata ena cakacaka vakavunau, kei na nona vosota e levu na veivakatovolei. (2 Korinica 6:4; 11:23-27; 12:12) Ena wase 12, e cavuta e dua na vosa vakatautauvata ni votonikau e votoki koya voli, qori e vakaibalebaletaka na rarawa kei na mosi e vakila ena leqa e sotava. (2 Korinica 12:7) E sega ni tukuna o Paula na leqa e sotava tiko, ia e vosota rawa ga ena veivuke ni Kalou.

 Nikua e rawa tale ga nira sotava na lotu vaKarisito na ituvaki dredre, kei na veivakacacani. Ia era lomavakacegu nira kila ni kaukaua ga ni Kalou e vukei ira mera vosota na ituvaki dredre cava ga. Me vakataki Paula, era rawa ni tukuna ena nuidei: “Niu malumalumu, au sa qai kaukaua.”—2 Korinica 12:10.

 Sarava na ivakamacala lekaleka ni ivola na 2 Korinica.