“Oni na maroroi ira na dau ravi vei kemuni, oni na vakacegui ira tiko ga, nira nuitaki kemuni.”—Aisea 26:3, Vakadewa ni Vuravura Vou.

 “Oni na vakacegui koya dina e lomadei vei kemuni, ni sa nuitaki kemuni.”—Aisea 26:3, New International Version.

 Na vosa ni veivakadeitaki e cavuta qori na parofita o Aisea, e vakaraitaka ni Kalou ena taqomaki ira na nuitaki koya. Ena vakanuideitaki ira, e solia tale ga vei ira na vakacegu.

 “Oni na maroroi ira na dau ravi vei kemuni.” Na matavosa qori e vakaibalebaletaki ira na nuitaka na Kalou o Jiova a mai vu ni lomadra ena veigauna kece. Era kila ni dodonu mera nuitaki koya. Kena ivakaraitaki, nira vakatulewataka eso na ka bibi, era na sega ni nuitaka ga na ka era nanuma. Ia era na yavutaka na ka kece era cakava ena rai ni Kalou. (Vosa Vakaibalebale 3:5, 6) Era kila na rai ni Kalou me baleta e dua na ituvaki nira wilika vinaka na nona Vosa na iVolatabu, ra qai vakasamataka vakatitobu na ka era wilika. (Same 1:2; 119:15) Nira sotava na ituvaki dredre, era masu vagumatua vei Jiova qai kerea nona veivuke. (Same 37:5; 55:22) E dei kina na nodra nuitaka na Kalou, e solia tale ga vei ira na lomavakacegu.

 “Oni na vakacegui ira tiko ga.” Ena vosa taumada vakaIperiu e laurai vakarua na vosa “vakacegu,” e dusia ni vakabibitaki tiko. Na vosa qori e rawa ni kena ibalebale “vakacegui tiko ga,” “vakacegu dina,” se “bula vakacegu.” Kena ibalebale, o ira na nuitaki Jiova vakatabakidua era na vakila tu ga na lomavakacegu se mani vakacava na ituvaki era sotava. (Same 112:7; 119:165) E rawa ga qori nira veivolekati kei Jiova, ra qai cakava na ka e donu e matana.—Vosa Vakaibalebale 3:32; Aisea 48:18.

 Na nodra “vakacegui tiko ga” na dauveiqaravi ni Kalou e sega ni kena ibalebale nira na sega ni sotava na veika dredre. (1 Samuela 1:6, 7; Jope 6:1, 2; Same 31:9) Ia na Kalou ena vukei ira ga mera vosota. (Aisea 41:10, 13) E sauma nodra masu, solia vei ira na vuku, kaukaua kei na vakacegu. (Same 94:19; Vosa Vakaibalebale 2:6; Aisea 40:29) Cava na kena yaga? Era lomavakacegu tu ga ena gauna mada ga era sotava kina na ituvaki dredre.—Filipai 4:6, 7.

 A bula na parofita o Aisea ena ikawalu ni senitiuri B.G.V. E levu era tiko e Juta ena gauna qori kei na veiyabaki tarava, era sega ni yalodina nodra qaravi Jiova. E mani vakatara o Jiova me vakarusai na nodra koroturaga o Jerusalemi ena 607 B.G.V.

 Ia ni vo e vica vata na drau na yabaki me vakarusai na koroturaga qori, sa vola o Aisea na sere vakaparofisai ni vakavinavinaka vei Jiova ena wase 26. (Aisea 26:1-6) E vakamacalataki kina ni dua koro ena vanua o Juta ena taravaki tale ena gauna mai muri, e kena irairai ni o Jerusalemi.

 Ni oti e vica na yabaki, e qai taravaki tale o Jerusalemi ena 537 B.G.V. Na ka e yaco qori, era vakila na Jiu yalodina era lesu tale ina nodra vanua nira taqomaki, ra qai kaya: “E dua na neimami koro kaukaua.” (Aisea 26:1) Ia e sega ni vu ni nodra kaukaua na bainikoro. Era vakila ga na vakacegu ena nona veitaqomaki o Jiova kei na nona veivakalougatataki.—Aisea 26:2.

 E va tale ga qori nikua. Era na taqomaki o ira na nuitaki Jiova nira raici koya me nodra “Uluvatu,” se idrodro.—Aisea 26:4.

 Sarava na ivakamacala lekaleka ni ivola na Aisea.