“Ia o ira na nuitaki Jiova era na vakaukauataki tale. Era na vuka e tabadra me vaka na ikeli. Era na cici era na sega ni wawale, era na taubale era na sega ni oca.”—Aisea 40:31, iVakadewa ni Vuravura Vou.

 “Ia ko ira era sa waraka na TURAGA era na vakaukauwataki tale; era na cabe cake me vaka era vakatabadra vakaikeli; era na cici, ka sega ni oca, era na lako tu, ka sega ni malumalumu.”—Aisea 40:31, New King James Version.

 E vakadeitaka na Kalou o Jiova a vei ira nona dauveiqaravi, ni na solia vei ira na kaukaua mera vosota na veika dredre cava ga era na sotava.

 “O ira na nuitaki Jiova era na vakaukauataki tale.” O ira era nuitaka vakaoti na kaukaua ni Kalou, e rawa nira vakararavi vua me tokoni ira. (Vosa Vakaibalebale 3:5, 6) Dua na sala e vakauakauataki ira kina nona dauveiqaravi na Kalou, ya ni solia vei ira nona yalo tabu se igu tawarairai.—Luke 11:13.

 “Era na vuka e tabadra me vaka na ikeli.” Na vosa vakatautauvata qori e vakaraitaka na ka ena vakila e dua ena kaukaua e solia vua na Kalou. E dau vaqara na ikeli na viko ni cagi katakata. Ni sa kunea e dua, ena vakatetaba me kauti koya cake sara i macawa na cagi qori. E sega ni nuitaka na ikeli na igu e tu vua me vuka tubu se vakanawanawa voli kina e macawa me dua na gauna balavu.

 “Era na cici era na sega ni wawale.” E rawa ni veivakayalolailaitaki qai vakamalumalumutaki keda, na ituvaki dredre eda sotava ena gauna qo. Ia na kaukaua e solia na Kalou ena vukei keda meda vosota, da qai cakava tiko ga na ka e dodonu. Na yapositolo o Paula e vosota na ituvaki dredre, e kaya: “Au rawata na ka kece ena vuku i koya e vakaukauataki au.”—Filipai 4:13.

 Na Kalou e dusimaki Aisea me vola na veivosa qo ena ikawalu ni senitiuri B.G.V. E yaga kece vei ira na dauveiqaravi yalodina ni Kalou na tikinivolatabu qo. Kena irairai, ni cavuta o Jiova na vosa qo me vakayaloqaqataki ira na Jiu era na kau vakavesu i Papiloni me 70 na yabaki. Era qai vakadinadinataka na Jiu na vosa qori ena gauna era sereki mai kina. (Aisea 40:1-3) E solia vei ira na Kalou na kaukaua mera muria na gaunisala balavu qai rerevaki b mai Papiloni i Jerusalemi ena 537 B.G.V.—Aisea 40:29.