“O yau o Jiova. Qori na yacaqu; Au sega ni solia na noqu lagilagi vua e dua tale, se na noqu vakacaucautaki ina ivakatakarakara ceuti.”—Aisea 42:8, Vakadewa ni Vuravura Vou.

“Koi au na TURAGA; sai koya oqo na yacaqu; ia na vakarokoroko me caka vei au ka’u na sega ni solia vua e dua tani; se na vakavinavinaka me caka vei au ki na matakau ceuceu.”—Aisea 42:8, King James Version.

E tukuna vei keda na Kalou na yacana, e kaya tale ga ni na sega ni solia na nona lagilagi kei na nona vakacaucautaki ena ivakatakarakara ceuti.

Na Kalou ga e vakayacani koya, qai dau vakadewataki vakalevu ena vosa vakaViti me “Jiova.” a (Lako Yani 3:14, 15) E volai voleka ni vaka 7,000 na yaca ni Kalou ena Veiyalayalati Makawa (iVolatabu vakaIperiu kei na vakaAramea), ia e levu na vakadewa era sa sosomitaka ena icavuti na “TURAGA” (ena matanivola lelevu). Kena ivakaraitaki na parofisai ena Same 110:1, e cavuti kina o Jiova kei Jisu. Qo na ka e volai ena King James Version: “Sa kaya ko TURAGA [Jiova] vua na noqu Turaga [Jisu].” (Cakacaka 2:34-36) E sega ni vakavu veilecayaki na Vakadewa ni Vuravura Vou, ni vakalesuya na yaca ni Kalou ena vanua ga e dodonu me tiko kina. E volai kina: “E kaya o Jiova vua na noqu Turaga: ‘Dabe ena ligaqu imatau meu vakamalumalumutaki ira mada na kemu meca mera itutu ni yavamu.’”

Era vakabauta e levu na dauvakadidike ni ibalebale ni yaca ni Kalou “O Koya e Vakavuna me Yaco.” Qori ena dusi koya ga na Kalou dina. Ni o koya ga e rawa ni cakava na ka ga e vinakata me yaco kina na nona inaki, se rawa ni vakayagataka e dua na nona ibulibuli me cakava qori.

Ni buli keda o Jiova qai Kalou dina duadua ga, e dodonu meda sokaloutaki koya vakatabakidua. E sega ni dua tale na tamata se dua tale na ka meda na sokaloutaka, okati kina na ivakatakarakara se matakau.—Lako Yani 20:2-6; 34:14; 1 Joni 5:21.

E parofisaitaka o Jiova ena itekitekivu ni Aisea wase 42, na ka ena cakava o koya e “digitaka.” E kaya na Kalou ni na vakayacora na nona dauveiqaravi e vakadonuya na “lewadodonu ina veimatanitu.” (Aisea 42:1) E kaya na Kalou me baleta na vosa ni yalayala qori: “Qo au tukuna tiko na ka vovou. Ni bera ni tubu, au sa tukuna oti vei kemuni.” (Aisea 42:9) Na parofisai me baleti koya e “digitaka,” e yaco ni oti e vicavata na senitiuri na nona lako mai na Mesaia se Karisito, kei na nona vakayacora na nona cakacaka vakaitalatala e vuravura.—Maciu 3:16, 17; 12:15-21.

“O yau o Jiova, qori na yacaqu; au sega ni solia na noqu lagilagi vua e dua tale, se na noqu vakacaucautaki ena ivakatakarakara ceuti.”—The ‘Holy Scriptures,’ by J. N. Darby.

“O yau o Jiova, qori na yacaqu, Au na sega ni solia na noqu lagilagi vua e dua tale, se na Noqu vakacaucautaki ena ivakatakarakara ceuti.”—A Literal Translation of the Bible.