“Dou na rawata na kaukaua ni sobuti kemudou na yalo tabu, dou na qai tukuni au e Jerusalemi, e Jutia taucoko, e Samaria, kei na veivanua yawa sara kei vuravura.”—Cakacaka 1:8, Vakadewa ni Vuravura Vou.

 “Dou na rawata na kaukauwa, ni sa lako mai vei kemudou na Yalo Tabu; dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.”—Cakacaka 1:8, New King James Version.

 E yalataka o Jisu vei ira nona imuri ni yalo tabu ena vakaukauataki ira mera vunau ena veivanua yawa sara kei vuravura.

 “Dou na rawata na kaukaua ni sobuti kemudou na yalo tabu.” E vakadeitaka o Jisu vei ira nona imuri ni yalo tabu ni Kalou a ena vukei ira ena gauna e lesu kina i lomalagi. (Joni 14:16, 26) Ena 33 G.V., ni oti e tini na siga nona lesu i lomalagi o Jisu, e sobuti ira nona imuri na yalo tabu. (Cakacaka 2:1-4) E sega wale ga ni vukei ira na yalo tabu mera vosataka na veimataqali vosa se cakamana. Ia e vukei ira tale ga mera vunautaka ena doudou nodra vakabauti Jisu.—Cakacaka 3:1-8; 4:33; 6:8-10; 14:3, 8-10.

 “Dou na qai tukuni au.” Ni vakadewataki na vosa “tukuni,” e kena ibalebale nona tukuna e dua na ka e raica se sotava. Ratou raica sara ga na yapositolo na bula i Jisu, ratou vakadinata kina ena so na ituvaki e yaco ena nona cakacaka vakaitalatala, nona mate kei na nona vakaturi. (Cakacaka 2:32; 3:15; 5:32; 10:39) Na nodratou ivakadinadina matata era mai vakabauta kina e levu ni o Jisu na Karisito, na Mesaia yalataki. (Cakacaka 2:32-36, 41) Io, era vakadinadinataki Jisu ra vunautaka tale ga na ibalebale ni nona bula, nona mate kei na nona vakaturi.—Cakacaka 17:2, 3; 18:5.

 “Na veivanua yawa sara kei vuravura.” Na matavosa qori e rawa ni vakadewataki tale ga me “iyalayala kei vuravura,” se “ena so tale na vanua.” E laurai ena vosa i Jisu na rabailevu ni vanua era na tukuni koya kina na nona imuri. Era na lako ena veivanua yawa e Jutia kei Samaria mera vunautaka kina na ka era vakabauta. Ni vakatauvatani kei Jisu, ena levu sara na yalava era na vunau kina ra kunei ira tale ga e levu. (Maciu 28:19; Joni 14:12) Ni oti e rauta ni 30 na yabaki nona cavuta o Jisu na vosa qori, e vola na yapositolo o Paula ni sa “vunautaki” na itukutuku vinaka me baleti Jisu “vei ira na kabuli kece e ruku i lomalagi.” Ena veivanua yawa sara me vakataki Roma, Paricia (cevaicake ni Wasa na Caspian), kei Noca Aferika.—Kolosa 1:23; Cakacaka 2:5, 9-11.

 E vakamacalataki i liu ena ivola na Cakacaka na ka vata ga e volai ena icavacava ni Kosipeli i Luke. (Luke 24:44-49; Cakacaka 1:4, 5) E vola na ivola ruarua qori na yapositolo o Luke. E tekivu ni vakamacalataka nona rairai o Jisu vei ratou nona imuri ni oti nona vakaturi. (Cakacaka 1:1-3) E tukuna sara na kena tauyavu na ivavakoso vaKarisito, kei na kena tubu mai na veiyabaki ni 33 G.V ina 61 G.V.—Cakacaka 11:26.

 E laurai ena tikina wavolita na Cakacaka 1:8 nodratou lomatarotarotaka na imuri i Jisu ke ratou na veiliutaki vakatui ena Matanitu ni Kalou ena gauna ratou se bula tiko kina. (Cakacaka 1:6) Ia sa qai tukuna vei ratou o Jisu me ratou kua ni kauaitaka vakasivia na gauna ena tauyavu kina na Matanitu ni Kalou. (Cakacaka 1:7) Me ratou kauaitaka ga na nodratou vunautaki koya “ena veivanua yawa sara kei vuravura.” (Cakacaka 1:8) Qori tale ga na ka era cakava tiko na lotu vaKarisito nikua, era gugumatua ni vunautaka na itukutuku vinaka ni Matanitu ni Kalou.—Maciu 24:14.

 Sarava na ivakamacala lekaleka ni ivola na Cakacaka.