“Au rawata na ka kece ena vuku i koya e vakaukauataki au.”—Filipai 4:13, iVakadewa ni Vuravura Vou.

 “Au sa rawata na ka kecega, e na vuku i Karisito, o koya sa vakaukauwataki au.”—Filipai 4:13, New King James Version.

 A vola na vosa qori na yapositolo o Paula. E vakadeitaka kina vei ira na dauveiqaravi ni Kalou ni na soli vei ira na kaukaua mera vakayacora na inaki ni Kalou.

 E tukuni ena so na vakadewa ni iVolatabu, ni o Karisito e solia na kaukaua vei Paula. Ia na vosa “Karisito,” e sega ni kune ena ivolavivigi makawa duadua vaKirisi. E levu gona na ivakadewa ni iVolatabu ena gauna qo, era vakayagataka na vosa “vuku i koya e vakaukauataki au” (iVakadewa ni Vuravura Vou), “o koya e solia vei au na kaukaua” (New International Version), kei “o koya e ivurevure ni noqu kaukaua” (New American Bible). Ia o cei ga e vakaibalebaletaka tiko o Paula?

 E laurai ena tikina yavolita ni vakaibalebaletaka tiko o Paula na tikinivolatabu qo vua na Kalou. (Filipai 4:6, 7, 10) A vola mada ga ena nona ivola vei ira e Filipai: “Na Kalou sara ga . . . e cakacaka tiko vei kemuni . . . moni cakava sara ga.” (Filipai 2:13) Ena 2 Korinica 4:7, e vola tale ga kina ni Kalou e solia vua na kaukaua me vakaotia kina nona cakacaka vakaitalatala. (Vakatauvatana 2 Timoci 1:8.) Sa rauta me kaya o Paula ni Kalou ga e ‘vakaukauataki koya.’

 Cava e vakabalebaletaka o Paula ni vola ena vakaukauataki “ena ka kece”? De dua e vakaibalebaletaka na duidui tuvaki ena sotava ni vakayacora tiko na inaki ni Kalou. Ke mani levu se lailai na ka e tu vua me bula kina, e nuitaka tu ga ni na vakacegui koya na Kalou. E vulica kina o Paula me lomavakacegu ena ituvaki cava ga e sotava.—2 Korinica 11:23-27; Filipai 4:11.

 Na vosa e cavuta qo o Paula ena rawa ni vakayaloqaqataki ira na dauveiqaravi ni Kalou nikua. Na Kalou ena solia vei ira na kaukaua me rawa nira vosota na ituvaki dredre, ra qai vakayacora na nona inaki. Ena vakaukauataki ira ni vakayagataka nona yalo tabu se igu tawarairai, ira era vakabauta vata kei na nona Vosa na iVolatabu.—Luke 11:13; Cakacaka 14:21, 22; Iperiu 4:12.

 Na vosa qo e itinitini tiko ni nona ivola o Paula vei ira na lotu vaKarisito mai Filipai. A volai rauta na 60 ina 61 G.V., qori na imatai ni gauna a vesu kina e Roma. E sega ni kilai na balavu ni gauna era sega kina ni tokoni Paula vakailavo na lotu vaKarisito e Filipai. Ia qo era sa vakauta vua eso na ka ni loloma me vukei koya.—Filipai 4:10, 14.

 Dua na ka nona vakavinavinakataki ira na lotu vaKarisito e Filipai o Paula ena nodra lomasavu, e vakadeitaka tale ga vei ira ni sa tiko na ka e gadreva. (Filipai 4:18) E vakayagataka tale ga na gauna qori, me tukuna vei ira na ka e bibi vua e dua na lotu vaKarisito. O ira kece na lotu vaKarisito era vutuniyau, se dravudravua e rawa nira vakila na vakacegu dina ke ra nuitaka na veivuke ni Kalou.—Filipai 4:12.