“Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.”—Filipai 4:6, 7, Vakadewa ni Vuravura Vou.

 “Dou kua ni lomaocaoca, ia ena ka kece me vakatakilai vua na Kalou na nomudou kerekere ena masu, kei na cikecike kei na vakavinavinaka. Na vakacegu ni Kalou e uasivia na ka kece ga e kilai rawa, ena taqomaka na yalomudou kei na lomamudou ena vuku i Karisito Jisu.”—Filipai 4:6, 7, New International Version.

 Nira lomaleqa se taqaya na dauveiqaravi ni Kalou e rawa nira vakacegui nira masu vua na Kalou. E yalataka ni na vakacegui ira, vukei ira tale ga mera vosota, qai taqomaka nodra vakasama kei na lomadra. E vakamacalataki ena tikina e 6, e vica na ivakarau ni masu e rawa ni veivakacegui.

 Na vakamamasu, oya na noda masu mai vu ni lomada meda kerea nona veivuke na Kalou. E rawa nida vakamamasu vua nida lomaleqa se rarawa me vaka e cakava o Jisu. (Iperiu 5:7) E dau cavuti wasoma na masu va qori.

 Na masu ni kerekere, oya na noda vakamatatataka vua na Kalou na ka eda kerea. O ira na qaravi koya e rawa nira kerea “na ka kece,” se “dua ga na ka.” Ia me vaka e tukuni ena iVolatabu e dodonu me salavata na loma ni Kalou na veika era kerea.—1 Joni 5:14.

 Na masu ni vakavinavinaka, oya na noda vakavinavinakataka na Kalou na ka sa cakava, kei na ka ena cakava ena vukuda. Eda na marau nida vakasamataka na veika meda vakavinavinakataka vua.—1 Cesalonaika 5:16-18.

 Ena sauma na Kalou na noda masu ni solia vei keda na vakacegu. Na “vakacegu ni Kalou,” oya na vakacegu e vakila e dua ni vinaka nona veiwekani kei koya. (Roma 15:13; Filipai 4:9) Qori “e uasivia na vakasama kece” ni vu sara ga mai vua na Kalou, ena vukei keda tale ga ena sala eda sega ni namaka.

 E kaya na tikinivolatabu qori ni rawa ni taqomaka na lomada na vakacegu ni Kalou. Na vosa vaKirisi “taqomaka,” e dau vakayagataki ena mataivalu. E dusia nodra lesi eso na sotia mera taqomaka na koro ena gauna makawa. E va tale ga qori nida vakila e lomada kei na noda vakasama na vakacegu ni Kalou. Eda na sega kina ni lomaocaoca se yalolailai.

 Na vakacegu ni Kalou ena taqomaki keda ena “vuku i Karisito Jisu.” E vukuna ga eda rawa ni veiwekani voleka kina kei na Kalou. E solia o Jisu nona bula me isoro ni noda ivalavala ca. Eda na vakalougatataki tale ga ke da vakabauti koya. (Iperiu 11:6) Rawa tale ga nida torova na Kalou ena vuku i Jisu, me vaka e kaya: “Ena vukuqu ga ena qai torovi Tamaqu rawa kina e dua.”—Joni 14:6; 16:23.

 A vola na yapositolo Paula na ivola na Filipai vei ira na lotu vaKarisito era tiko ena siti o Filipai. a Ena wase 4 e uqeti ira na ivavakoso mera marau, e vakavinavinakataka tale ga nodra lomasavu ni qori e dau vakamarautaki koya. (Filipai 4:4, 10, 18) E vakaraitaka tale ga na sala eda na vakila kina na vakacegu ni Kalou nida masu, kei na ka meda vakasamataka da qai cakava me rawa ni vukei keda na “Kalou ni vakacegu.”—Filipai 4:8, 9.