“Meu tinia raveitacini, ni dau vakananuma na ka kece ga e dina, na ka kece ga e bibi, na ka kece ga e dodonu, na ka kece ga e savasava, na ka kece ga e uqeta na veilomani, na ka kece ga e rogo vinaka, na ka kece ga e kilikili, kei na ka kece ga e ganita me vakacaucautaki.”—Filipai 4:8, iVakadewa ni Vuravura Vou.

 “Meu tinia, na veiwekani, a ka kece ga sa dina, na ka kece ga e vakaturaga, na ka kece ga e dodonu, na ka kece ga e savasava, na ka kece ga e daulomani, na ka kece ga e rogorogo vinaka; ia kevaka sa dua na ka e vinaka, se na ka e daudokai, dou nanuma na veika oqo.”—Filipai 4:8, New International Version.

 E kauaitaka na Kalou na ka eda dau vakasamataka, baleta nida dau cakava na ka eda vakasamataka. (Same 19:14; Marika 7:20-23) O ira gona na via vakamarautaka na Kalou e dodonu mera cata na vakanananu e cata na Kalou, qai vakasamataka na veika e vakadonuya.

 E cavuti ena tikinivolatabu qo e walu na ka vinaka mera “dau vakananuma” na lotu vaKarisito. Ena vinakati mera vakamatauna na veika qo.

•   “Dina.” Qo e dusia na ka e dodonu qai nuitaki, me vaka na idusidusi e volai ena iVolatabu.—1 Timoci 6:20.

•   “Ka kece ga e bibi.” Qo e dusia na veika era bibi dina. E sega ni ka lailai ga, se me raici vakamamada. Nira vakasamataka na veika qori ena uqeti ira mera cakava na veika e dodonu.—Taito 2:6-8.

•   “Dodonu.” E bibi me yavutaki na noda vakatulewa, kei na ka eda cakava ena ivakatagedegede ni Kalou. Me kua ga ni yavutaki ena vuku vakatamata.—Vosa Vakaibalebale 3:5, 6; 14:12.

•   “Savasava.” Na vosa qori e dusia ni dodonu me savasava na noda vakasama kei na noda inaki ena ka kece, sega ni ka ga e vauca na veiyacovi.—2 Korinica 11:3.

•   “Veilomani.” Qori e dusia na ka kece ga e vinaka, e uqeta na veilomani, qai sega ni vakavuna na veicati, cudru se veileti.—1 Pita 4:8.

•   “Rogo vinaka.” Na vosa qori e dusia na veika ena vinaka kina na kena irogorogo e dua. Era na taleitaka tale ga o ira na talairawarawa vua na Kalou.—Vosa Vakaibalebale 22:1.

•   “Kilikili.” Qori e dusia na ka kece e rakorako se savasava, me salavata kei na ivakatagedegede ni Kalou. E vinaka vakaoti, se sega ni vakamelei rawa.—2 Pita 1:5,9.

•   “Vakacaucautaki.” E dusia e dua na ka e ganita me vakavinavinakataki. E okati kina na cakacaka lagilagi ni Kalou e bibi meda dau vakasamataka na tamata.—Same 78:4.

 E vola na ivola qori na yapositolo o Paula vei ira na lotu vaKarisito e Filipai, ena gauna e vakatabui kina me biuta nona vale e Roma. Ia era kaya na daunitukutuku makawa ni iVolatabu, na ivola qori e “ivola ni marau.” Baleta e vakayagataki kina na vosa ni loloma, kei na veikauaitaki.—Filipai 1:3, 4, 7, 8, 18; 3:1; 4:1, 4, 10.

 O Paula e lomani ira na mataveitacini e Filipai, qai vinakata mera vakila tale ga na marau kei na vakacegu e vakila tiko. (Filipai 2:17, 18) Ena itinitini ni nona ivola, e uqeti ira mera bucina na itovo e uqeta na marau, mera yalorawarawa, ra qai vakararavi vua na Kalou ena masu. Mera vakasamataka tale ga na veika ena uqeta nodra lomavakacegu, kei na nodra veiyaloni kei na Kalou.—Filipai 4:4-9.

 Sarava na ivakamacala lekaleka ni ivola na Filipai.