“Na vakabauta oya noda vakadeitaka e lomada ni na yaco dina na ka eda nuitaka, na noda raica tale ga na ivakadinadina e vakaraitaka ni tiko dina na ka e sega ni raica na matada.”—Iperiu 11:1, iVakadewa ni Vuravura Vou.

 “Na vakabauta oya noda nuidei ni na vakayacori na ka eda nuitaka, na ivakadinadina ni veika e tawaraici.”—Iperiu 11:1, King James Version.

 E volai ena tikinivolatabu qo na ivakamacala matata duadua ni vakabauta. E sega ni dusia noda vakabauta wale tu ga na ka.

 “Na vakabauta oya noda vakadeitaka e lomada ni na yaco dina na ka eda nuitaka.” Ni laurai na vosa vaKirisi e volai kina na Iperiu 11:1, na vosa “vakabauta” e tiko kina na vakasama ni nuidei, e nuitaki, e veirawai tale ga. E sega ni yavutaki ena ka eda tatadrataka tu ga me na yaco, ia eda “vakadeitaka e lomada.” Na vosa vaKirisi ni “vakadeitaka e lomada,” a e rawa ni vakadewataki me “ivola ni vakadei.” Kena ibalebale, o koya e vakabauta ena nuidei ni na yaco na ka e vakabauta.

 “Na vakabauta oya . . . noda raica tale ga na ivakadinadina e vakaraitaka ni tiko dina na ka e sega ni raica na matada.” Na vakabauta e yavutaki ena ivakadinadina matata. E vakadeitaka sara ga vua e dua ni dina na ka e vakabauta, ke sega mada ga ni raica.

 E vola na yapositolo o Paula na ivola na Iperiu ena imatai ni senitiuri vei ira na lotu vaKarisito era tiko e Jerusalemi kei na veivanua voleka. Ena wase 11, e vakamacalataka o Paula na bibi ni vakabauta. Kena ivakaraitaki, e vola: “Ke sega na vakabauta eda na sega ni vakamarautaka rawa na Kalou, ni o koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.” (Iperiu 11:6) Ni vakamacalataka oti o Paula na vakabauta ena Iperiu 11:1, e tukuni ira sara na tagane, kei na yalewa ena iVolatabu era vakaraitaka na vakabauta. E vakamacalataka na sala era vakaraitaka kina na vakabauta nira cakava na loma ni Kalou.—Iperiu 11:4-38.