IVAKAMACALA NI TIKINIVOLATABU
Jeremaia 11:11—“Au na Vakayacora Vei Ira na Ca”
“Ia qo na ka e kaya o Jiova, ‘Au na kauta yani vei ira na ca era na sega ni drovaka rawa. Nira kere veivuke mai vei au, au na sega ni rogoci ira.’”—Jeremaia 11:11, iVakadewa ni Vuravura Vou.
“O koya oqo sa kaya kina ko Jiova, Raica, au na vakayacora vei ira na ca, ka ra na sega ni dro tani rawa mai kina, era na qai tagi vei au, ia ka’u na sega ga ni rogoci ira.”—Jeremaia 11:11, King James Version.
iBalebale ni Jeremaia 11:11
E vosa tiko na Kalou vei ira na Jiu ena gauna i Jeremaia na parofita. Era talaidredre ena lawa dodonu i Jiova a qai beca na nodra veivakadodonutaki vakayalololoma na nona parofita. E kaya tiko gona o Jiova ni na sega ni taqomaki ira ena itinitini ca ni nodra ivakarau.—Vosa Vakaibalebale 1:24-32.
“Ia qo na ka e kaya o Jiova.” Na vosa “ia” e semata na iyatuvosa i liu kei na kena e tarava. Ena Jeremaia 11:1-10, e kaya vei ira nona tamata o Jiova nira sa beca na veiyalayalati, se veidinadinati era cakava na tukadra kei Jiova. (Lako Yani 24:7) Era sa sega ni sokaloutaka na Dauveibuli, era sa qarava ga na matakau. Nodra vukitani qori e kauta mai e levu na veika ca, wili kina na nodra cabori na gone ena bukawaqa!—Jeremaia 7:31.
“‘Au na kauta yani vei ira na ca.” E levu na gauna ni kaya na iVolatabu ni cakava e dua na ka o Jiova, e vakaibalebaletaka tiko na ka e vakalaiva me yaco. E dua sara ga na kena ivakaraitaki na tikinivolatabu qo. Eda kila vakacava? Nira qarava na Jiu na kalou lasu qai beca nona ivakatagedegede dodonu, era vakavuna vakataki ira e levu na nodra leqa. Sa sega tale ga ni taqomaki ira na Kalou. E mani valuti Jerusalemi e dua na meca kaukaua, ya na tui Papiloni. E kauti ira vakavesu tale ga na lewenivanua. E sega ni vakabulai ira rawa na kalou lasu era vakanuinui kina.—Jeremaia 11:12; 25:8, 9.
“Nira kere veivuke mai vei au, au na sega ni rogoci ira.” O Jiova e sega ni dau rogoca na nodra masu e ‘lomoci na ligadra ena dra,’ se o ira na vakanuinui ena kalou lasu me vakabulai ira. (Aisea 1:15; 42:17) Ia e dau rogoci ira na veivutunitaka dina nodra ivakarau ca qai yalomalumalumu ni lesu vua.—Aisea 1:16-19; 55:6, 7. b
Tikina Wavolita na Jeremaia 11:11
Ena 647 B.G.V., e lesi Jeremaia o Jiova me nona parofita. E 40 na yabaki nona vakasalataki ira tiko na lewe i Juta o Jeremaia ena ka ena cakava o Jiova ke ra talaidredre. Ia era sega ni via rogoca. Qori sara ga na gauna a vola kina na parofita qo na ka e tukuni ena Jeremaia 11:11. Cava e qai yaco? Ena 607 B.G.V., e yaco dina na parofisai qori ni vakarusai Jerusalemi o Papiloni.—Jeremaia 6:6-8; 39:1, 2, 8, 9.
E vakamacalataki tale ga ena ivola i Jeremaia e dua na itukutuku marautaki. E kaya o Jiova: “Ni cava na 70 na yabaki e Papiloni, . . . au na vakayacora vinaka na noqu vosa ni iyalayala meu vakalesui kemuni mai ena vanua qo [nodra vanua na Jiu].” (Jeremaia 29:10) E “vakayacora vinaka” o Jiova nona yalayala ena 537 B.G.V., ni ravuti Papiloni o Mitia kei Perisia. E vakatara o Jiova mera lesu na nona tamata ina nodra vanua mera tauyavutaka tale na sokalou savasava, dina ga nira sa veiseyaki tu ena veivanua e lewa o Papiloni.—2 Veigauna 36:22, 23; Jeremaia 29:14.
Sarava na ivakamacala lekaleka ni ivola na Jeremaia.
a Jiova, qori na vakaviti ni va na matanivola vakaIperiu ni yaca ni Kalou. Mo kila na vuna era vakayagataka kina e levu na vakadewa ni iVolatabu na icavuti Turaga ra qai sega ni vakayagataka na yaca ni Kalou, wilika na ulutaga “O Cei o Jiova?”
b Na iVolatabu vakaIperiu e dau kilai tale ga me Veiyalayalati Makawa, a volai ena vosa vakaIperiu kei na Arame.
Rawa ni o Wilika Tale ga
VAKAMACALATAKI NA TIKINIVOLATABU
Jeremaia 29:11 iVakamacala—“Au Kila na ka au Nanuma Tiko me Baleti Iko”
E tiko na nona inakinaki na Kalou vei keda yadua?
ESSENTIAL BIBLE TEACHINGS
E Rogoca na Masu Kece na Kalou?
Vakacava ke dua e nanumi koya ga ena nona masu? Vakacava ke vakalolomataki watina e dua na tagane, oti qai kerea me vakalougatataki koya na Kalou?
IVAKAVUVULI YAGA VAKAIVOLATABU
E Vakadonuya na Kalou na iVakatakarakara ena Sokalou?
Vakacava eda na veivolekati kei na Kalou tawarairai ke da vakayagataka na matakau, se ivakatakarakara?
SAUMI NA TARO VAKAIVOLATABU
Ena Rawa ni Vakacegui Ira na Rarawataka Nodra Cala na iVolatabu?
E rawa ni vakaleqai iko nomu rarawataka vakasivia nomu cala, ia qo e tolu na ka ena vukei iko.
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
