“Mo masuti au, au na rogoci iko, au na tukuna totolo vei iko na ka lelevu kei na ka dredre o sega ni kila.”—Jeremaia 33:3, Vakadewa ni Vuravura Vou.

 “Mo masuti au, au na rogoci iko ka vakatakila vei iko na ka lelevu kei na ka dredre o sega ni kila.”—Jeremaia 33:3, New International Version.

 Na vosa qori e dusia nona veisureti na Kalou vei ira na tamata mera masu vua. Ena vakaraitaka vei ira na ka ena yaco ena gauna se bera mai, ke ra ciqoma nona veisureti qai masu vua.

 “Mo masuti au, au na rogoci iko.” Na matavosa “masuti au” e sega ni kena ibalebale noda kaciva se kailavaka na yaca ni Kalou. E vakaibalebaletaka ga noda masu vua na Kalou meda kerea nona veivuke kei na nona veidusimaki.—Same 4:1; Jeremaia 29:12.

 E kena irairai na veisureti qo e baleti ira tiko na Isireli makawa. Era biuti Jiova a ra qai vakarerei vei ira na mataivalu ni Papiloni. (Jeremaia 32:1, 2) O Jiova sa qai uqeti ira mera lesu vua nira masuti koya.

 “Au na tukuna . . . vei iko na ka lelevu kei na ka dredre o sega ni kila.” E ‘dredre meda kila’ (se, dredre ni kilai ) na ka e yalataka na Kalou, baleta e sega ni rawa nida kila ga vakataki keda. Na matavosa ‘dredre me kilai’ e rawa tale ga ni vakadewataki me “ka vuni.”

 Na “ka vuni” cava ena vakaraitaka na Kalou? Na veika ena yaco ena gauna se bera mai, ya na kena vakarusai kei na vakalalai ni koro makawa o Jerusalemi, kei na kena taravaki tale. (Jeremaia 30:1-3; 33:4, 7, 8) Ia e yalataka tale ga na Kalou nira na sega ni ravuti me vaka e dua na matanitu na nona dauveiqaravi.—Jeremaia 32:36-38.

 A cavuta na vosa qori o Jiova vua na parofita o Jeremaia ena 608 B.G.V., donuya na ikatini ni yabaki ni nona veiliutaki o Tui Setekaia. E parofisaitaka o Jeremaia ni na bale o Jerusalemi, ena kau vakavesu tale ga o Setekaia. E sega ni taleitaka na tui na itukutuku qori e mani vesuki Jeremaia.—Jeremaia 32:1-5; 33:1; 37:21.

 Ni yaco tiko na ituvaki qori sa qai cavuta na Kalou vei ira na ka e volai ena Jeremaia 33:3. Ia e levu era sega ni via rogoca na nona veisureti, wili kina o Tui Esekaia. (Jeremaia 7:26; 25:4) Era sega ni kerea ena masu nona veidusimaki na Kalou. Oti e dua na yabaki e vakadrukai o Setekaia, vakarusai o Jerusalemi ra qai kau vakavesu e levu i Papiloni.—Jeremaia 39:1-7.

 Na ka e cavuti ena Jeremaia 33:3 eda vulica kina ni Kalou ena solia na “kilaka dodonu me baleta na nona inaki,” qai vakatakila na “veika titobu” vei ira na masuti koya qai vulica nona Vosa na iVolatabu. (Kolosa 1:9; 1 Korinica 2:10) Na veika titobu qori e okati kina na veika e yalataka na Kalou ni na cakava ena gauna se bera mai.—Vakatakila 21:3, 4.

 Sarava na ivakamacala lekaleka ni ivola na Jeremaia.