IVAKAMACALA NI TIKINIVOLATABU
Josua 1:9—“Mo Yaloqaqa mo Kaukaua”
“Vakaevei au a sega ni vakaroti iko? Mo yaloqaqa mo kaukaua. Mo kua ni domobula se rere ni tokoni iko o Jiova na nomu Kalou ena vanua kece o lakova.”—Josua 1:9, iVakadewa ni Vuravura Vou.
“Au sa sega li ni vakaroti iko kina? Mo kaukaua ka qaqa. Mo kakua ni rere se yalolailai, ni sa tiko vata kei iko na TURAGA na nomu Kalou ena veiyasana kece ga ko sa lako kina.”—Josua 1:9, New International Version.
iBalebale ni Josua 1:9
O Josua e dua na dauveiqaravi yalodina ni Kalou e sotava e levu na ka dredre. E nanuma ni na sega ni walia rawa eso na ituvaki, ia e tukuna vua o Jiova a me ‘yaloqaqa qai kaukaua.’ Ke talairawarawa o Josua ina ivakaro i Jiova ena sega ni lomaleqataka na veika ena yaco ni na tokoni koya tu ga o Jiova. E cakava qori ni dusimaki Josua, e tokoni koya tale ga me qaqa ni ravuti ira na kena meca.
E rawa vakacava vei Josua me ‘yaloqaqa qai kaukaua’? Ena rawa ni vakayaloqaqataki koya na ivola uqeti vaKalou e vakarautaka o Jiova ena gauna ya. Qori e okati kina na ‘Lawa kece e vakaroti koya kina o Mosese na tamata i Jiova.’ b (Josua 1:7) O Jiova e vakaroti Josua me “wilika toka e ra [“vakasamataka vakatitobu,” New International Version] ena siga kei na bogi.” (Josua 1:8) Nona wilika qai vakasamataka vakatitobu o Josua na lawa i Jiova, e vakayaloqaqataki koya me cakava na loma ni Kalou. Qori ena uqeti koya me cakava na ka e vulica ena Vosa ni Kalou, me “muria vinaka na ka kece e volai kina.” Qori ena vakavukui koya, ena rawata vinaka tale ga na ka kece e sasagataka. Io, e qai yaco dina qori. Levu na ituvaki dredre e sotava o Josua, ia nona yalodina tiko ga vei Jiova e lomavakacegu qai marautaka nona bula.—Josua 23:14; 24:15.
E rawa tale ga ni vakayaloqaqataki keda nikua na veika e tukuna o Jiova vei Josua. Eda vulica kina na levu ni nona lomani ira nona tamata o Jiova, vakabibi ena gauna era sotava kina na ituvaki dredre. E vinakata tale ga mera marau me vakataki Josua! Io, ke ra dau wilika na Vosa ni Kalou, vakasamataka vakatitobu, qai muria na kena veidusimaki era na ‘yaloqaqa qai kaukaua.’
iKotokoto ni Josua 1:9
Oti nona mate o Mosese, e lesi Josua o Jiova me liutaki ira na Isireli. (Josua 1:1, 2) Ena gauna qori era sa vakanamata tu na Isireli mera gole ina Vanua Yalataki, e Kenani. Ia e levu na kedra meca kaukaua. Kena ivakaraitaki, e vinakati vei Josua me ravuti ira na kai Kenani e torosobu nodra ivakarau. c (Vakarua 9:5; 20:17, 18) Era le levu sara na kai Kenani, e vinaka tale ga nodra iyaragi ni valu ni vakatauvatani kei ira na Isireli. (Josua 9:1, 2; 17:18) Ia e yaloqaqa ni muria o Josua na ivakaro i Jiova. E laurai ni tokoni ira tiko ga na Isireli na Kalou nira ravuti ira e levu na kedra meca ena loma ga ni ono na yabaki.—Josua 21:43, 44.
a Na yaca Jiova ena vosa vakaIperiu e volai ena va na matuavosa—יהוה (YHWH), e kilai me Tetragrammaton. Na tikinivolatabu qo ena New International Version e vakayagataki “na TURAGA.” Ena ikuri ni vakamacala me baleti Jiova, kei na vuna era sega ni vakayagataka kina na yacana eso na ivakadewa ni iVolatabu, raica na ulutaga “O Cei o Jiova?”
b Na ivola uqeti vaKalou a wilika o Josua sa tu tale ga vei keda nikua ena iVolatabu. E rairai okati kina e lima na ivola e vola o Mosese (Vakatekivu, Lako Yani, Vunau ni Soro, Tiko Voli Mai na Lekutu, kei na Vakarua), na ivola i Jope, dua se rua na Same.
c Mo kila na vuna e yaco kina na ivalu ena gauna ya, raica na ulutaga vakavalagi “Why Did God Wage War Against the Canaanites?” January 1, 2010 The Watchtower.
Rawa ni o Wilika Tale ga
VAKAMACALATAKI NA TIKINIVOLATABU
iVakamacala ni 2 Timoci 1:7—“Sega ni Solia Vei Keda na Kalou na Yalo ni Rere”
E rawa vakacava vua na Kalou me vukea e dua me kua ni rere qai yaloqaqa ni cakava na ka e dodonu?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
